وڭىردە اليمەنت تولەۋگە مىندەتتى 6 494 ادام بار. ولاردىڭ ىشىندەگى پروبلەمالىق تولەمەۋشىلەر ساناتىنداعى 302ء-ى، نەگىزىنەن، جۇمىسقا ورنالاسپاعان، اسوسيالدى ومىرگە داعدىلانىپ كەتكەندەر. ال، قاساقانا تولەمەۋشىلەردىڭ بورىشتارى بىرنەشە ميلليون تەڭگەگە دەيىن جەتۋى مۇمكىن.

– قاساقانا تولەمەۋشىلەردىڭ فاميليالارى بار تىزىمدەردە اليمەنتتەردىڭ سومالارى دا كورسەتىلگەن. كوبىنىڭ بورىشى ەكى ميلليوننان ءۇش ميلليون تەڭگەگە دەيىن قۇرايدى. ياعني، بىرنەشە جىل بويى تولەمەگەن. بۇل دۇرىس ەمەس. ءاربىر ەر ازامات ءوزىنىڭ بالالارى ءۇشىن جاۋاپتى بولۋى ءتيىس. ارينە، كەيدە نەكەنى ساقتاپ قالۋ مۇمكىن بولماي جاتادى. الايدا، بۇل ءوزىنىڭ بالاسىنا قامقورلىق جاساۋعا كەدەرگى بولماۋى ءتيىس، – دەدى ءوڭىر باسشىسى نۇرلان نوعايەۆ. – ەرەسەك ادامداردىڭ اراقاتىناسى قالاي قالىپتاسسا دا، بالالار ودان زارداپ شەكپەۋى ءتيىس. ۇي-كۇيى، ماشيناسى بار، جاعدايى جاقسى ادامدار ءتۇرلى وتباسىنداعى بىرنەشە بالاسىنان قاشقاقتاپ ءجۇرۋ فاكتىلەرى دە كەزدەسەدى. سوت ورىنداۋشىلار بۇندايلاردى جاۋاپكەرشىلىككە، سونىڭ ىشىندە، قىلمىستىق جاۋاپكەرشىلىككە تارتۋى ءتيىس. الايدا، ومىردە ءبارى ويداعىداي بولا بەرمەيدى. جەكەمەنشىك سوت ورىنداۋشىلاردىڭ رەسپۋبليكالىق پالاتاسى باسقارماسىنىڭ ءتوراعاسى ەرنار يبرايەۆتىڭ حابارلاۋىنشا، بۇگىنگى كۇنى اكىمشىلىك حاتتاما جاساۋ ءۇشىن بورىشكەردى كەلتىرۋدە پوليسيا ورگاندارى تاراپىنان ناقتى قولداۋ بولماي تۇر. بورىشكەرلەردى اكىمشىلىك جاۋاپكەرشىلىككە تارتۋداعى نەگىزگى پروبلەما – ولاردىڭ سوت ورىنداۋشىلارعا كەلمەۋى، ناقتى تۇرىپ جاتقان مەكەنىن جاسىرۋى، بورىشكەردىڭ تىركەلگەن مەكەن-جايىندا بولماۋى.

– مەملەكەتتىك ورگانداردىڭ اركەتتەرىنىڭ ۇيلەسپەۋشىلىگى ناتيجەسىندە قوعامدا سوت اكتىسى مەن ول ءۇشىن جاۋاپكەرشىلىك بورىشكەرگە ەمەس، سوت ورىنداۋشىعا جۇكتەلەدى دەگەن تەرىس ۇعىم قالىپتاسقان. ءوندىرىپ الۋشىلار ادىلەت ورگاندارىمەن، پروكۋراتۋرامەن جىلدار بويى ناتيجەسىز حات الماسۋعا ءماجبۇر. بۇل بيلىك ينستيتۋتتارىنا دەگەن سەنىمسىزدىك تۋىنداۋىنا ىقپال ەتەدى، – دەدى ەرنار يبرايەۆ.

نۇرلان نوعايەۆ اتاپ وتكەندەي، وڭىردە پروبلەمالىق اليمەنتتەردىڭ سانىن، تيىسىنشە، الەۋمەتتىك شيەلەنىستى ازايتۋ، كامەلەتكە تولماعانداردىڭ اليمەنت تولەمدەرىن الۋ قۇقىعىن قامتاماسىز ەتۋ ءۇشىن بارلىق مۇددەلى مەملەكەتتىك ورگانداردىڭ بىرلەسكەن كۇش-جىگەرى قاجەت.

– سىزدەر بىرىگىپ، بىرلەسە جۇمىس ىستەۋلەرىڭىز قاجەت. باستارىڭ بىرىكپەي، ناتيجە بولمايدى، جۇمىستى رەتكە كەلتىرۋدى تاپسىرامىن. اليمەنت تولەمەيتىندەرگە قارسى قىلمىستىق ءىس قوزعاڭدار، ولاردىڭ ماشينالارىن تاركىلەڭدەر، باسقا دا شارالار الىڭدار. جەكەمەنشىك سوت ورىنداۋشىلاردى ىنتالاندىرىڭدار. مۇمكىن، اليمەنتىن تولەگەن ءاربىر ادام ءۇشىن سىياقى بەرۋ قاجەت شىعار. اليمەنت المايتىن جالعىزباستى انالاردىڭ قالاي ءومىر ءسۇرىپ جاتقانىن كورىڭىزدەر. سىزدەردىڭ جۇمىستارىڭىز ولاردىڭ بولاشاعىنا دا ىقپال ەتەدى. ادامدار سىزدەردىڭ جۇمىستارىڭىزدىڭ ناقتى ناتيجەسىن كورىپ، سەزىنۋى ءتيىس، – دەپ تۇيىندەدى وبلىس اكىمى.