ق ر پرەزيدەنتى قاسىم-جومارت توقايەۆ «ۇلىتاۋ – 2019» حالىقارالىق تۋريستىك فورۋمىنا قاتىسۋدا. بۇل تۋرالى اقوردانىڭ باسپا ءسوز قىزمەتى Twitter-دەگى پاراقشاسىندا جازدى دەپ حابارلايدى Qamshy.kz اقپارات اگەنتتىگى

"ۇلىتاۋ – ۇلتىمىزدىڭ التىن بەسىگى، تاعىلىمدى تاريحىمىزدىڭ كۋاسى. قالىڭ قاۋىم وسى كيەلى ولكەدە ەل بيلەگەن حانداردى اق كيىزگە كوتەرىپ، تاققا وتىرعىزعان. سوندىقتان ءبىز ۇلىتاۋ جەرىنە حان ورداسى، قازاق جەرىنىڭ كىندىگى دەپ، ەرەكشە قۇرمەتپەن قارايمىز!

ءبىر-بىرىن داۋعا قيسا دا، جاۋعا قيماعان حالقىمىز بەرەكە-بىرلىكتى بارىنەن جوعارى قويعان. بابالاردان قالعان سالت-داستۇرلەردى بۇگىنگى ۇرپاق لايىقتى جالعاستىرۋى ءتيىس.

«ۇلىتاۋ» ۇلتتىق تاريحي-مادەني جانە تابيعي مۇراجاي قورىعى ەل يگىلىگىنە اينالدى. ۇلىتاۋ اۋدانىنىڭ ورتالىعىندا قازاق حاندارىنىڭ اللەياسى بوي كوتەردى. ەندى ەلىمىزدىڭ وسىنداي باعا جەتپەس باي مۇراسىن وزگە جۇرتقا تانىتۋدىڭ جاڭاشا جولدارىن ويلاستىرۋىمىز كەرەك.

ۇلى حاننىڭ ۇلكەن ۇلى – جوشىنىڭ مازارى قازاق جەرىندە تۇرعانىن بۇگىندە ەلىمىزدەگى جانە شەتەلدەگى جۇرتشىلىقتىڭ كوبى بىلە بەرمەيدى. اتا-بابالاردىڭ اماناتىنا ادال بولۋ – بىزگە سىن.

ءبىز التىن وردانىڭ نەگىزىن قالاعان جوشى حاننىڭ ەسىمىن ۇلىقتاۋدى مىندەتتى تۇردە قولعا الۋىمىز قاجەت. ونىڭ تاريحي تۇلعاسىنا الەمنىڭ نازارىن اۋدارىپ، كەسەنەسىن مادەني تۋريزم نىسانىنا اينالدىرۋ – وتە ماڭىزدى مىندەت.

ۇلىتاۋ – حالىقارالىق دەڭگەيدەگى ەتنوگرافيالىق ءتۋريزمنىڭ ورتالىعى بولۋى ءتيىس. بۇل جۇمىستار التىن وردانىڭ 750 جىلدىعىن مەرەكەلەۋ اياسىندا باستالۋى قاجەت.

قازىرگى وتاندىق تۋريزم يندۋسترياسى – كەنجە قالىپ كەلە جاتقان سالا. جىل سايىن قىرۋار قاراجات سالساق تا، بۇل سالا تولىققاندى دامىماي وتىر. تۋريزم سالاسىنىڭ قازىرگى احۋالىن تۇبەگەيلى وزگەرتەتىن ۋاقىت كەلدى. بۇل جۇمىستاردى ۇلىتاۋداي قاسيەتتى جەرلەردەن باستاۋىمىز قاجەت.

ۇلىتاۋ ايماعى مىندەتتى تۇردە قازاقستاننىڭ تۋريستەر تارتۋ كارتاسىنىڭ الدىڭعى قاتارىندا بولۋى ءتيىس. بۇرىن جوبالانعان «ۇلىتاۋ» ۇلتتىق تابيعي پاركىن قۇرۋ ماسەلەسىن جۇزەگە اسىرۋ كەرەك. بيىل مۇندا تۋريستەر ءۇشىن ارنايى ورتالىق اشىلۋى ءتيىس.

ۇلىتاۋ تۋريستىك مەكەنگە، دەمالىس ايماعىنا، ۇلى بابالارعا تاعزىم ەتۋ ورتالىعىنا اينالۋى ءتيىس. بۇل وڭىرگە قازاق تاريحىنىڭ سيمۆولى بولاتىن ەسكەرتكىش-انسامبل ورناتۋ قاجەت. قاسيەتتى ۇلىتاۋ – ۇلتتى ۇيىستىرۋدىڭ، ەلدى بىرىكتىرۋدىڭ نەگىزى...

.. بۇل باستامالار حالقىمىزدىڭ ۇلتتىق بىرەگەيلىگىن نىعايتا تۇسۋگە وڭ ىقپال ەتەدى دەپ سەنەمىن. ۇلىتاۋدىڭ تاريحى مەن تاعىلىمىن جاستار تاربيەسى مەن وتانشىلدىقتى، ىشكى ءتۋريزمدى دامىتۋعا پايدالانۋ كەرەك" - دەلىنگەن جازبادا.