جامبىل وبلىسى اۋماعىندا جابايى قىزعالداقتىڭ 20 ءتۇرى گۇلدەيدى. ونىڭ 12ء-سى 2007 جىلى قىزىل كىتاپقا ەنگىزىلگەن. بۇل قاتاردان كاۋفمان، گرەيگ قىزعالداقتارىن دا كەزىكتىرۋگە بولادى دەپ جازادى Qamshy.kz اقپارات اگەنتتىگى. 

ەلباسى نۇرسۇلتان نازاربايەۆ «ۇلى دالانىڭ جەتى قىرى» ماقالاسىندا قازاقستاندى قىزعالداقتىڭ وتانى رەتىندە سيپاتتايدى. «قازاقستان اۋماعىنداعى شۋ، ىلە تاۋلارىنىڭ ەتەگىنەن ءالى كۇنگە دەيىن جەرگىلىكتى وسىمدىكتەر الەمىنىڭ جاۋھارى سانالاتىن رەگەل قىزعالداقتارىن باستاپقى كۇيىندە كەزدەستىرۋگە بولادى... بۇگىندە جەر جۇزىندە قىزعالداقتىڭ 3 مىڭنان استام ءتۇرى بار، ولاردىڭ باسىم كوپشىلىگى – ءبىزدىڭ دالا قىزعالداعىنىڭ «ۇرپاعى». ءقازىر قازاقستاندا قىزعالداقتىڭ 35 ءتۇرى وسەدى» دەلىنگەن ەلباسى ماقالاسىندا. سوندىقتان كەيىنگى ۇرپاق ساناسىنا تۋعان جەردىڭ ءقادىرىن ءبىلىپ، ونداعى اسەمدىك پەن سۇلۋلىقتى باعالاي الۋى ماڭىزدى. ءقازىر قازاق دالاسىندا كاۋفمان، كولپاكوۆسكيي، بورششوۆ، گرەيگ ، زينايدا سەكىلدى قىزعالداقتاردىڭ تۇرلەرى گۇلدەيدى. ءبىر عانا جۋالى اۋدانىنداعى بەرىكقارا شاتقالىندا قىزعالداقتىڭ سيرەك كەزدەسەتىن 5 ءتۇرى وسەدى ەكەن. سوندىقتان دا بەرىكقارا شاتقالى رەسمي تۇردە قىزعالداقتىڭ الەمدىك وتانى دەپ سانالادى. كەي دەرەكتەردە قىزعالداق ەكسپورتىمەن الەمگە تانىمال گوللاندياعا بۇل گۇلدىڭ بەرىكقارا شاتقالىنان بارعانى تۋرالى ايتىلادى.

–قىزعالداق جامبىل وبلىسىنىڭ تۋريستىك برەندىنىڭ بىرىنە اينالا الاتىندىعى ەش كۇمان تۋعىزبايدى. جاسىراتىنى جوق ءبىز ءالى دە جابايى قىزعالداقتىڭ ءقادىرىن بىلمەي وتىرمىز. ەگەر ۇقىپتاپ قاراي الساق گۇلدىڭ بۇل ءتۇرىن ۇلتتىق بايلىعىمىز سانالاۋى دا عاجاپ ەمەس. قازىرگى تاڭدا قازاقستاندا قىزعالداقتىڭ 35 ءتۇرى بولسا ونىڭ 18ء-ى قىزىل كىتاپقا ەنگىزىلگەن. ويتكەنى ولاردىڭ تارالۋ ايماعى دا جىل ساناپ قىسقارۋدا. مۇنىڭ بىردەن ءبىر سەبەبى ادامداردىڭ تابيعاتقا دەگەن جاناشىرلىعىنىڭ جوقتىعى بولىپ وتىر. زاڭ جۇزىندە ءبىزدىڭ ەلدە قىزعالداقتىڭ سيرەك كەزدەسەتىن تۇرلەرىنىڭ ساباعىن دا، باداناسىن دا جۇلۋعا تىيىم سالىنعان. سوعان قاراماستان وتانداستارىمىز ءبىر ساتتىك قىزىق ءۇشىن گۇلگە قولىپ سوزىپ، ونى قۋراپ قالعان سوڭ قوقىسقا تاستايدى. گۇلدەردىڭ جابايى تۇرلەرى نەگىزىنەن تابيعي جولمەن ۇرىقتانۋ ارقىلى كوبەيەدى. جۇلىنعان ءبىر گۇلدىڭ ورنى تولۋى ءۇشىن كوپ ۋاقىت كەرەك. وسىنى ازاماتتاردىڭ تۇسىنە الماي جۇرگەندىگى قىنجىلتادى، - دەيدى بيولوگ ي. پروزوروۆا.

ايتا كەتۋ كەرەك وبلىس اۋماعىندا جىل سايىن ازاماتتاردى جابايى قىزعالداقتىڭ قادىر-قاسيەتىن بىلۋگە شاقىراتىن اۋقىمدى شارالار ۇيىمداستىرىلىپ تۇرادى.