20-25 قىركۇيەك ارالىعىندا سەمەيدە مادەنيەت جانە سپورت مينيسترلىگى شىعىس قازاقستان وبلىسى اكىمدىگىنىڭ قولداۋىمەن جانە قازاقستان تەاترلارى اسسوسياسياسىنىڭ ۇيىمداستىرۋىمەن قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى، كورنەكتى تەاتر جانە كينو اكتريساسى ءامينا ءومىرزاقوۆانىڭ 100 جىلدىعىنا ارنالعان قازاقستان دراما تەاترلارىنىڭ XXVII رەسپۋبليكالىق تەاتر فەستيۆالى وتەدى.

فەستيۆال قازاقستاندا تەاتر ونەرىن دارىپتەپ، كوپشىلىككە تاراتۋعا، ءداستۇرلى تەاتر ونەرىن ساقتاپ، ءارى قاراي دامىتۋعا، دارىندى ارتيستەر مەن رەجيسسەرلەردى انىقتاپ، ولارعا قولداۋ كورسەتۋگە، زاماناۋي ساحنا پروسەسىندەگى نەگىزگى باسىمدىقتاردى انىقتاۋ، وسكەلەڭ ۇرپاقتىڭ بويىندا وتانسۇيگىشتىك قاسيەتتى دامىتۋعا جول اشىپ، تەاتر ونەرىن دامىتۋعا مۇمكىندىك تۋعىزادى.

سونداي-اق، شارا قازاقتىڭ كورنەكتى كينو جانە تەاتر اكتريساسى، قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى ءامينا ءومىرزاقوۆانىڭ ەسىمىن ەل ەسىندە ماڭگى قالدىرۋ، ونىڭ شىعارماشىلىعى جانە مۇراسىمەن تانىستىرۋ ماقساتىندا ۇيىمداستىرىلماق.  

فەستيۆالگە ەلىمىزدىڭ 12 تەاتر ۇجىمى ۇزدىك قويىلىمدارىمەن قاتىسادى. التى كۇن بويى سەمەي قالاسىنىڭ قوناقتارى مەن تۇرعىندارى فەستيۆال بارىسىندا ق.قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى، ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى، اباي اتىنداعى قازاق مۋزىكالىق دراما تەاترى، ن.ءجانتورين اتىنداعى ماڭعىستاۋ وبلىستىق مۋزىكالىق-دراما تەاترى، م.گوركيي اتىنداعى مەملەكەتتىك اكادەميالىق ورىس دراما تەاترى، ف.م. دوستويەۆسكيي اتىنداعى ورىس دراما تەاترى، قىزىلوردا وبلىستىق ن.بەكەجانوۆ اتىنداعى قازاق مۋزىكالىق دراما تەاترى، «Nomad» تەاترى، ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى، «داريعا-اي» جاستار تەاترى، س.مۇقانوۆ اتىنداعى سولتۇستىك قازاقستان وبلىستىق قازاق سازدى-دراما تەاترى، شىعىس قازاقستان وبلىستىق دراما تەاترلارىنىڭ قويىلىمدارىن تاماشالاي الادى.

باسپا ءسوز كونفەرەنسياسى – 20 قىركۇيەكتە ساعات 10.00-دە، فەستيۆالدىڭ سالتاناتتى اشىلۋ ءراسىمى – 20 قىركۇيەكتە ساعات 11.00-دە، فەستيۆالدىڭ سالتاناتتى جابىلۋ ءراسىمى – 25 قىركۇيەكتە ساعات 19.00-دە، سونداي-اق فەستيۆال قويىلىمدارى 20-25 قىركۇيەك ارالىعىندا اباي اتىنداعى قازاق مۋزىكالىق دراما تەاترىنىڭ عيماراتىندا وتەدى.     

كەلەم دەۋشىلەرگە ەسىك اشىق.

بايلانىس تەلەفوندارى: 8 707-808-18-90