بايزاق اۋدانىنداعى ءال-فارابي اتىنداعى مادەنيەت ۇيىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ قازاقستان حالقىنا ارناعان جولداۋىنىڭ باسىم باعىتتارىن تۇسىندىرۋگە ارنالعان جيىن ءوتتى. وعان مادەنيەت سالاسىنىڭ ارداگەرلەرى، كلۋب جانە كىتاپحانا مەڭگەرۋشىلەرى، كىتاپحاناشىلار قاتىستى.

ايتۋلى شارانى اۋدان اكىمدىگى ىشكى ساياسات ءبولىمىنىڭ باسشىسى سالتانات يمانوۆا اشىپ، جولداۋدا كورسەتىلگەن نەگىزگى باعىتتارعا قىسقاشا توقتالدى. سالتانات بايتەلى قىزى مەملەكەت باسشىسى بەكىتىپ بەرگەن باستى مىندەتتەر - حالىقتىڭ ءال-اۋقاتىن جاقسارتۋعا باعىتتالعاندىعىن جەتكىزدى.

بۇدان ارى ءسوز العان سپيكەر، اۋدان اكىمدىگى مادەنيەت جانە تىلدەردى دامىتۋ ءبولىمىنىڭ باسشىسى ساكەن سىزدىقوۆ مەملەكەت باسشىسىنىڭ «سىندارلى قوعامدىق ديالوگ - قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىندا ايتىلعان ماڭىزدى باعىتتار: ينكليۋزيۆتى قوعام قۇرۋ، ءبىلىم بەرۋ، مەديسينالىق قىزمەتتىڭ قولجەتىمدىلىگى مەن ساپاسىن كوتەرۋ، شاعىن جانە ورتا بيزنەستى وركەندەتۋ، وتاندىق زەينەتاقى جۇيەسىن دامىتۋ، سىبايلاس جەمقورلىقپەن كۇرەس سىندى ماسەلەلەردى شەشۋ كوزدەلگەندىگىن باياندادى.

– پرەزيدەنت ءوزىنىڭ جولداۋىندا ەلىمىزدىڭ تاۋەلسىزدىگىن، ونىڭ ەكونوميكالىق الەۋەتى مەن ادام كاپيتالىن ودان ارى نىعايتۋ جانە حالىقتىڭ ءال-اۋقاتىن ارتتىرۋ ماڭىزدى ەكەندىگىن باسا ايتقاندىعىن العا تارتا وتىرىپ، الداعى جىلدان باستاپ، مادەنيەت قىزمەتكەرلەرىنىڭ، سونىڭ ىشىندە، كىتاپحانا، مۋزەي، تەاتر قىزمەتكەرلەرىنىڭ ەڭبەكاقىلارى كوتەرىلەتىندىگىنە ەكپىن سالدى. حالقىمىزدىڭ ماقتانىشتارى: ءال-فارابيدىڭ 1 150 جىلدىق، اباي قۇنانباي ۇلىنىڭ 175 جىلدىق مەرەيتويلارىن اتاپ ءوتۋ كەزىندە، ولاردىڭ ەڭبەكتەرىن حالىق اراسىندا دارىپتەۋدە جۇكتەلىپ وتىرعان مىندەتتىڭ اۋقىمدىلىعىن اڭگىمەلەدى. حالىقتى الدا تۇرعان ماقساتتارعا قول جەتكىزۋگە جۇمىلدىراتىن قۇجاتتىڭ ماڭىزدىلىعىن اتاپ ءوتتى.

پرەزيدەنتتىڭ: «ەلىمىزدەگى ەتنوستىق توپتاردىڭ ءتىلى مەن مادەنيەتىن دامىتۋعا جاعداي جاساي بەرەمىز. قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ، ۇلتارالىق قاتىناس تىلىنە اينالاتىن كەزەڭى كەلەدى دەپ ەسەپتەيمىن. ءبىراق مۇنداي دارەجەگە جەتۋ ءۇشىن ءبارىمىز داڭعازا جاساماي، جۇمىلا جۇمىس جۇرگىزۋىمىز كەرەك.

سونداي-اق، ءتىل ۇلكەن ساياساتتىڭ قۇرالى ەكەنىن دە ۇمىتپاعان ءجون» –دەگەن سوزىنە سۇيەنە وتىرىپ، ساكەن ءشامشى ۇلى ەل بىرلىگىن ساقتاۋ، ەتنوسارالىق تاتۋلىقتى نىعايتۋ باعىتىندا قولعا الىناتىن جۇمىستاردى باسا ايتتى.

جيىن بارىسىندا «پرەزيدەنت ۇسىنعان باعىتتاردى ىسكە اسىرۋدا قانداي قادامدار جاسايمىز؟» دەگەن ساۋال توڭىرەگىندە اڭگىمە ءوربىدى. بايزاق اۋىلدىق كلۋبىنىڭ مەڭگەرۋشىسى شىرىنكۇل توقبولاتوۆا قوعام مەن بيلىكتىڭ ءوزارا ىقپالداسقان ءىس-قيمىلىنىڭ وزەكتىلىگىن ايتسا، مادەنيەت ءۇيىنىڭ ادىسكەرى گۇلناز ءالىمقۇلوۆا مادەنيەت سالاسى وكىلدەرىنە كورسەتىلەتىن قامقورلىققا كوڭىلى تولاتىنىن جەتكىزدى. سونداي-اق كىتاپحاناشىلار دا قۇندى پىكىرلەرىن ورتاعا سالدى.