دەلەگاسيا قۇرامىندا ق ر پرەمەر-مينيسترىنىڭ ورىنباسارى بەردىبەك ساپاربايەۆ، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ، مادەنيەت جانە سپورت ءمينيسترى اقتوتى رايمقۇلوۆا، دەنساۋلىق ساقتاۋ ۆيسە-مينيسترى كامالجان نادىروۆ، ءبىلىم جانە عىلىم ۆيسە-مينيسترى شولپان كارينوۆا بار جۇمىس توبى شىعىس قازاقستانعا ارنايى ىس-ساپارمەن كەلدى.
مۇنداعى باستى ماقسات – «Cىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» ق ر پرەزيدەنتى جولداۋىنىڭ نەگىزىن حالىققا ءتۇسىندىرۋ. ەكى كۇننىڭ ىشىندە، بۇگىن، 20 قىركۇيەك پەن ەرتەڭ، 21 قىركۇيەك كۇندەرى بەردىبەك ساپاربايەۆ مينيسترلەرمەن بىرگە شىعىسقازاقتاندىق جۇرتشىلىقپەن، كاسىپورىنداردىڭ جۇمىسشىلارىمەن، ۇيىمدارمەن، شاعىن جانە ورتا بيزنەس وكىلدەرىمەن، كوپبالالى انالارمەن كەزدەسۋلەر وتكىزەدى.
ءىس-ساپار بارىسىندا سەمەي قالاسىنداعى جەدەل مەديسينالىق جاردەم اۋرۋحاناسىنداعى گيبريدتى حيرۋرگيالىق وپەراسيالارعا ارنالعان بلوكتىڭ جۇمىسىمەن تانىسادى. ەلەكتروتەحنيكالىق كوللەدجگە، اباي اۋدانىنداعى كەڭگىرباي بي مەن قاراۋىل اۋىلدارىندا ورنالاسقان اۋرۋحانالارعا بارادى. سونداي-اق اباي قۇنانبايەۆتىڭ 175 جىلدىق مەرەيتويىنا ارنالعان ءىس شارالار لەگىن تالقىلايدى. بۇدان بولەك التاي قالاسىنداعى اۋرۋحاناعا، روبوتتى حيرۋرگيا ورتالىعىنا، وسكەمەندە سالىنىپ جاتقان 200 ورىندىق بالالار اۋرۋحاناسىنا، سونداي-اق وبلىس ورتالىعىنداعى №46 مەكتەپكە ات باسىن تىرەيتىن بولادى.
