2019 جىلدىڭ العاشقى جارتىسىندا ەلدەن 22،3 مىڭ ادام كوشىپ كەتكەن دەپ حابارلايدى Qamshy.kz اقپارات اگەنتتىگى lsm.kz-كە سىلتەمە جاساپ.

ىشكى ىستەر مينيسترلىگىنىڭ دەرەگىنشە، كەتكەندەردىڭ كوبى – 19 650 ادام رەسەيگە قونىس اۋدارعان. 1،4 مىڭ ادام گەرمانياعا، 321 ادام پولشاعا، 238 ادام وزبەكستانعا، 162 ادام بەلارۋسقا، 129 ادام قىرعىزستانعا كوشكەن. سونداي-اق اقش-قا 130، يزرايلگە 53، كاناداعا 45 ادام ءبىرجولا اتتانعان.

جىراققا جىلىستاۋشىلاردىڭ اراسىندا شىعىس قازاقستان وبلىسىنىڭ تۇرعىندارى كوپ. ول جاقتان 3 مىڭ ادام شەتەل اسقان. قوستاناي وبلىسىنان 2،9 مىڭ ادام، قاراعاندى وبلىسىنان 2،8 مىڭ، پاۆلودار وبلىسىنان 2،3 مىڭ، ەلوردادان 2 مىڭنان استام، الماتىدان 1،9 مىڭ ادام وتانىن تاستاپ كەتكەن.

شەتەلگە كەتۋشىلەر اراسىنداعى ەڭ تومەنگى كورسەتكىش قىزىلوردا، ماڭعىستاۋ، تۇركىستان وبلىستارىندا تىركەلىپ وتىر.