ءوتىپ بارا جاتقان اپتا بيلىكتەگى كوپتەگەن اۋىس-تۇيىستەرمەن ەستە قالدى. ءبىرى ءوستى، ءبىرى تومەندەدى. ادەتتەگىدەي، كوبىنىڭ ورنى عانا الماستى. دەسە دە تاياۋدا عانا "ساياسي سەنىم تۇگەسىلدى" دەلىنگەن عابيدوللا ءابدىراحىموۆتىڭ ۇكىمەت باسشىسىنىڭ كەڭەسشىلىگىنە كەلۋى كۇتپەگەن جاعداي بولدى. ال سول سوزدەردى ايتقان قىرىمبەك كوشەربايەۆ پرەزيدەنت اكىمشىلىگى باسشىلىعىنان، مەملەكەتتىك حاتشى قىزمەتىنە اۋىستىرىلدى. مۇنداي كادرلىق تاعايىنداۋلارعا بەلگىلى ءبىر توپتىڭ اسەرى بولۋى مۇمكىن دەگەن اڭگىمەلەر ايتىلىپ ءجۇر. نەگىزى قازاقستانداعى قاي-قاي شەندىنى المايىق، ايتەۋىر ارتىندا ءبىر تىرەۋى تۇرادى. ول كوبىنە اكەسى نەمەسە جاقىن اعاسى بولۋى مۇمكىن. ساياسي ساحنا مەن سونىڭ اينالىسىندا جۇرگەندەردىڭ اراسىنداعى اكەلى-بالالى، ءاعالى-ىنىلى شەندىلەردى Qamshy.kz اقپارات اگەنتتىگىنىڭ ءتىلشىسى ءتىزىپ كوردى.

جوعارىدا اتى اتالعانداردىڭ ءبىرى قىرىمبەك كوشەربايەۆتىڭ اكەسى ەلەۋ كوشەربايەۆ كەزىندە وبلىستىق دارەجەدە كوپ-كورىم پارتيالىق قىزمەتتەر اتقارعان. قىزىلوردا وبلىستىق اتقارۋ كوميتەتى ءتوراعاسىنىڭ ورىنباسارى بولعان. قارماقشى، قازالى اۋداندىق پارتيا كوميتەتتەرىنىڭ 1-حاتشىسى قىزمەتىن اتقارعان.

ماقتاۋلى شوپان، سوسياليستىك ەڭبەك ەرى، كسرو جوعارى كەڭەسىنىڭ دەپۋتاتى بولعان ءابدىر ساعىنتايەۆتىڭ ۇلى باقىتجان ساعىنتايەۆ بۇگىندە الماتى شاھارىنىڭ باسشىسى.

قاراعاندى وبلىسىنا اكىم بولىپ بارعان جەڭىس قاسىمبەك ۇزاق جىلدار پرەزيدەنت كەڭسەسىن باسقارعان مەملەكەت قايراتكەرى ماحمۇد قاسىمبەكتىڭ ۇلى ەكەنى دە كوپكە بەلگىلى. ال ونىڭ باۋىرى ارداق قاسىمبەك "بايتەرەك" ۇلتتىق حولدينگىنىڭ ەنشىلەس كومپانياسى "قازىنا كاپيتال مەنەدجمەنت" اكسيونەرلىك قوعامىنىڭ باسقارما باسشىسى.

جەڭىس قاسىمبەكتىڭ تۋعان جەرى جامبىل وبلىسىنا بۇگىندە اسقار مىرزاحمەتوۆ باسشىلىق جاسايدى. ال ءبىر كەزدەرى "قازاقستان تەمىر جولىنىڭ" باسشىسى، كولىك جانە كوممۋنيكاسيا ءمينيسترى بولعان، 2003 جىلى ءىرى كولەمدە مەملەكەت قارجىسىن قىمقىردى دەگەن ايىپپەن ءىستى بولىپ، 5 جىل شارتتى مەرزىمگە باس بوستاندىعىنان ايىرىلعان ونىڭ تۋعان باۋىرى ابىلاي مىرزاحمەتوۆ ءقازىر "اتامەن" ۇلتتىق كاسىپكەرلەر پالاتاسىنىڭ باسقارما ءتوراعاسى لاۋازىمىن اتقارىپ ءجۇر.

ىرگەلەس تۇركىستان وبلىسىنىڭ اكىمى ءومىرزاق شۇكەيەۆتىڭ ءبىر باۋىرى سەرىك ەستاي "بەينەۋ-شىمكەنت گازقۇبىرى" ءجشس-نىڭ باس ديرەكتورى بولسا، ءىنىسى بەرىك ەستاي سوت سالاسىندا ىستەيدى. قارىنداسى ءلاززات شوكەيەۆا تۇركىستان وبلىسى بويىنشا قازىناشىلىق دەپارتامەنتىنىڭ باسشىسى.

الماتى وبلىسىنىڭ اكىمى اماندىق باتالوۆتىڭ ۇلكەن ۇلى ادىلبەك باتالوۆ "قازترانسگازايماق" اكسيونەرلىك قوعامىنىڭ باس ديرەكتورىنىڭ ورىنباسارى قىزمەتىن اتقارادى.

شىعىس قازاقستان وبلىسىنىڭ اكىمى دانيال احمەتوۆتىڭ ۇلى تالعات احمەتوۆ قازاقستاننىڭ ەڭ باي ەلۋ ادامدارىنىڭ قاتارىندا. 2017 جىلعى مالىمەت بويىنشا ونىڭ داۋلەتى 145 ملن دوللاردى قۇراعان. بۇل كورسەتكىشپەن تالعات دانيال ۇلى Forbes جۋرنالى تۇزگەن باي بيزنەسمەندەر تىزىمىندە 35-ورىنعا جايعاسقان.

وبلىس اكىمدەرىنىڭ تۋىستارىن اقمولا وبلىسىنىڭ بۇرىنعى اكىمى سەرگەي كۋلاگينمەن اياقتالىق. ونىڭ ۇلى پاۆەل كۋلاگين ەكى جىلدان بەرى الماتىداعى تۇركسىب اۋدانىن باسقارادى.

ۇلتتىق قاۋىپسىزدىك كوميتەتىنىڭ ەكس-باسشىسى نۇرتاي ابىقايەۆتىڭ بالاسى سەرگەي نۇرتايەۆ قازاقستاننىڭ يتالياداعى توتەنشە جانە وكىلەتتى ەلشىسى بولسا، ەكس-سەناتور ورالباي ابدىكارىموۆتىڭ بالاسى سەرجان ابدىكارىموۆ قازاقستاننىڭ چەح رەسپۋبليكاسىنداعى توتەنشە جانە وكىلەتتى ەلشىسى.

جۋىردا "حالىق مەملەكەتكە تىزەرلەپ، العىس ايتۋى كەرەك" دەگەن داۋلى مالىمدەمە جاساعان ءماجىلىس دەپۋتاتى ۆلاديمير بوجكونىڭ بالاسى ماكسيم بوجكو اقمولا وبلىستىق ءماسليحاتىنىڭ دەپۋتاتى، "شاڭىراق" حولدينگىنىڭ قۇرىلتايشىلارىنىڭ ءبىرى، "اقمولا-فەنيكس" اكسيونەرلىك قوعامىنىڭ باس ديرەكتورى.

ال ق ر پرەمەر-مينيسترىنىڭ ورىنباسارى بەردىبەك ساپاربايەۆتىڭ تۋعان ءىنىسى نۇرلىبەك نالىبايەۆ 2013 جىلدان بەرى قىزىلوردا قالاسىنىڭ اكىمى رەتىندە ەڭبەك ەتىپ كەلەدى. ال ونىڭ ۇلى جانسۇلتان ساپاربايەۆ بيىل ساۋىردە نۇر-سۇلتان قالاسى ەسىل اۋدانى اكىمىنىڭ ورىنباسارى قىزمەتىنە تاعايىندالدى.

ءمۇسلىم التىنبايەۆ بۇل كۇندەرى 1996-1999 جانە 2001-2007 جىلدارى قورعانىس ءمينيسترى بولعان اكەسى، ەكس-سەناتور مۇحتار التىنبايەۆتىڭ جولىن قۋىپ، قورعانىس ءمينيسترىنىڭ ورىنباسارى بولىپ قىزمەت ىستەۋدە.

بۇرىنعى سەنات دەپۋتاتى ەرلان ءنىعماتۋليننىڭ قىزى ماليكا بەكتۋروۆا نۇر-سۇلتان قالاسى اكىمىنىڭ ورىنباسارى.

تاعى ءبىر ەكس-سەناتور قۋانىش ايتاحانوۆتىڭ بالاسى ەرلان ايتاحانوۆ ءقازىر شىمكەنت قالاسىنىڭ اكىمى.

سۋ جاڭا يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتىڭ تۋعان ءىنىسى ءمادي اتامقۇلوۆ ۇزاق جىل پرەزيدەنت پروتوكولىنىڭ باستىعى بولدى.

زەينەت دەمالىسىنا اتتانعان ادىلبەك جاقسىبەكوۆتىڭ ۇلى داۋرەن جاقسىبەكوۆ كەزىندەگى "سەسنابانكتىڭ" ديرەكتورلار كەڭەسىنە ءتوراعالىق ەتتى. ءقازىر قايدا ەكەنى بەلگىسىز.

"Asia Credit Bank" مەن "ورال" حالىقارالىق اۋەجايىنىڭ يەسى نۇربول سۇلتان بۇرىنعى پرەزيدەنت ىستەرىنىڭ ەكس-باسشىسى، مارقۇم سارىباي قالمىرزايەۆتىڭ بالاسى.

دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆتىڭ بالاسى اسقار تۇرىسبەكوۆ "پەترو كازاحستان ويل پروداكتس" كاسىپورنىنىڭ ءبىرىنشى ۆيسە-پرەزيدەنتى.

ءماجىلىس ءتوراعاسى نۇرلان نىعماتۋلليننىڭ ۇلى نۇرجان نۇرلانوۆ "قازمۇنايگاز-اەرو" كومپانياسىنىڭ باس ديرەكتورى.

پارلامەت سەناتىنىڭ دەپۋتاتى، سپيكەر ورىنباسارى بەكتاس بەكنازاروۆتىڭ ۇلى ناريمان بەكنازاروۆ بولسا، استاناداعى اۋدانارالىق مامانداندىرىلعان سوتتىڭ ءتوراعاسى.

وسىلاي جالعاستىرا بەرسە، بيلىك پەن كۆازيمەملەكەتتىك كومپانيالار جانە ۇلتتىق حولدينگتەردىڭ باسشىلىعىندا جۇرگەندەر بىر-بىرىنە جاقىن تۋىس، كۇيەۋ بالا، قۇدا-جەكجات بولىپ كەتە بەرەدى.