جۇڭگو توڭىرەگىندەگى ەلدەرگە ەشقانداي زيانىن تيگىزبەيدى. كەشە نۇر-سۇلتان قالاسىندا وتكەن ەۋرازيا ەلدەرى پارلامەنتى ءتوراعالارىنىڭ 4ء-شى كەڭەسىندە كورشى ەلدەن كەلگەن دەلەگات وسىنداي پىكىر ءبىلدىردى دەپ جازادى Qamshy.kz اقپارات اگەنتتىگى ەۋرازيا ارناسىنىڭ دەرەگىن نەگىزگە الىپ. 

ەۋرازيا قۇرلىعىنداعى پارلامەنت ءتوراعالارىنىڭ كەڭەسى بيىل نۇر-سۇلتاندا تۇڭعىش رەت وتكىزىلدى. العاش رەسەيدە، ودان كەيىن كورەيادا، بىلتىر تۇركيادا، مىنە بيىل قازاقستاندا ۇيىمداستىرىلۋدا.

4ء-شى كەڭەستىڭ تاقىرىبى — «ۇلكەن ەۋرازيا:ديالوگ. سەنىم. سەرىكتەستىك».  بۇل تاقىرىپ تەگىن تاڭدالعان جوق. سەبەبى، قازاقستان استاناسىندا وتكەن سيريا كەلىسسوزدەرىنىڭ ناتيجەسىن ءدۇيىم ەل كورىپ وتىر. ءدال سول سياقتى، بىر-بىرىمەن ءدۇرداراز ەلدەردىڭ اراسىنا دا اراعايىندىق كەرەك. قوس قۇرلىقتى جالعاپ جاتقان قازاقستانعا كەلگەن قوناقتاردىڭ  كوكەيىندەگى تۇيتكىل وسى.

"ءبىز الەمدەگى بەيبىتشىلىكتى باعالايمىز ءارى ەلىمىزدىڭ بارلىق كورشىلەرىمەن تەڭ جانە دوستىق قارىم-قاتىناستى ورناتىپ كەلەمىز. سونداي-اق، توڭىرەگىمىزدەگى  باي بولسىن، كەدەي بولسىن، بارلىق ەلدىڭ قۇندىلىقتارى مەن تاۋەلسىزدىگىنە قۇرمەتپەن قاراپ، ولارعا ەشكىم قىسىم جاساپ، زيانىن تيگىزبەسە ەكەن دەيمىز"، - دەدى بۇكىلقىتايلىق حالىق وكىلدەرى جينالىسىنىڭ كوميتەت ءتوراعاسى لي چجانشۋ. 

ءقازىر دەپۋتات بولۋ وڭاي ما، قيىن با بىلمەيمىز. ءبىراق ولارعا جۇكتەلەر مىندەت زور. سەبەبى، ول زاڭ شىعارۋشى ورگاننىڭ وكىلى. ال زاڭ شىعارۋ ءۇشىن ەل ىشىندەگى، الەمدەگى احۋال ەسكەرىلۋى كەرەك.  نۇرسۇلتان نازاربايەۆ تا "پارلامەنتارييلەردىڭ داۋىسى ەۋرازيا كونتينەنتىندە قاتتىراق شىعۋى كەرەك" دەگەن پىكىر ايتتى.  وكىنىشكە وراي، بىزدە  كونتيتەنت تۇرماق،  كامەرا كورسە قاشاتىن، ۇندەمەيتىن دەپۋتات كوپ.