قازاقستانننىڭ اقپارات جانە قوعامدىق دامۋ ءمينيسترى داۋرەن ابايەۆ ءبىر اپتا بويى جەلىدە قىزۋ تالقىلانعان "ەكى سيىرعا" قاتىستى پىكىر ءبىلدىردى دەپ جازادى Qamshy.kz اقپارات اگەنتتىگى. بۇل تۋرالى ابايەۆ "حابار" ارناسىنداعى "اشىق ديالوگ" باعدارلاماسىنا بەرگەن سۇحباتىندا ايتتى.
ابايەۆتىڭ ايتۋىنشا، "ميكرو كرەديت ال، ەكى سيىر ساتىپ الىپ، ءوز كۇنىڭدى ءوزىڭ كور" دەپ ايتقان قازاقستاننىڭ ەكس-پرەزيدەنتى نۇرسۇلتان نازاربايەۆقا "سيىر دەگەننىڭ نە ەكەنىن، ونىڭ قانشا ءسۇت بەرەتىنىن ءتۇسىندىرۋدىڭ قاجەت جوق".
"اشىق ايتقاندا، مەن وسى ماسەلە اينالاسىنداعى داۋ-دامايدى تۇسىنبەيمىن. ەگەر ەلباسى "ەڭبەك ەتپەي سۋدان بالىق تا شىعارا المايسىڭ" دەگەن ماقالدى ايتسا، نە بولار ەدى؟ بلوگەرلەر الەۋمەتتىك جەلىنى قارماق پەن قۇرتتىڭ سۋرەتىنە تولتىرىپ جىبەرەر مە ەدى؟ "ەكى سيىر" بۇل جەردە اقپاراتتى جەڭىل قابىلدانۋ ءۇشىن كەلتىرگەن مىسال ەكەنى ايقىن عوي. بىرەۋ ءۇشىن ەكى سيىر دەگەن اۋلاسىنداعى باۋ-باقشا، بىرەۋ ءۇشىن كولىك جۋاتىن كاسىپورىن، جول بويىنداعى ءدامحانا. بىرەۋ ءۇشىن ىسكەرلىك، بىرەۋ ءۇشىن ازىق-تۇلىك دۇڭگىرشەگى. ال ەكى سيىردان قۇرالعان شارۋاشىلىقتاردىڭ ومىرلىك قابىلەتىن بار زەيىنىمەن ەسەپتەپ جاتقان ساراپشىلاردىڭ ەسىنە تۇڭعىش پرەزيدەنتتىڭ ءوزى اۋىلدان شىققانىن سالعىم كەلەدى. ول بالا كۇنىنەن سوعىستان كەيىن اۋىر جىلداردا اتا-اناسىنا شارۋاشىلىق جۇرگىزۋگە كومەكتەستى. وعان سيىر دەگەننىڭ نە ەكەنىن، ونىڭ قانشا ءسۇت بەرەتىنىن ءتۇسىندىرۋدىڭ قاجەت جوق"، – دەدى مينيستر.
ابايەۆ سونداي-اق، نازاربايەۆتىڭ حالىقتى "ءوز ءىسىن اشىپ، جۇمىس ىستەۋگە شاقىرعانىن" ايتتى.
"ءوزىڭنىڭ ارەكەتسىزدىگىڭدى ناشار شەنەۋنىكتەر مەن ناشار مەملەكەتكە، ناشار الەۋمەتتىك ساياساتقا جابۋ ءارقاشان وڭاي. جاعدايدى ءوز قولىڭا الىپ، جۇمىس ىستەۋ الدەقايدا قيىن. قاراساڭىز، ول ءۇشىن اكىمدىك تاراپىنان دا، مينيسترلىكتەر تاراپىنان دا، "اتامەكەن" مەن "دامۋ" قورى بويىنشا دا شاعىن نەسيەلەندىرۋ جانە شاعىن بيزنەستى قولداۋ جونىنەن ءقازىر بارلىق جاعداي جاسالعان. قورىتىپ ايتقاندا، ەلباسى ادامداردى ءوز ءىسىن اشىپ، جۇمىس ىستەۋگە شاقىردى. ەڭ ماڭىزدىسى وسى. قالعانىنىڭ ءبارى جەلىدەگى قوقىس قانا"، – دەدى ابايەۆ.
21 تامىزدا قازاقستاندى 30 جىلداي ۇزدىكسىز بيلەگەن نۇرسۇلتان نازاربايەۆ ءوزىنىڭ اتىمەن اتالاتىن ەل استاناسى نۇر-سۇلتاندا بيلىكتەگى "نۇر-وتان" پارتياسىنىڭ ساياسي كەڭەسىنىڭ كەڭەيتىلگەن وتىرىسىندا بيلىكتەن كومەك سۇراعان وتباسىلارعا "ميكروكرەديت ال دا، ەكى سيىر ساتىپ ال. ءوزىڭدى اسىرا" دەپ ايتقان بولاتىن. نازاربايەۆتىڭ بۇل ءسوزى جەلىدە قىزۋ تالقىلانىپ، كوپتەگەن جەلى قولدانۋشىلارى "كەلەكەگە" اينالدىردى.
2016 جىلدان باستاپ اقپارات جانە قوعامدىق دامۋ مينيسترىلگىن باسقارىپ كەلە جاتقان داۋرەن ابايەۆ نازاربايەۆتىڭ جەلىدە قىزۋ تالقىلانىپ، حالىقتىڭ نارازىلىعىن تۋعىزعان سوزدەرىن ءتۇسىندىرىپ جۇرەدى.
26 تامىزدا جۋرناليستەرگە سۇحبات بەرگەن قازاقستاننىڭ الەۋمەتتىك سالاعا جاۋاپتى ۆيسە-پرەمەرى بەردىبەك ساپاربايەۆ "ول ءۇشىن مالعا ەرەكشە كۇتىم جاساپ، تالماي ەڭبەكتەنۋ كەرەك" دەپ نا زاربايەۆ ايتقانداي ەكى سيىرمەن قالاي كۇن كورۋگە بولاتىن تۇسىندىرگەن.
پىكىر قالدىرۋ