قازاقستاندا اراق ءوندىرىسى ازايىپ، سىرا مەن شىلىمعا سۇرانىس جوعارىلاي تۇسكەن، دەپ حابارلايدى Qamshy.kz اقپارات اگەنتتىگى 365info.kz سايتىنداعى دەرەكتى نەگىزگە الىپ.

ستاتيستيكا كوميتەتىنىڭ مالىمەتىنشە، قاڭتار-تامىز ارالىعىندا قازاقستاندا 12،5 ملن ليتر اراق وندىرىلگەن. بۇل بىلتىرعى سايكەس كەزەڭمەن سالىستىرعاندا اناعۇرلىم (38%) از. وتكەن جىلعى 8 ايدا ءوندىرىس كولەمى 20 ملن ليتردان اسىپ كەتكەن بولاتىن.

ءوندىرىس ديناميكاسىنىڭ تومەندەۋى بىرنەشە جىلدان بەرى بايقالىپ وتىر. 2013 جىلى ورتاشا ايلىق ءوندىرىس 3،8 ملن ليتردى قۇراسا، 2016 جىلى 2،9 ملن-عا دەيىن ءتۇستى. 2018 جىلى ءتىپتى 2،5 ملن-دى قۇرادى. ءقازىر كورسەتكىش ايىنا 1،5 ملن ليترعا دەيىن كەمىگەن.

اراق وندىرىسىمەن قاتار يمپورتتىڭ دا تومەندەگەنى بايقالادى. جىل باسىنان بەرگى 7 ايدا قازاقستانعا 3،9 ملن ليتر اراق اكەلىنىپتى. بىلتىر بۇل كەزەڭدە 4،8 ملن ليتر ءونىم جەتكىزىلگەن-دى.

كونياك ونىمدەرىنە دە سۇرانىس تومەندەي تۇسكەن. 2018 جىلعى كورسەتكىشپەن سالىستىرعاندا يمپورت 40 پايىزعا (1،5 ملن-نان 0،9 ملن-عا دەيىن) ازايعان. ىشكى نارىقتاعى ءوندىرىس تە 14 پايىزعا ءتۇسىپتى.

اراق پەن كونياكقا دەگەن سۇرانىستىڭ تومەندىگى سپيرت قولدانىسىن ازايتۋدا. جىل باسىنان بەرى 8 ايدا 790،8 مىڭ ليتر ەتيل ءسپيرتى وندىرىلگەن. بىلتىرعى ساندار بۇدان 32 پايىزعا كوپ بولاتىن.

قالىپتاسقان جاعداي ۆينو وندىرىسىنە دە ءتان.

ەسەسىنە سىرا ءوندىرىسى جوعارى قارقىنعا يە. 7 ايدا قازاقستاندا 429،4 ملن ليتر كوبىكتى سۋسىن وندىرىلگەن. بۇل قازاقستانداعى ءار ادامعا، ونىڭ ىشىندە بالالار دا بار، 23 ليتردان اينالادى ەكەن. بىلتىرعى ۇقساس كەزەڭمەن سالىستىرعاندا ساتىلىم 1،9 پايىزعا وسكەن.

قازاقستاندىق وندىرۋشىلەر سۇرانىستىڭ 91 پايىزىن قامتاماسىز ەتەدى.

سىرادان بولەك تاباك ونىمدەرىنە دە سۇرانىس ارتىپ كەلەدى. 8 ايدا 9،7 ملرد شىلىم مەن وزگە دە تاباكتىق ءونىم ءوندىرىلىپتى. بۇل وتكەن جىلعى كورسەتكىشتەن كەم بولعانىمەن، سۇرانىستىڭ قالعان بولىگىن يمپورتتىق تاۋارلار جاپقان.