قازاقستانداعى سانى جاعىنان ەڭ كوپ جالدامالى قىزمەتكەرلەر – ورتا مەكتەپ مۇعالىمدەرى مەن بۋحگالتەرلەر، دەپ حابارلايدى Qamshy.kz اقپارات اگەنتتىگى ەڭبەك رەسۋرستارىن دامىتۋ ورتالىعىنىڭ باسپا ءسوز قىزمەتىنە سىلتەمە جاساپ.

2018 جىلى رەسپۋبليكادا جالدامالى قىزمەتتە ىستەيتىن 6،6 ميلليوننان استام ادام تىركەلگەن، ولاردىڭ 3 ملن 383 مىڭى – ەر ادامدار جانە 3 ملن 328 مىڭى – ايەلدەر.

ەڭبەك رەسۋرستارىن دامىتۋ ورتالىعى ساراپشىلارىنىڭ دەرەگىنە سايكەس، مەكتەپ مۇعالىمدەرى – ەڭ سۇرانىسقا يە ماماندىق بولىپ cانالادى. بەلگىلى بولعانداي، ءاربىر 20-جالدامالى قىزمەتكەر جالپى ءبىلىم بەرەتىن وقۋ ورىندارىندا جۇمىس ىستەيدى. جالپى سانى 352،2 مىڭ ادام قازاقستاندىق بالالاردى ساۋاتتىلىققا ۇيرەتەدى.

كاسىپتەردىڭ جاپپاي رەيتينگىسىندە كەلەسى ورىندى بۋحگالتەرلەر جالعاستىردى. 268،2 مىڭ ادام نەمەسە ءاربىر 25-جالدامالى قىزمەتكەر كۇندەلىكتى جالاقى، سالىقتار، شىعىندار مەن پايدانى ەسەپتەيدى.

ۇشتىكتى سۋپەرۆايزەرلەر، دۇكەن ساتۋشىلارى جانە ولاردىڭ كومەكشىلەرى تۇيىندەيدى، ولاردىڭ جالپى سانى – 256 مىڭ ادام.

جالدامالى قىزمەتكەرلەردىڭ ەڭ سۇرانىسقا يە ماماندىقتارىنىڭ وندىعىنا جەڭىل اۆتوكولىك، تاكسي جانە فۋرگون جۇرگىزۋشىلەرى – 236،6 مىڭ ادام؛ كۇزەتشىلەر – 219،7 مىڭ ادام؛ كەڭسە قىزمەتكەرلەرى – 139 مىڭ ادام؛ ورتا مەديسينالىق قىزمەتكەرلەر – 128،8 مىڭ ادام؛ مەكتەپكە دەيىنگى ءبىلىم بەرۋ ۇيىمدارىنىڭ تاربيەشىلەرى – 119،2 مىڭ ادام؛ اۋىل جانە ورمان شارۋاشىلىعىنىڭ، بالىق ءوسىرۋ جانە بالىق اۋلاۋ سالاسىنىڭ بىلىكتىلىگى جوق جۇمىسشىلارى – 113،4 مىڭ ادام؛ جۇك اۆتوكولىكتەرىنىڭ جۇرگىزۋشىلەرى – 105،6 مىڭ ادام كىردى.

جالدامالى قىزمەتكەرلەردىڭ جاپپاي كاسىپتەرى رەيتينگىنىڭ 20-ورنىندا «ب» (1) كورپۋسىنىڭ مەملەكەتتىك اكىمشىلىك قىزمەتشىلەرى – 77،5 مىڭ ادام ورنالاستى. وتىزىنشى ورىندى جارناما، ماركەتينگ جانە جۇرتشىلىقپەن بايلانىس جونىندەگى ماماندار يەلەندى. بۇل سالادا 46،4 مىڭ ادام جۇمىس ىستەيدى.

ەڭ سۇرانىسقا يە ماماندىقتاردىڭ جۇزدىگىن ەلەكتريكتەر مەن ەلەكترومونتاجداۋشىلار (ەلەكتر بەرۋ جەلىسىنەن باسقا) ءتامامدايدى. بۇل جۇمىس تۇرىمەن 15،9 مىڭ جالدامالى قىزمەتكەر اينالىسادى.

BAQ.KZ