بيىل قازاقتىڭ كلاسسيك جازۋشىسى، مەملەكەت جانە قوعام قايراتكەرى ءابىش كەكىلبايەۆتىڭ تۋعانىنا 80 جىل. مەرەيتويدى اتاپ ءوتۋ كورنەكتى قالامگەر عۇمىرىنىڭ 40 جىلى وتكەن، شىعارماشىلىق تۇرعىدا شىڭدالعان، ەل ءسۇيىپ وقىعان تۋىندىلارىنىڭ باسىم كوپشىلىگى جازىلعان الماتى قالاسىنان باستاۋ الدى، دەپ حابارلايدى Qamshy.kz اقپارات اگەنتتىگى.

مەرەيتويلىق شارالار لەگىنىڭ شىمىلدىعى جازۋشىنىڭ ەسىمى بەرىلگەن كوشەنىڭ سالتاناتتى اشىلۋ راسىمىمەن ءتۇرىلدى. بۇرىنعى "كابلۋكوۆا" بۇدان بىلاي رەسمي تۇردە "كەكىلبايەۆ" كوشەسى دەپ اتالادى.

شاراعا قالا باسشىسى باقىتجان ساعىنتايەۆ، جازۋشىنىڭ جارى كلارا جۇمابايەۆا مەن تۋىستارى، قالامگەرلەر مەن قالا تۇرعىندارى قاتىستى. قالا اكىمى جينالعانداردى زاڭعار جازۋشىنىڭ مەرەيتويىمەن قۇتتىقتاي وتىرىپ، يگى ءىستىڭ الماتىدان باستاۋ الۋىنىڭ مانىنە توقتالدى.

– اسا كورنەكتى جازۋشى ءابىش كەكىلبايەۆ ءومىرىنىڭ باقىتتى دا، ماعىنالى شاقتارىن وسى الماتى قالاسىندا وتكىزدى. جازۋشىلىق ونەردىڭ، شىعارماشىلىق شەبەرلىكتىڭ شىڭىنا شىقتى. مەملەكەتتىك ساياسات پەن ساياسي ساحنادا جارقىنداي جارقىلداپ، ءسوز باستار شەشەنگە، وي باستار كوسەمگە اينالدى. "جاقسى بولۋدىڭ جاقسىلىق جاساۋدان باسقا جولى جوق" دەگەن اعامىزدىڭ سوزىندە دە، شىعارماشىلىعىندا دا جاساندىلىق بولعان جوق. ۇلى مۇحتار اۋەزوۆتان باتا العان تالانتتى تۇلعا ويىن ىرىكپەي ايتتى، سىرىن بۇكپەي جازدى. ەلىنە جانىن سالىپ ادال قىزمەت ەتتى. ءابىش اعامىزدىڭ شىعارمالارىن وقي وتىرىپ قازاق مادەنيەتىنىڭ سانقىرلى قاتپارىن جازباي تانۋعا بولادى. قازاق ادەبيەتىنىڭ كلاسسيگىن بۇكىل قازاق حالقى ءقادىر تۇتتى. الماتى قالاسى جۇرتشىلىعى اتىنان وسىنداعى زيالى قاۋىمدى، قۇرمەتتى كلارا اپاي، ءوزىڭىزدى، بالالارىڭىزدى بۇگىنگى كوشەنىڭ اشىلۋىمەن شىن جۇرىكتەن قۇتتىقتايمىن. اعانىڭ ماڭگىلىك عۇمىرى باستالدى. ەندىگى جەردە ول كىسىنىڭ ەسىمىن ەستە قالدىرۋعا ارنالعان شارالار جاسالاتىن بولادى، – دەپ اتاپ ءوتتى باقىتجان ءابدىر ۇلى.

جازۋشىنىڭ جارى كلارا جۇمابايەۆا ءابىش كەكىلبايەۆ ومىرىندە ءوزىنىڭ تۋعان جەرىنەن كەيىن الماتىنى ەرەكشە جاقسى كورگەنىن ايتتى.

– ءابىش الماتىدا 40 جىل ءومىر ءسۇردى. شىعارماشىلىق ءومىرىنىڭ 40 جىلى وسىندا ءوتتى. "ۇركەر" مەن "ەلەڭ-الاڭ" سىندى كوپتەگەن شىعارمالارى وسىندا دۇنيەگە كەلدى. ونىڭ قىزمەتى، ەڭبەگى ەل الدىندا بولدى. ابىشتەن ەرتە ايرىلىپ قالامىز دەپ ويلاماپ ەدىك، ءبىراق ونىڭ ەسىمىن ارداق تۇتىپ، وسىنداي جاقسىلىقتار جاساپ جاتقاندارىڭىزعا كوپ-كوپ راقمەتىمىزدى ايتامىز. وسى شارالاردىڭ الماتىدان باستالعانىنا ەرەكشە قۋانىشتىمىن. الماتى جايناي، جاساي بەرسىن!، – دەپ كلارا اپامىز جۇرەكجاردى لەبىزىن ءبىلدىردى.

ءابىش كەكىلبايەۆتىڭ 80 جىلدىعىنا ارنالعان شارالار مۇنىمەن بىتپەيدى. بۇگىن جازۋشى تۇرعان ن.نازاربايەۆ داڭعىلى 118 ۇيگە ەسكەرتكىش تاقتا قويىلىپ، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا مەرەكەلىك كەش وتەدى.