بۇۇ باس اسسامبلەياسىنىڭ 74ء-شى سەسسياسى اياسىندا مەملەكەت باسشىسى «Bloomberg» اقپارات اگەنتتىگىنىڭ نەگىزىن قالاۋشى ءارى يەسى مايكل بلۋمبەرگپەن كەزدەستى، دەپ حابارلايدى Qamshy.kz اقپارات اگەنتتىگى اقوردا سايتىنا سىلتەمە جاساپ.

كەزدەسۋ بارىسىندا تاراپتار قازاقستان مەن «Bloomberg» اقپارات اگەنتتىگى اراسىنداعى ىنتىماقتاستىقتىڭ كەلەشەگىن تالقىلاپ، الەمدىك ەكونوميكانىڭ كۇن تارتىبىندەگى وزەكتى ماسەلەلەرى جونىندە پىكىر الماستى.

قاسىم-جومارت توقايەۆ 25 قىركۇيەكتە نيۋ-يوركتە وتەتىن «Bloomberg» جاھاندىق بيزنەس-فورۋمىنىڭ ماڭىزدىلىعىن اتاپ ءوتتى. بۇل رەتتە، پرەزيدەنت الداعى ءىس-شارا جۇمىسىنا قازاقستاننىڭ اتىنان «استانا» حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ قاتىساتىنىن ايتتى.

سونداي-اق، مەملەكەت باسشىسى قاسىم-جومارت توقايەۆ مايكل بلۋمبەرگكە قازاقستاننىڭ ساۋدا-ەكونوميكالىق جانە ينۆەستيسيالىق مۇمكىندىكتەرى تۋرالى ايتىپ، امەريكالىق بيزنەسمەندى «استانا» حالىقارالىق قارجى ورتالىعىمەن بەلسەندى ىنتىماقتاستىق ورناتۋعا شاقىردى.

مايكل بلۋمبەرگ كەزدەسۋگە مۇمكىندىك تۋعىزعانى ءۇشىن قازاقستان پرەزيدەنتىنە العىس ءبىلدىرىپ، قازاقستاندىق ارىپتەستەرىمەن ءوزارا ءتيىمدى ىنتىماقتاستىقتى ىلگەرىلەتۋگە دايىن ەكەنىن جەتكىزدى.

كەزدەسۋ سوڭىندا قاسىم-جومارت توقايەۆ مايكل بلۋمبەرگتى قازاقستانعا ساپارمەن كەلۋگە شاقىردى.