Nur Otan پارتياسى ءتوراعاسىنىڭ ءبىرىنشى ورىنباسارى، الماتىنىڭ بۇرىنعى اكىمى باۋىرجان بايبەك ءال-فارابي داڭعىلى، ساين كوشەسى جانە شىعىس اينالما اۆتوكولىك جولىنداعى جىلدامدىق رەجيمى وزگەرۋىنە قاتىستى پىكىر ءبىلدىردى دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
"مەندە Twitter جانە Instagram جەلىلەرىندە پاراقشالارىم بار، Facebook-تى دا وقىپ وتىرامىن. كەز كەلگەن ماسەلەگە ءتۇرلى پىكىرلەر ايتىلادى. اسىرەسە، ول ماسەلە ادام ءومىرى مەن دەنساۋلىعىنا قاتىستى بولسا. سىزدەر الماتىنىڭ ادام ولىمىنە اكەلگەن جول-كولىك وقيعاسى سانى جونىنەن تەك قازاقستان بويىنشا ەمەس، الەم بويىنشا دا كوش باستاپ تۇرعانىن بىلەسىزدەر مە؟ بۇل الماتىنىڭ عانا ەمەس، بۇكىل قازاقستاننىڭ رەيتينگىن تۇسىرەدى"، - دەيدى بايبەك.
"جىلدامدىقتى ازايتۋ جول قاۋىپسىزدىگى تيىمدىلىگىن ارتتىرۋعا باعىتتالعان باستى التى قادامنىڭ ءبىرى. ءبىز كەز كەلگەن شەشىم قابىلداعان كەزدە الەمدىك تاجىريبەگە، زاماناۋي ترەندتەرگە سۇيەنەتىنبىز. قاۋىپسىزدىك - "الماتى 2020" باعدارلاماسىنىڭ باستى باعىتى. شۆەسيانىڭ تاجىريبەسىنە سۇيەنە وتىرىپ، Vision Zero جۇيەسىن ەنگىزە باستادىق". "Nur Otan پارتياسىنا اۋىسقانىما ەكى اي ۋاقىت بولىپ قالدى. بۇگىندە الماتىنى ارىپتەسىم باقىتجان ساعىنتايەۆ باسقارىپ وتىر. شەشىمدى قابىلدايتىن دا سول، سول اۋماق ءۇشىن جاۋاپ بەرەتىن دە ءوزى. قوعامدىق كەڭەس بار، ءماسليحات بار. مۇندا قانداي دا ءبىر اقىل-كەڭەس بەرۋ ارتىق بولار دەپ ويلايمىن"، - دەدى باۋىرجان بايبەك.
ەسكە سالايىق، كەشە ءال-فارابي مەن تاعى ەكى كوشەگە ساعاتىنا 80 جىلدامدىق رەجيمى قايتارىلاتىنى حابارلانعان ەدى. "وسىعان بايلانىستى اكىمدىك الەۋمەتتىڭ جوعارى سۇرانىسىن نازارعا الا وتىرىپ، ءال-فارابي داڭعىلى مەن شىعىس اينالما اۆتوكولىك جولىنا ساعاتىنا رۇقسات ەتىلگەن 80 شاقىرىم جىلدامدىقتى قايتارۋ تۋرالى شەشىم قابىلدادى. بۇل وسى كوشەلەردىڭ بىرەگەي اينالما جولىنا بايلانىستى مىندەتتەرىنە ساي كەلەدى"، - دەلىنگەن الماتى اكىمدىگىنىڭ باسپا ءسوز رەليزىندە.
پىكىر قالدىرۋ