نۇر-سۇلتان قالاسى اكىمىنىڭ ورىنباسارى باقتيار ماكەن اتىشۋلى كەزدەسۋدە نەگە اۋىر ءسوز ايتقانى، بەلسەندى انالارعا باسپانانىڭ كەزەكسىز بەرىلەتىن-بەرىلمەيتىنى جانە باسقاسى جايىندا سۇقبات بەردى، دەپ حابارلايدى Qamshy.kz اقپارات اگەنتتىگى inbusiness.kz سايتىنا سىلتەمە جاساپ.

– كوپ بالالى انالارعا دوق كورسەتتىڭىز دەپ الەۋمەتتىك جەلى شۋلاپ جاتىر. ءسىز جابىق ەسىك جاعدايىندا وتەتىن حالىقپەن بارلىق كەزدەسۋلەردە ءوزىڭىزدى وسىلاي ۇستايسىز با؟ 

– ەموسيالار بولدى، ءبىراق ول ەموسيالار زاڭ تالاپتارىنا قاتىستى بولدى دەپ ويلايمىن. نۇر-سۇلتان قالاسىندا 47 مىڭداي ادام باسپانا كەزەگىندە تۇر. جالعىزباستى انالار بار، زەينەتكەرلەر بار. ولاردى الداپ، تەك شۋلاعاندارعا زاڭسىز ءۇي بەرە المايمىن. ارينە، ول انالاردىڭ دا قاسىرەتىن تۇسىنەمىز، ولار دا سۇراعىسى كەلەدى. ءبىراق مەن زاڭسىز بەرە المايمىن عوي. ولاردىڭ تالابى زاڭسىز ەكەنىن كورىپ وتىرسىز عوي. الەۋمەتتىك جەلىلەردەن بايقاپ جۇرگەن شىعارسىزدار، كوپتەن الاڭعا شىعا بەرۋى دە زاڭسىز.

– ءسىزدى سونشا اشىندىرعان قاي ءسوز؟

– مەن ونى ايتقىم كەلمەيدى. ول جەكە باسىما ءتيىستى. ءبىراق مەن ەر ادام، ول ايەل ادام بولعاننان كەيىن، كەشىرىم سۇرادىم. سەبەبى بۇل مەنىڭ ەر ازامات رەتىندەگى مىندەتىم دەپ سانايمىن. باستاپقىدا مەن دە شىدام تانىتىپ، ولاردى ءبىراز تىڭدادىم. الايدا ولار ەموسياعا بوي ۇرىپ كەتكەندىكتەن، مەن دە سول اسەرگە بەرىلىپ كەتسەم كەرەك. ەندى نەشە ءتۇرلى سوزدەر ايتقاندا، ادامنىڭ شىدامى دا تاۋسىلادى عوي. تۇسىنىڭىزدەرشى. بۇل كىسىلەرمەن دە الدىندا كەزدەسكەنبىز. سودان بەرى كوپ ءسوز جينالدى. مەنىڭ دە انام بار، ول دۇنيەدەن ءوتىپ كەتكەن. مۇنىڭ الدىندا دا مەنىڭ اناما جامان-جامان، جاعىمسىز سوزدەر ايتقاننان كەيىن، ادامنىڭ ءتوزىمى تاۋسىلادى. بۇل ءار ەر-ازاماتقا قيىنعا تۇسەدى.

– مۇنىڭىز مەملەكەتتىك قىزمەتشى ەتيكاسىنا ساي كەلەدى دەپ ويلايسىز با؟ ولاي بولماسا، كەتۋگە تۋرا كەلەدى ەمەس پە؟

– مەملەكەتتىك قىزمەتشى ەتيكاسى دەگەندە، مەنىڭ تاراپىمنان دا كەمشىلىكتەر بولدى. بۇل حالىققا قاتتى رەنجىگەنىم ەمەس. بۇل – مەنىڭ جۇمىسىم. اكىمدىكتە وتىرعاسىن، جەرگىلىكتى ازاماتتارمەن بىرگە جۇمىس ىستەپ، ءتيىستى شارالاردى قابىلداۋعا ءتيىسپىن. ال ءبىراق تۇرعىندار زاڭسىزدىققا بارۋدى تالاپ ەتسە، ونى جاساي المايمىن.

– بەينەروليكتە ايتقان سوزدەرىڭىزدەر قايتپايسىز با سوندا؟ مىسالى، «اقوردانىڭ الدىنا بارام دەسەڭدەر بارا بەرىڭدەر» دەدىڭىز.

– اقورداعا قاتىستى ول ادامنىڭ ءوزى ايتىپ جاتقانى عوي. مەن ونداي سوزدەرىمنەن قايتپايمىن دەگەن جوقپىن. ەكى ادام اراسىنداعى ۇرىستاعى ەموسيا بولدى. سودان اۋزىمنان شىعىپ كەتكەن شىعار. ءبىراق ونداعى ايتقاندارىم ەلىمىزدەگى كوپبالالى بارلىق انالارعا قاتىستى ەمەس. جەكە سول اداممەن ارامىزداعى قارىم-قاتىناسىمىز. بارلىق كوپبالالى اناعا كىر كەلتىرگىم كەلمەيدى. ۆيدەودان وزدەرىڭىز دە بايقادىڭىزدار عوي، مەن ولاردى وتىرىپ، كونسترۋكتيۆتى تۇردە سويلەسۋگە، اقىلداسۋعا شاقىردىم. الايدا جاۋاپ رەتىندە كەيبىرى بوتەلكە لاقتىرادى. بۇكىل شەنەۋنىككە تيىسەدى. ونىڭ الدىندا ستاكانداردى لاقتىردى. قولدى دا كەسىپ كەتكەنى بولدى.

– ءسىز بەينەجازبادا وسى انالارعا باسپانا اپەرۋ ءۇشىن دەمەۋشىلەرمەن كەلىسسوزدەر جۇرگىزىپ جاتقانىڭىزدى ايتتىڭىز. دەمەۋشىلەر 47 مىڭ ادامعا تەگىس ءۇي اپەرە المايدى. سوندا دەمەۋشىلەر تەك وسى بەلسەندىلەرگە عانا ساتىپ اپەرە مە؟

– جوق، مەن دەمەۋشىلەر وسى بەلسەندىلەرگە اپەرەدى دەگەن جوقپىن. ءدال ءقازىر باسپاناعا مۇقتاج ادامدار بار. ولار باسپاناسىز دالادا قالعان. سولارعا قاتىستى ءبىز دەمەۋشىلەردەن كومەك سۇرايمىز. ال مەملەكەت زاڭسىز بەرە المايدى. ونىڭ ۇستىنە مەن بۇل جۇمىسقا زاڭ شىعارۋشى بيلىكتەن كەلدىم.

– اقش-تا، دامىعان ەلدەردە ءوز ەموسياسىنا ەرىك بەرە بەرەتىن شەنەۋنىكتەردى شەتتەتىپ، «ەموسيانى باسقارۋ» كۋرسىنان وتۋگە جىبەرەدى. ءسىز بۇل جاعداي قايتالانبايدى دەپ ۋادە ەتە الاسىز با؟

– بولاشاقتا ەموسياعا ەرىك بەرمەۋگە تىرىسامىن. انالار تالابىن دا ەسكەرەمىن.

– اكىمدىككە كىرەتىن كەلۋشىلەردىڭ بارلىعىنان ۇيالى تەلەفوندارىن تاپسىرۋ تالاپ ەتىلەدى. وندا ءسىزدى ماسقارالايتىن ۆيدەونى سوندا كىم تۇسىرگەن؟

– بىلمەيمىن!

جانات ارداق 

♦ "ماعان دەسە، اسىلىپ قالسىن": ەلوردا اكىمىنىڭ ورىنباسارى اقورداعا بارعان انالارعا اشۋلى (ۆيدەو)