قازاقستاندىق كاسىپقوي بوكسشى دانيار ەلەۋسىنوۆ سپورتتىق مانسابىنداعى سەگىزىنشى جەكپە-جەگىن وتكىزدى. نيۋ-يوركتەگى (اقش) بوكس كەشىندە وتانداسىمىز امەريكالىق رەشارد حيكسپەن جۇدىرىقتاستى دەپ حابارلايدى Qamshy.kz اقپارات اگەنتتىگى Vesti.kz سايتىنا سىلتەمە جاساپ.
رەشارد حيكس 1984 جىلى 17 قاراشا كۇنى اقش-تىڭ كيللەن قالاسىندا ومىرگە كەلگەن. 25 جاسىندا العاش قولعاپ كيەدى. جاسى 34-كە كەلسە دە كاسىپقوي بوكستا بار بولعانى 13 جەكپە-جەك وتكىزىپ ۇلگەرگەن. سەبەبى ول كاسىپقوي رينگتە نەبارى 2013 جىلى اۋىسقان.
ءبىرىنشى جىلى ءبىر جەكپە-جەك وتكىزسە، 2014 جىلى ءۇش مارتە جۇدىرىقتاستى. ال ودان كەيىنگى جىلدارى كەمىندە ەكى جەكپە-جەكتەن وتكىزىپ وتىردى. ال دانيار ەلەۋسىنوۆ بولسا 2018 جىلى بەس رەت شارشى الاڭعا شىققان. امەريكالىق بوكسشى 13 جەكپە-جەگىنىڭ تەك بىرەۋىندە، دجوناتان ستيلمەن تەڭ تۇسكەن. قالعان 12 كەزدەسۋىندە جەڭىسكە جەتسە، ونىڭ التاۋىن ۋاقىتىنان بۇرىن اياقتاعان. BoxRec رەيتينگىندە رەشارد حيكس 439 ورىنعا جايعاسقان. دانيار ەلەۋسىنوۆ بولسا 167 ساتىدا.
امەريكالىق بوكسشى WBB and Texas Welterweight Champ جانە WCF International Welterweight بەلبەۋلەرىنىڭ يەگەرى. Hulu Theather كەشەنىندە وتكەن كەشتە بوكسشىلاردىڭ جەكپە-جەگى 10 راۋندقا جوسپارلانعان ەدى. الايدا جەكپە-جەك ءبىرىنشى راۋندتا-اق اياقتالدى. دانيار ەلەۋسىنوۆ قارسىلاسىن نوكداۋنعا جىبەرىپ، بىرنەشە اۋىر سوققىسىن جۇمساپ ۇلگەردى. ارتىنشا ول امەريكالىق بوكسشىنى ەكىنشى مارتە نوكداۋنعا جىبەرگەننەن سوڭ تورەشى جەكپە-جەكتى توقتاتتى. وسىلايشا قازاقستاندىق بوكسشى سەگىزىنشى جەڭىسىنە قول جەتكىزدى.
باستى جەكپە-جەكتە ءبىرىنشى جەڭىل سالماقتاعى بوكسشىلار ديەۆين حەيني (22-0، 14 كو) پەن زاۋر ابدۋللايەۆ (11-0، 7 كو) كەزدەسەدى. ولار WBC چەمپيوندىق اتاعى ءۇشىن ايقاسادى. ايتا كەتەيىك، دانيار ەلەۋسىنوۆ 28 جاستاعى قازاقستاندىق بوكسشى، كاسىبي رينگتەگى العاشقى جەكپە-جەگى 2018 جىلدىڭ 28 ءساۋىرى كۇنى نيۋ-يورك قالاسىندا ءوتتى. كەزدەسۋدە بوكسشى امەريكالىق نوا كيددتى ءۇشىنشى راۋندتا نوكاۋتقا جىبەردى. سوڭعى جەكپە-جەگىندە چيليلىك لۋيس نورامبۋەنامەن (3-1-1، 2 كو)كەزدەسىپ، تورەشىلەردىڭ ءبىراۋىزدان شىعارعان شەشىمىمەن جەڭىسكە جەتتى.
پىكىر قالدىرۋ