الماتىدا ءال-فارابي داڭعىلى مەن ساين كوشەسىندە جانە شىعىس اينالما اۆتوكولىك جولىندا جىلدامدىق رەجيمى ساعاتىنا 80 شاقىرىم جىلدامدىققا قايتا ورالادى دەپ حابارلايدى Qamshy.kz اقپارات اگەنتتىگى. 

جىلدامدىق ماگيسترالدەرىندە (شاكج، ءال -فارابي داڭعىلى) رۇقسات ەتىلگەن 80 كم جىلدامدىقتى قايتارۋ ماسەلەسى كوپتەگەن قالالىقتاردى تولعاندىرۋدا. باقىتجان ساعىنتايەۆتىڭ الماتى اكىمى قىزمەتىنە كىرىسكەن العاشقى كۇننەن باستاپ وسى تاقىرىپقا قاتىستى 800-دەن استام ءوتىنىش تۇسكەن.

پراكتيكا كورسەتكەندەي، رۇقسات ەتىلگەن جىلدامدىقتى 60 كم/ساعاتقا دەيىن تومەندەتكەنىمەن، اپاتتى جاعداي قالادا جاقسارعان جوق، وكىنىشكە وراي، جكا ءوسۋ ۇستىندە. 

شاكج مەن ءال-فارابي داڭعىلىنا جىلدامدىق رەجيمىن قايتارۋدى الماتى قالاسىنىڭ قوعامدىق كەڭەسى دە ۇسىنعان بولاتىن.

سوندىقتان، قوعام تاراپىنان تۇسكەن كوپ ءوتىنىشتى نازارعا الا وتىرىپ، الماتى اكىمدىگى شاكج مەن ءال-فارابي داڭعىلىنا رۇقسات ەتىلگەن 80 كم/ساعات جىلدامدىقتى قايتارۋ جونىندە شەشىم قابىلدايدى، بۇل ءبىرىڭعاي اينالما جولىنا ەنەتىن كوشەلەرگە قاتىستى وڭ شارا بولىپ وتىر.