"اتامەكەن" ۇلتتىق كاسىپكەرلەر پالاتاسىنىڭ باسقارما ءتوراعاسى ابىلاي مىرزاحمەتوۆ پرەزيدەنتتىڭ قاتىسۋىمەن وتكەن ۇلتتىق قوعامدىق سەنىم كەڭەسىنىڭ وتىرىسىندا ايەلدەردىڭ زەينەت جاسىن تومەندەتۋ يدەياسى ايتىلعانىن ەسكە سالدى، دەپ جازادى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

مىرزاحمەتوۆ تەك زەينەت جاسىن تومەندەتۋمەن جۇيەنىڭ پروبلەمالارىن شەشۋ مۇمكىن ەمەس ەكەنىنە سەنىمدى. ونى تولىق رەفورمالاۋ كەرەك.

"پرەزيدەنت ۆيسە-پرەمەر ساپاربايەۆتىڭ باسشىلىعىمەن توپ قۇرۋدى تاپسىردى. ءبىز بارلىق تولەمدى ءبىرىڭعاي الەۋمەتتىك سالىققا بىرىكتىرىپ، ونىڭ ستاۆكاسىن تومەندەتۋدى ۇسىنامىز. سەبەبى ءقازىر جالاقىعا ۇلكەن سالماق ءتۇسىپ جاتىر"، - دەدى مىرزاحمەتوۆ.

سونداي-اق، ۇلتتىق كاسىپكەرلەر پالاتاسى باسقارما ءتوراعاسىنىڭ پىكىرىنشە، وسى سالانىڭ بارلىق رەفورماسى جان-جاقتى تەكسەرىلگەن بولۋى ءتيىس. سەبەبى ءقازىر مەملەكەتتىڭ حالىق الدىنداعى الەۋمەتتىك مىندەتتەمەلەرى از ەمەس.