بۇگىن جامبىل وبلىسى اكىمدىگى مادەنيەت، ارحيۆتەر جانە قۇجاتتاما باسقارماسىنىڭ ۇيىمداستىرۋىمەن  ش.ءۋاليحانوۆ اتىنداعى وبلىستىق عىلىمي-امبەباپ كىتاپحاناسىندا ق ر مەملەكەت قايراتكەرى، فيلولوگيا عىلىمىنىڭ دوكتورى، پروفەسسور مىرزاتاي جولداسبەكوۆپەن كەزدەسۋ ءوتتى.

تاۋەلسىز مەملەكەت ورناتۋدا، ونى قالىپتاستىرۋداعى جانە تۇرىكتانۋ عىلىمى مەن قازاقتىڭ ءتول ونەرىن دامىتۋداعى ەڭبەگى زور الاشتىڭ ابىزىمەن بولعان كەزدەسۋدە جامبىل وبلىسىنىڭ 80 جىلدىعىنا وراي جارىق كورەتىن كوپتومدىقتىڭ دايىندالۋ بارىسى اڭگىمە ارقاۋىنا اينالدى.  وبلىستىڭ تەرەڭ تاريحى جان-جاقتى قامتىلاتىن ەڭبەكتى شىعارۋدا ەسكەرۋگە ءتيىس ماسەلەلەردى ورتاعا سالعان ۇلت زيالىسى كەزدەسۋ بارىسىندا ەلدىڭ كەلەشەگى، تاريحى، جاس ۇرپاقتىڭ جارقىن بولاشاعى تۋراسىنداعى كەلەلى اڭگىمەلەرىن ورتاعا سالدى.

وبلىستىق مەملەكەتتىك ءارحيۆتىڭ مۇراعاتتانۋشىسى ماقۇلبەك رىسداۋلەتتىڭ ايتۋىنشا وبلىس اكىمى اسقار مىرزاحمەتوۆتىڭ باستاماسىمەن دايىندالىپ جاتقان 80 تومدىق كىتاپتىڭ 30 تومى دايىندالىپ، باسپاعا جىبەرىلگەن. قالعان تومدارى دا قازان ايىنا دەيىن ياعني وبلىستىڭ 80 جىلدىق مەرەيتويىنا دەيىن دايىن بولماق.

مىرزاتاي جولداسبەكوۆ كوپتومدىقتى ازىرلەۋ بارىسىندا اسىعىستىققا جول بەرۋگە بولمايتىنىن، اسقان جاۋاپكەرشىلىكپەن قاراۋ ەكەنىن جەتكىزدى.

– اسقار مىرزاحمەتوۆ وڭتۇستىك قازاقستان وبلىسىندا اكىم بولىپ تۇرعاندا "قازىنالى وڭتۇستىك" دەگەن كىتاپتى شىعارۋعا ۇيىتقى بولىپ، يگى ءىس جاسادى. سەبەبى ۇرپاق ەلدىڭ، ءوڭىردىڭ تاريحىن، ءوزىنىڭ ءتۇپ تامىرىن ءبىلىپ ءجۇرۋى ءتيىس. سوندىقتان سىزدەردىڭ دە جاساپ جاتقاندارىڭىز العىس ايتۋعا، قۇرمەت كورسەتۋگە تۇرارلىق ىزگىلىكتى ءىس.

ءبىراق اسىقپاۋ كەرەك. جان-جاقتى سارالاپ، جەتى رەت ولشەپ، ءبىر رەت كەسكەن ءجون. مالىمەتتتەردىڭ بۇرمالانباۋىنا نازار اۋدارىڭىزدار. بىلمەگەندى سۇراۋدىڭ ەشقانداي دا سوكەتتىگى جوق. بىلمەگەندەرىڭىز بولسا اقىل-كەڭەس ايتىپ، كورگەن-تۇيگەنىممەن،  قولىمدا بار دەرەكتەرمەن بولىسۋگە دايىنمىن، – دەگەن مىرزاتاي جولداسبەكوۆ ءوزىنىڭ ءبىرقاتار قۇندى ەڭبەكتەرىن ش.ءۋاليحانوۆ اتىنداعى وبلىستىق عىلىمي-امبەباپ كىتاپحاناسىنىڭ قورىنا سىيعا تارتۋ ەتتى.

ايتا كەتەيىك، م. جولداسبەكوۆ ءار جىلدارى قازاقستان رەسپۋبليكاسى پرەمەر-مينيسترىنىڭ ورىنباسارى، قازاقستان رەسپۋبليكاسىنىڭ يران يسلام رەسپۋبليكاسىنداعى توتەنشە جانە وكىلەتتى ەلشىسى، قازاقستان رەسپۋبليكاسى سىرتقى ىستەر ءمينيسترى جانىنداعى ديپلوماتيالىق اكادەميانىڭ رەكتورى قىزمەتتەرىن اتقاردى. 2000 جىلدان استاناداعى ەۋرازيا ۇلتتىق ۋنيۆەرسيتەتىنىڭ رەكتورى. جولداسبەكوۆ قازاق ادەبيەتىنىڭ العاشقى قاينار باستاۋلارىن، جامبىل جابايەۆ شىعارماشىلىعىن زەرتتەۋگە مول ۇلەس قوستى. تۇرىك قاعاناتى كەزىندەگى ورحون-ەنيسەي جازبا ەسكەرتكىشتەرىن قازاق عالىمدارى اراسىندا العاشقىلاردىڭ ءبىرى بولىپ جاڭاشا زەردەلەپ، قازاق تىلىندەگى اۋدارماسىن عىلىمي اينالىمعا ەنگىزدى. جامبىلدىڭ اقىندىق مەكتەبىن زەرتتەپ، ونىڭ تۇستاستارى مەن شاكىرتتەرىنىڭ تۋىندىلارىن جان-جاقتى تالدادى. “حالىقتار دوستىعى”، “قۇرمەت” وردەندەرىمەن ماراپاتتالعان.