قازاقستان ىسكەر ايەلدەر قاۋىمداستىعىنىڭ پرەزيدەنتى راۋشان سارسەمبايەۆا كوپبالالى جانە از قامتىلعان انالاردى قولدايتىن مەملەكەتتىك باعدارلامالار تۋرالى پىكىرىمەن ءبولىستى، دەپ حابارلايدى Qamshy.kz اقپارات اگەنتتىگى قازاقپاراتتىڭ دەرەگىن نەگىزگە الىپ.

راۋشان سارسەمبايەۆانىڭ ايتۋىنشا، قاۋىمداستىقتا كوپبالالى انالارعا ارنالعان «جاردەم» رەسپۋبليكالىق باعدارلاماسى ىسكە قوسىلعان. الايدا بۇل باعدارلاماعا قاتىسۋعا انالار بەلسەندىلىك تانىتپاي وتىر.

«ءبىز ەڭبەك نارىعىندا سۇرانىسقا يە ماماندىقتار بويىنشا تەگىن وقىتامىز: اسپاز، ناۋبايشى، سۇلۋلىق مامانى، تىگىنشى. الماتىدا «باقىتتى وتباسى» ورتالىعى ارقىلى 120 ورىن ۇسىندىق، وندا ءبىز ايەلدەردى وقىتىپ، سول جەردە جۇمىسقا ورنالاستىردىق. وكىنىشكە قاراي، بىزدە وقىعىسى كەلەتىن ادامداردىڭ ءتىزىمى جوق. كوپبالالى انالاردىڭ وزدەرى ءارتۇرلى سىلتاۋ ايتادى. ءبىرىنىڭ بالالارىن تاستايتىن جەرى بولماسا، ەندى ءبىرى ۋاقىتىنىڭ جوقتىعىن العا تارتادى. ءبىز نۇر-سۇلتاندا ەكى اسپاز جانە ەكى تىگىنشىنى دايىنداپ وقىتتىق. ءبىز ولارعا ءوز ىسىمەن اينالىسۋ ءۇشىن باسەكەگە قابىلەتتى ورىنداردا ۇيرەنىپ، كەيىن سول جەردە جۇمىس ىستەۋگە جاعداي جاسادىق. تىگىنشى ماماندىعى بويىنشا وقىعىسى كەلەتىن 16 ادام تىركەلدى. ونىڭ 8 راستالدى، وقۋعا 2 ادام كەلدى. بيزنەستى ۇيرەتۋگە دايىنبىز، ءبىز ولاردى تەگىن وقىتىپ، تۇراقتى جۇمىسقا ورنالاستىرۋعا ءازىرمىز. بىزگە تەك الماتىدان عانا قاۋىمداستىق مۇشەلەرىنەن 120 ورىن قاجەت، ءبىراق ولار قىزىعۋشىلىق تانىتىپ وتىرعان جوق»، - دەدى سپيكەر.

سونىمەن بىرگە ول قازاقستاندىق وتباسىلارعا تولەنەتىن اتاۋلى الەۋمەتتىك كومەك (ااك) تۋرالى ايتتى. راۋشان سارسەمبايەۆا اتاپ وتكەندەي، «ااك قاراپايىم وتباسى مۇشەلەرىنىڭ تابىسىنا بايلانىستى بولعاندىقتان، بۇل تاۋەلدى كوڭىل-كۇي تۋعىزادى، ايەلگە جۇمىس ىستەمەي-اق مەملەكەتتەن بەرىلەتىن جاردەماقىنى الىپ وتىرعان ىڭعايلى».

«كوپبالالى انالار ااك الۋعا دايىن، ءبىراق بۇل وتباسىنىڭ تابىسىنا بايلانىستى. ايەلدەر جۇمىس ىستەگەن جەرىنەن كەتەدى، ويتكەنى ەگەر ايەل ءبىر جەردە جۇمىس ىستەپ، ءتورت بالاعا 90 مىڭ السا، ااك ودان كوبىرەك. سوندىقتان ولار ۇيدە وتىرعاندى ءجون كورەدى. ولار كۇيەۋىنىڭ تابىسىن جاسىرۋ ءۇشىن اجىراسۋعا دەيىن بارادى. ااك-نىڭ تابىسقا بايلانۋى ءبىز كورىپ وتىرعان جاعىمسىز جايتتارعا الىپ كەلدى. ايەل جۇمىس ىستەگىسى كەلەتىن شىعار، ءبىراق وعان ااك الۋ ءتيىمدى. بىرىنشىدەن، مەملەكەتتىك قۇرىلىمدارعا ااك-تى وتباسى تابىسىمەن بايلانىستىرۋدى الىپ تاستاۋ قاجەت. ءبىز ادامداردى وقىتىپ، جۇمىسقا تۇرعىزا الماي وتىرمىز. ولار اتاۋلى الەۋمەتتىك كومەكتەن قاعىلامىز دەپ قورقادى «، - دەيدى راۋشان سارسەمبايەۆا.

ەسكە سالايىق، ق ر پرەمەر-مينيسترىنىڭ ورىنباسارى بەردىبەك ساپاربايەۆ كوپبالالى انالارمەن كەزدەسۋ بارىسىندا ااك-تى شىنىمەن مۇقتاج وتباسىلار الۋى كەرەك ەكەنىن باسا ايتتى. الماتىدا 1300-دەن استام كوپبالالى وتباسىعا تولەم توقتاتىلدى، ايىنا 83 ميلليون تەڭگە دۇرىس تولەنبەگەنى انىقتالدى.