تاۋەلسىزدىك العالى بەرى قازاقستاندا كەدەيلىكتىڭ دەڭگەيى 10 ەسە تومەندەدى. بۇل تۋرالى ەلباسى نۇرسۇلتان نازاربايەۆ كەشە ەۋرازيالىق ەكونوميكالىق وداققا مۇشە ەلدەردىڭ ەلوردادا وتكەن پارلامەنت سپيكەرلەرىنىڭ IV كەڭەسىندە ءمالىم ەتتى.

تۇڭعىش پرەزيدەنت قازاقستاندا ينفلياسيا 3 مىڭ پايىزعا جەتكەن تۇستا ەلدىڭ تاۋەلسىزدىك  العانىن، ال دۇكەندەردە الاتىن تۇك قالماي، سورەلەر بوس بولعانىن تىلگە تيەك ەتتى.

–بارلىق ءوندىرىس ورىندارى توقتادى، ەلدە جۇمىسسىزدىق جايلادى، ءتىپتى زەينەتاقى مەن جالاقىنى تولەۋ مۇمكىن بولمادى. ءبىراق ءبىز نارىقتىق ەكونوميكانى قۇرىپ، بۇل جولدان امان-ەسەن وتتىك. بۇگىنگى تاڭدا ەلدىڭ جالپى ىشكى ءونىمى 18 ەسە ءوستى. ەكونوميكانىڭ كولەمى ورتا ازيا ەلدەرىنىڭ جالپى ىشكى ءونىمى دەڭگەيىنەن ەكى ەسە جوعارى. دوللارمەن شاققاندا، حالىقتىڭ تابىسى 9 ەسە ارتتى، ال كەدەيلىكتىڭ دەڭگەيى 10 ەسە تومەندەدى، –دەدى ەلباسى نۇرسۇلتان نازاربايەۆ.  

ەلباسىنىڭ ايتۋىنشا، سوڭعى 20 جىلدا سىرتتان تارتىلعان تىكەلەي شەتەل ينۆەستيسياسى 320  ميلليارد دوللارعا جەتتى. بۇل سالا بويىنشا ەلىمىز ايماقتا ءبىرىنشى ورىندى بەرمەي تۇر.