ەلىمىزدە جۇرگەن ارميان ءنومىرلى كولىكتەر تۇگەل راسىمدەلمەك دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ. يندۋستريا جانە ينفراقۇرىلىمدىق دامۋ مينيسترلىگى وسىنداي باستاما كوتەرىپ وتىر. ويتكەنى سول جاقتان ماشينا ايداپ اكەلىپ، ەش جەردە سالىق تولەمەيتىندەر كوبەيگەن دەيدى مينيسترلىكتەگىلەر.
ماسەلەن، قازاقستان ازاماتى ارمەنياعا بارىپ ۋاقىتشا تىركەۋگە تۇرادى دا، كولىك ساتىپ الادى. ول كولىگىن سول ارمەنيادا تىركەۋگە قويادى. سوسىن ونى قازاقستانعا اكەلىپ، وسىندا ءمىنىپ جۇرە بەرەدى. اقىرىندا نە ارمەنيادا، نە قازاقستاندا سالىق تولەمەيدى.
رەسمي مالىمەت بويىنشا، بيىلدىڭ وزىندە اقش-تان ارمەنياعا 60 مىڭداي جەڭىل كولىك اكەلىنگەن. جاپ-جاڭا بولماسا دا باعاسى ءبىزدىڭ ەلدە شىعارىلاتىن كولىكتەردەن ەكى ەسە ارزان. مينيسترلىك ەندى جۇرگىزۋشىلەردىڭ بۇل قۋلىعىن شەكتەگىسى كەلەدى.
"ەگەر جۇرت سول جاقتان كولىك ساتىپ العىسى كەلسە، مارحابات، ءبىز قارسى ەمەسپىز. تەك زاڭداستىرسىن. ترانزيتتىك نومىرمەن اكەلۋدىڭ قاجەتى جوق. ودان دا وسىندا اكەلىپ، زاڭعا ساي تىركەۋگە قويىپ، سوسىن ەمىن-ەركىن ايداپ جۇرە بەرسىن"، - دەيدى يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى امانياز ەرجانوۆ مىرزا.
پىكىر قالدىرۋ