قوعام بەلسەندىسى، جەكە كاسىپكەر مارعۇلان سەيسەمباي جسدپ پارتياسى مەن ەرمۇرات باپي تۋرالى پىكىر ءبىلدىردى دەپ جازادى Qamshy.kz اقپارات اگەنتتىگى. 

جۋىردا جسدپ-دا ايتۋلى وزگەرىستەر بولدى. مەن بۇل پارتيانىڭ مۇشەسى ەمەسپىن جانە ءوز باسىم ەرمۇرات باپيدى تانىمايمىن. الايدا مەندەگى اقپاراتتارعا سايكەس جانە ەرمۇرات باپيدىڭ ۇزاق جىلدىق قىزمەتىنە قاراپ، ونى ەرەكشە قۇرمەتتەيمىن ءارى سەنەمىن! ول سوزىمەن دە، ىسىمەن دە 20 جىل بويى ءوزىنىڭ شىندىق جاعىندا ەكەنىن دالەلدەدى. باپي پارتياعا جاڭا، جاس مۇشەلەر مەن كوشباسشىلاردى تارتۋ ارقىلى پارتيانىڭ ءيميدجى مەن جۇمىسىن تۇبەگەيلى وزگەرتكىسى كەلدى.
⠀
وكىنىشكە قاراي، بيلىك تاعى ءبىر رەت وپپوزيسيونەرلەرىمىزدى جەڭدى.
پارتيا ىشىندەگى ساتقىندار پارلامەنت سايلاۋىنا قاتىسۋعا كەلىسپەگەندەر ءۇشىن بىردەن-بىر زاڭدى مۇمكىندىكتى جەرلەدى. ەگەر سايلاۋدا وپپوزيسيالىق پارتيالار بولماسا، باقىلاۋشىلاردىڭ بار جۇمىسى ءوز مانىنەن ايىرىلادى. پارلامەنتكە تەك قانا بيلىكتىڭ پارتيالارى عانا وتەدى. ونداي سايلاۋدىڭ نە كەرەگى بار؟
ال سودان كەيىن ادامدار وزدەرىنىڭ كەلىسپەيتىندىكتەرىن الاڭعا شىعىپ ايتادى. مۇنىڭ ءبارى كوڭىلگە قاياۋ تۇسىرەدى. بيلىكتىڭ ءوزى جاعدايدى ۋشىقتىرىپ جاتىر.