"باقىتتى وتباسى" باعدارلاماسى اياسىندا قۇجات قابىلداۋ باستالىپ كەتتى. بۇگىنگى كۇننىڭ وزىندە رەسپۋبليكا بويىنشا 1129 ءوتىنىش ءتۇسىپ سونىڭ 190-ى جەڭىلدەتىلگەن نەسيەگە قول جەتكىزىپ ۇلگەرگەن دەپ حابارلايدى Qamshy.kz اقپارات اگەنتتىگى ەۋرازيا ارناسىنا سىلتەمە جاساپ. 

"باقىتتى وتباسى" باعدارلاماسىنا كوپبالالى انالار، مۇگەدەك بالا اسىراپ وتىرعاندار جانە تولىق ەمەس وتباسىلار قاتىسا الادى. قويىلاتىن تالاپ مىناداي:   

"بەلگىلى ءبىر تالاپتار بار. باعدارلاماعا قاتىسۋشى ق ر ازاماتى بولۋى ءتيىس. تولىق ەمەس وتباسى بولسا اجىراسقاندارىنا 2 جىل تولۋى كەرەك. ءوتىنىم بەرگەن ۋاقىتتا ءوز اتىندا ءۇيى بولماۋى قاجەت.  نۇر-سۇلتان قالاسىندا تىركەلگەنىنە 2 جىلدان كەم بولماۋى ءتيىس. ەڭ نەگىزگى تالاپ مىناداي: بىزدە ءبىر ايلىق ورتاشا جالاقى 42 500 تەڭگە. مىسالى، ءبىر وتباسىندا 5 ادام بولسا تابىس كولەمى 212 500 تەڭگەدەن اسپاۋى ماڭىزدى. وسى تالاپتارعا ساي كەلەتىن اكىمدىككە تىركەلگەن جانە جولداماسى بار ادامدار عانا اتالعان باعدارلاماعا قاتىسا الادى"، - دەدى "تۇرعىن ءۇي قۇرىلىس جيناق بانكى" اق ورتالىق فيليالى ديرەكتورىنىڭ ورىنباسارى جانار ىزىمبەتوۆا.   

"باقىتتى وتباسى" باعدارلاماسى جايىندا تاعى ءبىر قۇلاققاعىس اقپارات. جوعارىدا اتالعان تالاپتاردىڭ بارلىعىنا ساقاداي ساي كەلىپ، ءبىراق العاشقى جارناعا اقشاسى  جەتپەي تۇرعاندار بولسا، وندا جەرگىلىكتى اكىمدىكتەر كومەككە كەلەدى. 

"بەكىتىلگەن باعدارلامانىڭ نەگىزىندە جەرگىلىكتى اتقارۋشى ورگان العاشقى جارنانىڭ ءبىر بولىگىن وتەيدى. ياعني، العاشقى جارناعا اقشاسى جەتپەي تۇرعاندارعا اكىمدىك 1 ميلليون تەڭگە كولەمىندە سەرتيفيكات بەرەدى. قوعامدىق كەڭەس بۇل جوبانى ماقۇلدادى. ءماسليحاتتىڭ كەزەكتى سەسسياسىندا ول بەكىتىلەدى. بانكتىڭ بارلىق تالاپتارىنا ساي كەلگەن ازاماتتار اكىمدىككە كەلىپ سول سەرتيفيكاتتى الاتىن بولادى"، - قالالىق جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ءانۋار سايپوۆ.

الەۋمەتتىك ماسەلەنى العاش بولىپ اكىمدىكتىڭ الدىنا بارىپ تۇرىپ كوتەرگەن استانالىق انالار ەدى.