جامبىل وبلىسى، بايزاق اۋدانىنداعى ى.التىنسارين ورتا مەكتەبىندە «مەكتەپ فورماسى: وزەكتى ماسەلەلەر» تاقىرىبىندا اشىق اڭگىمە وتىرىسى ءوتتى، دەپ جازادى Qamshy.kz اقپارات اگەنتتىگى.
جاسىراتىنى جوق، بۇگىندە ءبىلىم جانە عىلىم مينيسترلىگىنىڭ مەكتەپ فورماسىنا قويىلاتىن تالاپتارى قوعامدىق پىكىرگە ءبىرشاما قوزعاۋ سالىپ وتىر. مەكتەپ فورماسى «ءبىلىم تۋرالى» زاڭ مەن ارنايى بۇيرىقتا «ءدىني اتريبۋتتار قولدانىلمايدى» دەگەن تالاپ قويىلعان. وسىعان سايكەس ءبىرىڭعاي مەكتەپ فورماسىن ەنگىزۋ قاراستىرىلعان. دەگەنمەن وڭىردەگى كەيبىر مەكتەپتەردە وقۋشى قىزداردىڭ وعان بوي ۇسىنباي، حيدجاب كيىپ جاتقاندارى كەزدەسەدى.
باسقوسۋعا اۋداندىق ءبىلىم ءبولىمىنىڭ ماماندارى، اقساقالدار كەڭەسىنىڭ، قامقورشىلار كەڭەسىنىڭ مۇشەلەرى، اتا-انالار كوميتەتىنىڭ ءتورايىمدارى، قۇقىق قورعاۋ ورگاندارىنىڭ وكىلدەرى مەن قوعامدىق بىرلەستىك ءتوراعالارى قاتىستى. شارادا العاش بولىپ ءسوز تىزگىندەگەن اۋداندىق ءبىلىم ءبولىمىنىڭ ادىسكەرى ينديرا سپانالييەۆا ۇرپاق تاربيەسىندە مەكتەپ فورماسىنىڭ الاتىن ورنى ەرەكشە ەكەندىگىنە توقتالدى. سونداي-اق ول وتكەن وقۋ جىلىندا اۋداندا مەكتەپتىڭ ىشكى جارعىلارىن 10 وقۋشى ساقتاماستان حيدجاب كيگەنىن جەتكىزدى. دەيتۇرعانمەن سالا ماماندارىنىڭ جۇمىستارىنىڭ ناتيجەسىندە ولاردىڭ 1ء-ى جەكەمەنشىك مەكتەپكە، 4ء-ى رەسەيگە قونىس اۋدارسا، قالعاندارى ءبىرىڭعاي مەكتەپ فورماسىن كيىپتى.
– قازاقستان رەسپۋبليكاسىنىڭ ءبىلىم جانە عىلىم مينيسترلىگى ورتا ءبىلىم بەرۋ ۇيىمدارى ءۇشىن مىندەتتى مەكتەپ فورماسىنا قويىلاتىن تالاپتاردى بەكىتۋ جونىندەگى بۇيرىقتى «دۇرىس» دەپ قابىلدايمىز. شىندىعىندا، بىرىزدىلىكتى مەكتەپ فورماسى بولۋى تالاپ ەتىلۋى ءتيىس. ويتكەنى، ونىڭ دا بەرەتىن تاربيەلىك ءمانى زور. بالالاردىڭ بىر-بىرىمەن تەڭ بولۋىنا، ءوزىن وقۋشى سەزىنۋىنە، تياناقتىلىققا، جاۋاپكەرشىلىك قاسيەتتەرگە باۋليدى. اۋداندا مەكتەپ فورماسىنا بايلانىستى اتا-انالارعا ەسكەرتۋ حاتتارى جولداندى. سونداي-اق اۋداندىق گازەتتە ارنايى ايدار اشىلىپ، وندا مەكتەپ فورماسىنىڭ قانداي بولۋى كەرەكتىگى جونىندە مالىمەتتەر كەلتىرىلىپ وتىردى. كوبىنە ءدىني اتريبۋتتارى بار فورمالار ەرەجەگە ساي كەلمەيتىندىگى بەلگىلى. سونىمەن قاتار كادىمگى بەلدەمشەلەردىڭ قىسقا بولۋى دا وزەكتى ماسەلەگە اينالىپ وتىر. بۇل تۇرعىدا ءبىز بەلدەمشەلەردىڭ تىزەدەن 2 سانتيمەتر تومەن بولۋىن تالاپ رەتىندە قويدىق، – دەيدى ي.سپانالييەۆا.
ءوز كەزەگىندە ى.التىنسارين اتىنداعى ورتا مەكتەپتىڭ ديرەكتورى قاناتبەك بايتەك ءبىلىم وشاعىندا ءدىني اتريبۋتتارى بار مەكتەپ فورماسىمەن ەكى وقۋشىنىڭ كەلگەنىن ايتىپ، مامانداردىڭ جۇيەلى جۇمىستارىنىڭ ارقاسىندا ولار ءبىرىڭعاي مەكتەپ فورماسىنا كوشكەنىن جەتكىزدى. جالپى ول باسقاراتىن مەكتەپتە 824 وقۋشى ءبىلىم الادى ەكەن. جاڭا وقۋ جىلى قارساڭىندا دەمەۋشىلەر 40 وقۋشىنى مەكتەپ فورماسىمەن قامتاماسىز ەتىپتى. سونداي-اق اۋداندىق قامقورشىلار كەڭەسىنىڭ ءتورايىمى ەلميرا سمايلوۆا وقۋشىلاردىڭ ءبىرىڭعاي فورما كيۋى قاجەتتىگىنە تىلگە تيەك ەتتى. ال وبلىستىق
«Aq jol» گازەتىنىڭ ءتىلشىسى ەسەت دوسالى يماندىلىق سىرت كەلبەتتەن ەمەس جۇرەكتەن بولاتىندىعىن العا تارتىپ، مەكتەپ تارتىبىنە باعىنۋ قاجەتتىگىن باسا ايتتى. جينالىسقا ارنايى كەلگەن «اسىل ارمان» ۇلتتىق ءداستۇر مەن ونەردى قولداۋ» قوعامدىق بىرلەستىگىنىڭ ءتوراعاسى رينات نۇراقبايەۆ مەكتەپ فورماسىنىڭ بىرىزدىلىكتىڭ جوعالۋىنىڭ سەبەبىن ۇلتتىق تاربيەنىڭ السىزدىگىنەن ەكەنىن ايتىپ، ءسالت-داستۇر مەن مادەنيەتتى ۇرپاق بويىنا ءسىڭىرۋ قاجەتتىگىن اتاپ ءوتتى.
باسقوسۋدا سونداي-اق وبلىستىق ءدىن ىستەرى باسقارماسىنىڭ ينسپەكتورى ارمان سارسەنبايەۆ وقۋشىنىڭ مەكتەپكە كەلگەندەگى باستى ماقساتى ءبىلىم الۋ ەكەندىگىن جانە ءبىلىم وشاعىنىڭ ىشكى تارتىپتەرىنە باعىنۋ قاجەتتىگىنە توقتالسا، اۋداندىق يۋۆەنالدىق پوليسيا ءبولىمىنىڭ وكىلى مەيىربەك جۇنىسبەكوۆ اتا-انالار زاڭعا باعىنباسا اكىمشىلىك جاۋاپكەرشىلىككە تارتىلاتىنىن باسا ايتتى.
