قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ كۇيەۋ بالاسى مارقۇم راحات الييەۆتىڭ ۇلى ايسۇلتانعا  18 قازاندا ۇكىم شىعاتىن بولدى.

ەسكەرتە كەتەيىك، وسىدان بىرنەشە اي بۇرىن، ياعني ماۋسىم ايىندا لوندون قالاسىنداعى پاتەرلەردىڭ بىرىندە  ايسۇلتان نازاربايەۆتىڭ ۇستالعانى بەلگىلى.

بريتانيانىڭ mail online سايتىنىڭ جازۋىنا قاراعاندا،  لوندوننىڭ Covent Garden پاتەرىندە  ول بۇزاقىلىق جاساعان. ايسۇلتان  پوليسيا وكىلىمەن تەكەتىرەس بارىسىندا قول جۇمساپ، ونىڭ قولىن تىستەپ العان. كۋاگەرلەردىڭ ايتۋىنشا، پوليسەيدىڭ قولىنىڭ تىستەلگەن جەرى قان بولىپ، جەدەل جاردەم شاقىرتقان.

پروكۋرور گرەگور ماككينلينىڭ ايتۋىنا قاراعاندا، پوليسيا وكىلدەرىنىڭ ءبىرى وسىلاي قولىنان قاتتى جاراقات العان. كورشىلەرىنىڭ شاقىرتۋى بويىنشا جەدەل جەتكەن پوليسيا وكىلدەرى ايسۇلتان نازاربايەۆتى العاشقىدا «پاتەر ۇرىلارىنىڭ ءبىرى» دەپ ويلاپ قالعان.

ال ايسۇلتان نازاربايەۆتىڭ قورعاۋشىسى اليسدەير ۋيليامسون پاتەردەن ەشنارسە ۇرلانباعانىن ايتتى. تەك ءۇيدىڭ ءىشى ءبىرشاما بۇلىنگەن. شامامەن كەلگەن شىعىننىڭ كولەمى  5 مىڭ فۋنت ستەرلينگ قۇراعان. سوعان قاراعاندا ايسۇلتان نازاربايەۆ ەسىرتكى بۋىنىڭ ارقاسىنلا پاتەردىڭ  ءىشىن ءبىراز بۇلدىرسە كەرەك.

سۋديا مارتين بەددوينىڭ ايتۋىنشا، ەسىرتكىنىڭ اسەرى بولۋى كەرەك، ايسۇلتان نازاربايەۆتىڭ جاعدايى سول كەزدە وتە وتە اۋىر بولعان.

ءقازىر داريعا نازاربايەۆانىڭ  ۇلى   ەسىرتكىگە تاۋەلدىلىكتەن ارىلۋ ءۇشىن لوندونداعى ەمحانالاردىڭ بىرىندە ەكى-ۇش ايدان بەرى ەم الىپ جاتىر. وعان سوت ۇكىمى 18 قازاندا شىعاتىنى بەلگىلى بولدى.

ال قازاقستان تاراپى داريعا نازاربايەۆانىڭ ۇلىن  ەلگە قايتارۋدى سۇراعان كورىنەدى.