ۆيسە-پرەمەر بەردىبەك ساپاربايەۆ باستاعان توپ، شقو اكىمى دانيال احمەتوۆ، مادەنيەت جانە سپورت ءمينيسترى اقتوتى رايىمقۇلوۆا قاراۋىلعا ارنايى بارىپ، ۇلى اقىننىڭ ۇرپاقتارىمەن، اۋدان اقساقالدارىمەن كەزدەستى.
جيدەبايدا ورنالاسقان ابايدىڭ ءمۇراجاي-ۇيىن، مەموريال-كەشەندە اتقارىلىپ جاتقان جۇمىستىڭ بارىسىن سارالاپ، 175 جىلدىق مەرەيتويعا وراي جوسپارلانعان ءىس-شارالار اۋقىمى مەن ورىندالۋ بارىسىن تالقىلادى.
ابايدىڭ مۇراسى – ەلدىڭ باستى رۋحاني قازىناسى. «ءدۇبىرلى تويدىڭ باستى ماقساتى ات شاپتىرىپ، كيىز تىگۋ ەمەس، ۇرپاقتىڭ ساناسىنا اقىننىڭ مۇراسىن ءسىڭىرۋ، ءمان-ماعىناسىن جەتكىزۋ كەرەك» دەگەن بەردىبەك ساپاربايەۆ تاريحتا قالاتىن تاعىلىمدى ىستەردى جاساۋ قاجەتتىلىگىن باسا ايتتى.
– مەملەكەت باسشىسى قاسىم-جومارت توقايەۆتىڭ تاپسىرماسىنا ساي، دارا اقىنىمىز اباي قۇنانباي ۇلىنىڭ تۋعان جەرى الەمنىڭ ءار تۇكپىرىنەن كەلەتىن ازاماتتاردى قارسى الۋعا ساقاداي ساي بولۋى كەرەك. ءىرى تۋريستىك ورتالىققا اينالۋى ءتيىس. قازىرگى تاڭدا وبلىس باسشىلىعى تاراپىنان جوسپاردى جۇزەگە اسىرۋ باعىتىندا ءتيىستى جۇمىستار باستالىپ كەتتى. بۇل مەرەيتويدىڭ ماعىناسىن الار بولساق، ۇرپاققا بەرەر ونەگەسى مول. سوندىقتان تاريحي ماڭىزدى شارالارعا باسىمدىق بەرە وتىرىپ، ساليقالى دەڭگەيدە وتكىزۋگە ءتيىسپىز، – دەدى ساپاربايەۆ.
وسى رەتتە ايتا كەتۋ كەرەك، كەلەر جىلى اقشوقىدا ورنالاسقان اۋلەت قورىمىنىڭ قاسىنان قۇنانباي وسكەنبايۇلىنا ارنالعان مۋزەي سالىنادى. ونداعى ماقسات – تاريحتاعى قۇنانبايدىڭ شىنايى وبرازىن اشۋ، ابايدىڭ تۇلعا بولىپ قالىپتاسۋ جولىنداعى ءرولىنىڭ ماڭىزدىلىعىن جەتكىزۋ.
جالپى مەرەيتويعا وراي شقو-دا حالىقارالىق، رەسپۋبليكالىق، وبلىستىق جانە اۋداندىق دەڭگەيدەگى جالپى سانى 330-استام اۋقىمدى ءىس-شارالار جوسپارى بەكىتىلگەن. ولاردى جۇزەگە اسىرۋعا 880 ملن. تەڭگە جۇمسالادى. مەرەيتويعا وراي اۋدان ورتالىعىندا جاڭا ءبىلىم شاڭىراعى بوي كوتەرەدى. ايماق باسشىسى دانيال احمەتوۆتىڭ ايتۋىنشا، اۋىز سۋ ماسەلەسى، اۋدانارالىق جولداردى جوندەۋ، اباي ەلىنىڭ ءال-اۋحاتىن ارتتىرۋعا باعىتتالعان باسقا دا جۇمىستارعا 4 ملرد. جۋىق قاراجات بولىنەدى.
