سايتىمىزعا الماتى قالاسىنىڭ ماديار ەسىمدى تۇرعىنى حابارلاستى. حابارلاسىپ، قورشاعان ورتاعا، الماتى قالاسىنىڭ تابيعاتىنا نەمقۇرايلى قارايتىن اكىمدىك پەن قالا تۇرعىندارىنا دەگەن ءۋاجىن جەتكىزدى. ول ءۋاج مىنانداي.
«ادەتتە كولىكپەن نەمەسە اۆتوبۋسپەن جۇرەتىنمىن. بۇگىن جاياۋ سەرۋەندەگىم كەلىپ، ۇلكەن الماتى وزەنىنىڭ رىسقۇلوۆ-رايىمبەك قيىلىسىنداعى جاياۋ جۇرگىنشىگە ارنالعان جولىمەن ءجۇردىم. وزەن بويىندا، اعاش ساياسىندا سالقىن، تاسا جەردە دەمالىپ وتىرۋعا ارنالعان ساكىلەرى بار جالعىزاياق جولمەن ءجۇرىپ كەلە جاتىپ، مىنانداي كورىنىسكە تاپ بولدىم. اتالعان كوشە بويىنداعى ساكى اتاۋلىلار سىنعان، تاقتايلارى مۇلدەم جوق، وتىرۋ مۇمكىن ەمەس. قوقىس جاشىگى اۋزى-مۇرنىنان شىعىپ جاتىر، اينالا تولى قوقىس. ءبىر تازا جەر جوق. ءار ادىم اتتاعان سايىن قوقىس جوق ءبىر جەردى كورمەدىم. ءتىپتى جول جيەگىنە ورناتىلعان تەمىر قورشاۋلاردىڭ كەيبىر جەرى مۇلدەم تۇبىمەن قوپارىلعان. جازاتايىم وقيعا بولىپ، بىرەۋ-مىرەۋ وزەنگە قۇلاپ كەتسە، كىم جاۋاپ بەرەدى؟
ەلىم، جەرىم ءۇشىن جانى اشيتىن ازامات رەتىندە ايتارىم: تۇرىپ جاتقان قالامىزدىڭ تازالىعى ءسىز بەن مەنىڭ قولىمىزدا. مەن كورگەن جايت ءتيىستى ورىنعا جەتىپ، جەتەر قۇلاققا جەتكىزىلەدى، ساكىلەرى جوندەلىپ، قوقىستارى تازالانادى، تىنىعىپ وتىرۋعا لايىقتى بۇرىنعى قالپىنا قايتا كەلتىرىلەدى دەگەن ۇمىتتەمىن» دەپ تىلەگىن جەتكىزگەن ماديار دالەل رەتىندە قالتا تەلەفونىنا تۇسىرگەن سۋرەتتەرىن دە جولداپتى.
ءاربىر قازاقتىڭ ارىز-شاعىم، مۇڭ-سىرىن جەتكىزۋ – ءبىزدىڭ مىندەت. بۇل اتالعان جەرگە الماتى قالاسىنىڭ «الماتى تازالىق» مەملەكەتتىك كوممۋنالدىق كاسىپورنى نەمەسە وسى ايماق كىرەتىن اۋدان اكىمدىگىنىڭ تازالىق ءبولىم جاۋاپتى شىعار؟ ەندەشە، وسى اتالعان كوشەلەر ءتيىستى اۋدان اكىمدىگى بۇل تىلەككە بەي-جاي قاراماي، دەرەۋ ارادا ءتيىستى شارا قولدانادى دەگەن ۇمىتتەمىز.
مادياردىڭ قازاقستاننىڭ ءاربىر تۇرعىنىنا ايتارى: "حالايىق، جۇرگەن جەرىمىزدە تازالىق ساقتاپ جۇرەيىك. مەيلى ول ءۇيدىڭ ءىشى، سىرتى، كوشە، باسقا قالا، ەل، جەر، تاۋ-تاس بولسىن. ءار ادام ءوز قوقىسىن ءوزى تازالاپ جۇرسە ەكەن. بۇل ەلدە، جەردە، قالادا، اۋىلدا ءسىز دە، مەن دە ءومىر ءسۇرىپ جاتىرمىز. ەرتەڭ ۇرپاقتارىمىز دا وسىندا ءومىر سۇرەتىن بولاتىن. ەندەشە، بارىمىزدى ساقتاي بىلەيىك. ءبارىن وزىمىزدەن باستايىق."
پىكىر قالدىرۋ