13 قىركۇيەكتە تۇركىستان وبلىسى ارىس قالاسىندا اسكەري قويما اۋماعىن تازارتۋ كەزىندە ءوق-دارى بولشەكتەرى جارىلىپ، ءتورت اسكەري جاراقاتتاندى، دەپ جازادى Qamshy.kz اقپارات اگەنتتىگى. بۇل تۋرالى قازاقستاننىڭ قورعانىس مينيسترلىگى حابارلادى.
مينيسترلىكتىڭ مالىمەتىنشە، جاراقات العانداردىڭ بارلىعى اسكەري ۇشاقپەن الماتىداعى اسكەري گوسپيتالعا جەتكىزىلگەن.
سونداي-اق مينيسترلىك وقيعا بويىنشا اسكەري پوليسيا تەكسەرۋ جۇرگىزىپ جاتقانىن، تۇرعىندارعا كەلەر ءقاۋىپ جوق ەكەندىگىن مالىمدەدى.
"تۇرعىندارعا ەشقانداي ءقاۋىپ ءتونىپ تۇرعان جوق، جاعداي تولىق باقىلاۋعا الىنعان. ەسكە سالا كەتسەك، قالا اۋماعىن جانە ءوق-دارىنى ساقتاۋ نىساندارىنا جاقىن اۋماقتاردى تازارتقاننان سوڭ، وق-دارىلەردىڭ نەگىزگى بولىكتەرى اسكەر ءبولىم اۋماعىندا تۇر، ءبىراق تۇرعىندارعا ەشقانداي ءقاۋىپ ءتونىپ تۇرعان جوق. سونىمەن قاتار، اسكەري بولىمدەگى اسكەري قىزمەتشىلەردىڭ ءوق-دارى بولىكتەرىن جيناۋ جانە جويۋ جۇمىستارىنا بەلگىلى ءبىر ۋاقىت كەرەك. وسىعان بايلانىستى قورعانىس مينيسترلىگى رەسمي مالىمەت تاراتۋشى ورگاندارعا سەنىپ، راستالماعان اقپاراتتى تاراتپاۋدى سۇرايدى"، - دەلىنگەن مينيسترلىك تاراتقان حابارلامادا.
وسى جىلدىڭ 24 ماۋسىمدا تۇركىستان وبلىسى ارىس قالاسىنداعى اسكەري قويما جارىلىپ،سالدارىنان ءتورت ادام قازا تاپتى. سول كەزدە ارىستا توتەنشە جاعداي جاريالانىپ، تۇرعىندارىنىڭ باسىم قالادان قاشىپ كەتتى. ارىستا قالعان تۇرعىندار بيلىكتىڭ بۇيرىعىمەن ەۆاكۋسيالاندى.
جارىلىس سالدارىنان ارىستاعى تۇرعىن ۇيلەر مەن عيماراتتاردىڭ ءبىرازى ءبۇلىندى. بيلىك قىركۇيەكتە جارىلىس كەزىندە بۇلىنگەن بارلىق عيماراتتارداعى قۇرىلىس جۇمىستارى اياقتالعانىن حابارلادى.
پىكىر قالدىرۋ