قىتايدىڭ قازاقستانداعى ەلشىسى استانالىق وقۋشىلارىنا جۇڭگو ءتىلى وقۋلىقتارىن سىيعا تارتتى دەپ جازادى Qamshy.kz اقپارات اگەنتتىگى.
قىتايدىڭ قازاقستانداعى توتەنشە جانە وكىلەتتى ەلشىسى قازىرگى تاڭدا قازاقستاندىقتاردىڭ جۇڭگو ءتىلىن ۇيرەنۋگە دەگەن سۇرانىسى جوعارى ەكەنىن ايتىپ ءوتتى.
بۇل جۇڭگو ءتىلى وقىتىلاتىن قازاق مەكتەپتەرىنە قولعابىس رەتىندە جىل سايىن وتكىزەتىن ءىس-شارامىز. ەكىجاقتى قارىم-قاتىناس ءۇشىن بۇل وتە ماڭىزدى. مەكتەپتەردە جۇڭگو ءتىلىن بىردەن وقىتۋ وتە دۇرىس باستاما. وقۋشىلار جۇڭگو ءتىلى مەن مادەنيەتىن ەرتە جاستان تاني باستايدى. مەن ءوزىم ون جاسىمنان باستاپ ورىس ءتىلىن وقىپ، وسى جولدان وتكەن ەدىم. قاسىم-جومارت توقايەۆ وتكەن اپتادا ەلدەرىمىز اراسىنداعى مادەني-گۋمانيتارلىق قاتىناستاردى نىعايتۋعا قىزىعۋشىلىق تانىتتى" ، - دەيدى چجان سياو.
Kapital.kz سايتىنىڭ مالىمەتىنە سۇيەنسەك، ەلشى قازاقستاندا كونفۋسييدىڭ بەس ينستيتۋتى بارىن، جاقىندا تاعى جاڭا عيماراتتار اشىلۋى مۇمكىن ەكەنىن اتاپ ءوتتى.
ال Baq.kz سايتىنىڭ دەرەگى بويىنشا، نۇر-سۇلتانداعى نازاربايەۆ زياتكەرلىك مەكتەبىنىڭ ديرەكتورى مەيرام جاكەنوۆ وقۋ ورداسىنىڭ اشىلعانىنا 10 جىل بولسا، ونداعى ءبىلىم الاتىن بالالار 9 جىلدان بەرى جۇڭگو ءتىلىن مەڭگەرىپ جاتقانىن ايتقان.
«مەن الدىمەن جۇڭگو ءتىلىن قالاي وقي باستاعانىمىزعا توقتالعىم كەلەدى. ءبىزدىڭ نازاربايەۆ زيايتكەرلىك مەكتەبى فيزيكا-ماتەماتيكا پانىنە دەن قويعان. مەكتەپتىڭ اشىلعانىنا بيىل 10 جىل تولدى. ال جۇڭگو ءتىلىن ءبىز 9 جىل قاتارىنان وقىپ كەلەمىز»، - دەدى جاكەنوۆ.
نۇر-سۇلتان قالاسىنىڭ №81 "Astana English School" گيمنازياسىنىڭ ديرەكتورى گۇلنار سادىقوۆانىڭ ايتۋىنشا، ءوزى باسقارىپ وتىرعان مەكتەپتە بالالار جۇڭگو ءتىلىن ەكىنشى ءتىل رەتىندە 2-سىنىپتاپ باستاپ مەڭگەرەدى.
