15 قىركۇيەكتە قازاقستاندا حالىقتى ەمحاناعا تىركەۋ ناۋقانى باستالدى. جىل سايىن وتكىزىلەتىن ءداستۇرلى كامپانيا ەكى ايعا سوزىلماق. بيىل تىركەۋ eGov ەلەكتروندى ۇكىمەت ۆەب-پورتالى ارقىلى جۇرگىزىلەدى. تىركەلۋ ءۇشىن ەلەكتروندى سيفرلىق قولتاڭبا قاجەت. بۇل تۋرالى «الەۋمەتتىك مەديسينالىق ساقتاندىرۋ قورى» كەاق الماتى قالالىق فيليالى ديرەكتورى تىلەۋحان ابىلدايەۆ حابارلادى، دەپ جازادى almaty.gov.kz سايتى.

تىركەۋ پروسەسىنىڭ اۆتوماتتاندىرىلۋى ازاماتتاردى ەمحاناعا «سىرتتاي» تىركەۋ فاكتىلەرىنىڭ الدىن الۋعا كومەكتەسەدى. سونىمەن قاتار، ەركىن تاڭداۋ ءپرينسيپى بويىنشا ازامات ءوزىنىڭ تۇرعىلىقتى جەرىندەگى اكىمشىلىك بىرلىك اۋماعىنداعى ەمدەۋ مەكەمەسىنىڭ بىرىنە تىركەلە الادى. وبلىستىق جانە رەسپۋبليكالىق ماڭىزى بار قالالاردا ءبىر اۋدان ىشىندەگى ەمحانانى تاڭداۋعا بولادى.

تىركەۋ بارىسىندا وتباسىلىق پرينسيپكە باسىمدىق بەرىلەدى. ياعني، اتا-اناسى دا، بالالارى دا ءبىر ەمحاناعا تىركەلگەنى ءجون. ال، 18 جاسقا تولماعانداردى بالانىڭ زاڭدى وكىلى تىركەي الادى.

ەمحانا ءوزى قىزمەت كورسەتەتىن ايماقتان تىس جەردە تۇراتىن ازاماتتاردى، سونداي-اق، باستاپقى مەديسينالىق-سانيتارلىق كومەك كورسەتەتىن مەكەمە جۇكتەمەسى شەكتەن اسىپ كەتكەن جاعدايدا تىركەۋدەن باس تارتۋى مۇمكىن. قولدانىستاعى نورماتيۆتەرگە سايكەس، ۋچاسكەدەگى جالپى پراكتيكا دارىگەرى قارايتىن پاسيەنتتەر سانى 1700-دەن اسپاۋى ءتيىس.

«قازىرگى تاڭدا قالادا جوسپارلانعان 88 ۋچاسكەنىڭ ورنىنا 131 ۋچاسكە اشىلدى. سونىمەن ۋچاسكەلەردىڭ جالپى سانى 895-كە جەتتى. ناتيجەسىندە ءبىر دارىگەردىڭ جۇكتەمەسى 1529 ادامعا دەيىن قىسقاردى»، – دەدى الماتى قالاسى قوعامدىق دەنساۋلىق باسقارماسى باستىعىنىڭ ورىنباسارى اسەل بيسەنبايەۆا.

ەسكە سالساق، ازاماتتار ەمحانانى تىركەۋ ناۋقانىنان باسقا ۋاقىتتا دا اۋىستىرا الادى. ياعني، باسقا جەرگە قونىس اۋدارعان جاعدايدا جىلىنا ءبىر رەت، ەمدەۋ مەكەمەسى قايتا قۇرىلسا نەمەسە قورمەن كەلىسىمشارتتى بۇزعان جاعدايدا باسقا ەمدەۋ مەكەمەسىنە تىركەلۋگە بولادى. سونىمەن قاتار، ەلىمىزدە تۇراتىن ءار تۇرعىن جىلىنا ءبىر رەت ءوزى تۇراتىن اۋماقتىق بىرلىك شەڭبەرىندە ەمحانا اۋىستىرا الادى.