بۇۇ سەكرەتارياتىنىڭ بارلىق قىزمەتشىسىن اس-سۋمەن قامتاماسىز ەتۋشى شەف-اسپاز دەن لوپەس جىل سايىن قىركۇيەكتە باس اسسامبلەيانىڭ سەسسياسىنا قاتىسۋعا كەلەتىن مەملەكەت باسشىلارى مەن ۇكىمەت مۇشەلەرىنە تۇسكى اس دايىنداۋ قالاي جۇرەتىنىمەن ءبولىستى، دەپ جازادى Qamshy.kz اقپارات اگەنتتىگى un.org سايتىنداعى دەرەكتى نەگىزگە الىپ.
دەن لوپەستىڭ ايتۋىنشا، ءبىر لانچتى ازىرلەۋدىڭ ءوزى ونىڭ كۇندەلىكتى جۇمىسىنان كوپ كۇشتى قاجەت ەتەدى ەكەن.
"170-190 مەملەكەتتىڭ باسشىلارىن تاماقتاندىرعاننان 4 مىڭ ادامعا قىزمەت ەتكەن اناعۇرلىم جەڭىلىرەك شىعار. ويتكەنى ادەتتە مۇنداي قاتاڭ قاۋىپسىزدىك جۇيەسى ەش جەردە جوق" – دەيدى ول.
اسپاز پروتوكول قىزمەتىنىڭ نۇسقاۋلىعىن ساقتاپ قانا ءتۇرلى كۋلينارلىق داستۇرلەردى ۇستاناتىن مەملەكەت باسشىلارىنىڭ كوڭىلىنەن شىعۋعا بولاتىنىن ايتادى.
"مەنىڭ مىندەتىم – تىسكەباسارلار، نەگىزگى تاعام مەن دەسەرتتەردىڭ بىرنەشە ءتۇرىن ازىرلەۋ. پروتوكول قىزمەتكەرلەرى شاراپ پەن تاعامداردىڭ ءدامىن تاتىپ، لانچقا نە ۇسىنۋ كەرەكتىگىن شەشەدى. مۇنداعى پرەزيدەنتتەر نەگىزىگەن كلاسسيكالىق فرانسۋز اسحاناسىن قۇپ كورەدى. بىردە ءبىز veal en papillote، chicken mousseline، فۋا-گرا جاساعانىمىز بار. سونداي-اق مەملەكەت باسشىلارى قوي، بۇزاۋ ەتىن، ومىرتقانىڭ كەسەك ەتىن اسا ۇناتادى، – دەيدى اسپاز.
دەگۋستاسيا كەيدە ءتورت ساعاتقا دەيىن سوزىلاتىن كەزدەر بولادى ەكەن. اراسىندا تالعامپاز جاندار ءۇشىن ديەتالىق تاعامدار جاساۋعا دا تۋرا كەلەدى. بالىقتان جاسالعان، ەتسىز تاماق سۇرايتىندار دا از ەمەس كورىنەدى.
ءتۇرلى ۇلت وكىلىنىڭ كوڭىلىن تابۋ ءۇشىن اسپازدارعا سول ەلدىڭ اسحاناسىن ءبىلۋ اسا ماڭىزدى. دەن لوپەس يتاليا، فرانسيا، بەلگيا، جۇڭگو جانە تاعى باسقا كوپتەگەن ەلدە بولعان. بۇۇ قابىرعاسىندا دا ءار ەلدىڭ كۋلينارلىق داستۇرلەرىن ۇيرەنۋگە مۇمكىندىك مول. مۇندا ءتۇرلى ەلدەردىڭ ۇكىمەتى ۇلتتىق تاعامدار اپتالىعىن وتكىزىپ تۇرادى.
قىركۇيەكتەگى پرەزيدەنتتىك تۇستىكتەرگە ازىرلىك قاڭتار ايىنان باستالادى. جاڭا ءمازىر جاسالىپ، ماۋسىمدا تاعامداردىڭ ءتىزىمى تۇسىلەدى. شىلدە سوڭىنا تامان سوڭعى شەشىم قابىلدانادى. تاماقتاردى ەكى كۇن بۇرىن جاساپ باستايدى. ازىق-تۇلىك تيەگەن جۇك كولىكتەرى تەك تاڭعى ءتورت پەن التى ارالىعىندا عانا كىرگىزىلەدى.
جوعارى دەڭگەيدەگى تۇسكى استاردى ۇيىمداستىرىپ جۇرگەنىنە 20 جىل بولعان فەرناندو باركين باس اسسامبلەيانىڭ سەسسياسى تۇتاس جىلداعى ەڭ ماڭىزدى ءارى كوپ قوبالجىتاتىن ءسات ەكەنىن ايتادى. بۇۇ عيماراتىندا تۇنەگەن كەزدەرى دە از بولماپتى. ونداي شاقتاردا فەرناندو جۋىنىپ-شايىنىپ، كوفە ءىشۋ ءۇشىن ۇيىنە بارۋعا زورعا ۋاقىت تابادى.
قاۋىپسىزدىك شارالارى جاعىنان اقش پرەزيدەنتىنىڭ كۇزەتى ەڭ اسا قاتال بولىپ كەلەدى.
قىزمەت كورسەتۋشى كوماندا مۇشەسى موحامەد ماحار قىزمەت ەتكەن پرەزيدەنتەرىنىڭ سانىنان جاڭىلىپ قالعانىن ايتادى. ول ۇلكەن بۋشتان باستاپ، ترامپقا دەيىنگى پرەزيدەنتتەردىڭ بارىندە وسى ءىستىڭ باسى-قاسىندا جۇرگەن. "كلينتوننىڭ جۇڭگو باسشىسى مەن بۇۇ باس حاتشىسىمەن ازىلدەسىپ وتىراتىنى ەسىمدە قالىپتى. اڭگىمەگە اراسىندا ءبىز دە قوسىلاتىنبىز" دەپ ەسكە الادى ول.
موحامەدتىڭ باستى قىزمەتى – داياشىلار جۇمىسىن ۇيىمداستىرۋ، تاماقتاردىڭ ۋ-شۋسىز اكەلىنۋىن، قۇرمەتتى قوناقتارعا شاراپ پەن تىسكەباسارلاردىڭ ۋاقىتىلى ۇسىنىلۋىن قامتاماسىز ەتۋ.
نيۋ-يوركتە ءوتىپ جاتقان بۇۇ باس اسسامبلەياسىنىڭ 74 سەسسياسىنا بيىل دا 100-دەن استام مەملەكەت باسشىسى قاتىسىپ جاتىر. سولاردىڭ اراسىندا قازاقستان پرەزيدەنتى قاسىم-جومارت توقايەۆ تا بار.
پىكىر قالدىرۋ