16 قىركۇيەك كۇنى الماتىداعى «قازاقفيلم» كينوستۋدياسىنىڭ اۋماعىندا ش. ايمانوۆ اتىنداعى قازاق كينوسىنىڭ مۋزەيى سالتاناتتى تۇردە اشىلدى، دەپ حابارلايدى Qamshy.kz اقپارات اگەنتتىگى.
مۇندا قۇندى مۇراعاتتىق ەكسپوناتتار جيناقتالعان، ولاردىڭ اراسىندا اتى اڭىزعا اينالعان رەجيسسەر سەرگەي ەيزەنشتەيننىڭ كامەراسى، قازاق كينەماتوگرافيستەرىنىڭ كلاسسيگى شاكەن ايمانوۆتىڭ جەكە زاتتارى مەن كوللەكسياسى، كينوفيلمدەر كەيىپكەرلەرى كيگەن ەرەكشە كوستيۋمدەر جانە باسقالارى بار. مۋزەيدىڭ باستى ماقتانىشى – شاكەن كەنجەتاي ۇلى ايمانوۆتىڭ قايتا قالپىنا كەلتىرىلگەن جۇمىس كابينەتى.
القالى شاراعا ق ر مادەنيەت جانە سپورت ۆيسە-مينيسترى نۇرعيسا داۋەشوۆ، الماتى اكىمى باقىتجان ساعىنتايەۆ، كسرو حالىق ءارتيسى ءاسانالى ءاشىموۆ، مەملەكەت جانە قوعام قايراتكەرى ەسەت قوسۋبايەۆ، قازاقستان كينەماتوگرافيستەرى وداعىنىڭ ءتوراعاسى ەرمەك تۇرسىنوۆ، كينوستۋديا باسشىلىعى مەن ۇجىمى جانە تانىمال كينو قايراتكەرلەر قاتىستى.
«بۇگىن ءبىز سىزدەرمەن بىرگە ماڭىزدى مادەني وقيعا – اتى اڭىزعا اينالعان شاكەن ايمانوۆ اتىنداعى قازاق كينوسى مۋزەيىنىڭ اشىلۋىنا كۋا بولۋدامىز. مۋزەيدەگى بارلىق ەكسپوناتتار قازاق كينوسىنىڭ كلاسسيگىنە اينالعان سول كەزدەگى عاجاپ تۋىندىلاردىڭ تاريحىنان سىر شەرتەدى. بار ومىرلەرىن كينو الەمىن دامىتۋعا ارناعان عيبراتتى جاندار جيناعان ءارى ساقتاعان ءار بۇيىم بارىنشا قىمبات. مىسالى، سۇلتان قوجىقوۆتىڭ «قىز جىبەك ءفيلمىنىڭ» قويۋشى- سۋرەتشىسى بولعان گۇلفايرۋز يسمايلوۆا باس كەيىپكەردىڭ كامزولىن، كويلەگىن جانە ساۋكەلەسىن ساقتاپ قالىپ، مۋزەيگە تاپسىرعان. يۆان زايسيەۆتىڭ ارقاسىندا كونەدەن قالعان كينوتەحنيكا كوپشىلىك كوزايىمىنا اينالماق. مەڭتاي وتەپبەرگەنوۆ ەسكى فيلمدەردىڭ افيشالارىن سول قالپىندا ساقتاعان. مۋزەيدىڭ قالىپتاسۋىنا جانە اشىلۋىنا شاكەن كەنجەتاي ۇلىنىڭ تۋىستارى زور ۇلەس قوستى.ورتاق ىستەگى ولاردىڭ ەڭبەگى ەرەن. ەندى مۋزەيدىڭ ءاربىر قوناعى قازاق كينوسىنىڭ تاريحىنا تەرەڭ بويلاي الادى»، – دەدى كينوستۋديا پرەزيدەنتى ارمان اسەنوۆ.
«بارلىق كينەماتوگرافيستەردى ش. ايمانوۆ اتىنداعى قازاق كينوسى مۋزەيىنىڭ اشىلۋىمەن قۇتتىقتايمىن. جاڭا مادەني وشاق بۇگىننەن باستاپ ارۋ قالامىز الماتىنىڭ كورنەكى ورىندارىنىڭ بىرىنە اينالاتىندىعى شىندىق. مۋزەيدىڭ باستى ميسسياسى – قازاق كينەماتوگرافىمەن تىكەلەي بايلانىستى باعا جەتپەس مۇراعاتتىق ەكسپوناتتاردى كوزدىڭ قاراشىعىنداي ساقتاپ، ونىڭ باي تاريحىن حالىققا جەتكىزۋ بۇل العاشقى ءارى بارىنشا عاجاپ ەكسپوناتتار جيىنتىعىنىڭ جاستاردى عانا ەمەس، قالامىزعا كەلگەن بارلىق شەتەلدىك قوناقتادى دا قىزىقتىراتىنىنا سەنىمدىمىن»، – دەدى الماتى قالاسىنىڭ اكىمى باقىتجان ساعىنتايەۆ.
ءدال وسى كۇنى مۋزەي كوللەكسياسى تاعى ءۇش باعالى ەكسپوناتتارمەن تولىقتى. ولار – شاكەن ايمانوۆتىڭ 100 جىلدىعى مەن قازاق انيماسياسىنىڭ 50 جىلدىعىنا وراي ق ر ۇلتتىق بانكى شىعارعان مەرەكەلىك كۇمىس تيىندار، «قازپوشتا» اق جاساعان تاقىرىپتىق ماركالار.
بۇلاردى ق ر ۇلتتىق بانكىنىڭ باس ديزاينەرى المات باسەنوۆ پەن «قازپوشتا» اق پوشتا تولەمدەرى بەلگىلەرى باسقارماسىنىڭ تەحنيكالىق رەداكتورى وڭعارباي ىڭكارىم-اي تاپسىردى.
پىكىر قالدىرۋ