الماتى اكىمدىگىنىڭ باسپا ءسوز ورتالىعىندا وتكەن بريفينگتە ەكىنشى دەڭگەيلى بانكتەر مەن ميكروقارجىلىق ۇيىمداردا كەپىلسىز تۇتىنۋشىلىق نەسيەلەر بويىنشا بورىش جۇكتەمەسىن ازايتۋعا كىمنىڭ قۇقى بار جانە ول ءۇشىن «قارا تىزىمگە ءىلىنۋى» مۇمكىن بە دەگەن ساۋالدار توڭىرەگىندە اڭگىمە ءوربىدى، جازادى almaty.gov.kz سايتى.

ەڭبەك، الەۋمەتتىك قورعاۋ جانە كوشى-قون كوميتەتىنىڭ الماتى قالاسى بويىنشا دەپارتامەنتىنىڭ باسشىسى ايدىنجان نارماتوۆ ق ر پرەزيدەنتىنىڭ «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىعىنا سايكەس ەكىنشى دەڭگەيلى بانكتەر مەن ميكروقارجىلىق ۇيىمداردا كەپىلسىز تۇتىنۋشىلىق نەسيەلەر بويىنشا قارىزداردىڭ بىررەت كەشىرىلەتىنىن ايتتى.

ەرەجە ازاماتتاردىڭ مىنا بەس ساناتىنا قاتىستى:

1) كوپبالالى وتباسىلار؛

2) اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار؛

3) مۇگەدەك بالالارى بار جانە 18 جاستان اسقان بالا كەزىنەن مۇگەدەك بالالارى بار وتباسىلار؛

4) اتاۋلى الەۋمەتتىك كومەك الاتىن وتباسىلار؛

5) جەتىم بالالار، كامەلەتتىك جاسقا تولعانعا دەيىن اتا-اناسىنان ايىرىلعان، اتا-اناسىنىڭ قامقورلىعىنسىز قالعان 29 جاسقا تولماعان بالالار.

جالپى بەرەشەگى 2019 جىلعى 1 ماۋسىمداعى جاعدايعا ساي ءۇش ميلليون تەڭگەدەن اسپاۋى ءتيىس. ءبىر قارىز الۋشىعا 2019 جىلعى 1 ماۋسىمداعى جاعداي بويىنشا نەگىزگى بورىشى مەن وعان ەسەپتەلەتىن سىياقىدان تۇراتىن وتەلەتىن بەرەشەگىنىڭ مولشەرى 300 مىڭ تەڭگە بولعانى ءجون.

بۇل ساناتتاعى ازاماتتار بەرەشەگىنىڭ وتەلۋى ولاردىڭ قارجىلىق تابىسىنا ەش قاتىسى جوق.

«مىسالى، ااك الاتىن وتباسى جالپى سوماسى 2،5 ميلليون تەڭگە بولاتىن ەكى تۇتىنۋشىلىق نەسيە الىپ، ونى تەك وتباسىنىڭ ءبىر مۇشەسىنە راسىمدەگەن. بۇل جاعدايدا جالپى سوماسى 300 مىڭ تەڭگە بولاتىن ەكى نەسيە دە وتەلەدى. ەگەر وتباسى مۇشەلەرىنىڭ بىرنەشەۋى نەسيە السا، ياعني نەسيەنىڭ كەلىسىم شارتى ءار ادامنىڭ اتىنا جاسالسا، وندا بورىش ءار نەسيە شارتى بويىنشا وتەلەدى ماسەلەن، وتباسىنىڭ ءۇش مۇشەسىنە ءۇش نەسيە راسىمدەلسە، وندا ءاربىر كەلىسىم شارت بويىنشا 300 مىڭ تەڭگەگە دەيىنگى بورىشتارىن وتەۋگە قۇقىلى. ياعني، وتباسىنىڭ ءۇش مۇشەسىنىڭ قارىزىنىڭ جالپى سوماسى 900 مىڭ تەڭگەگە دەيىن بولۋى ءتيىس»، – دەپ جاۋاپ بەردى ا. نارماتوۆ.

ق ر ۇلتتىق بانكتىڭ الماتى فيليالى ديرەكتورىنىڭ ورىنباسارى گۇلنار شەمەتوۆا ءوزىنىڭ سوزىندە ق ر ەڭبەك جانە حالىقتى الەۋمەتتىك قورعاۋ مينيسترلىگى بەرگەن ءتىزىم نەگىزىندە بانكتەر مەن ميكرو قارجىلىق ۇيىمدار ءبىرىنشى باعىت بويىنشا 507363 ازاماتتىڭ نەگىزگى جانە سىياقىلىق 105147،8 ملن. تەڭگە قارىزىن وتەدى، ونىڭ ىشىندە الماتى قالاسى بويىنشا 115 998 ازاماتتىڭ جالپى سوماسى 18 380 ملن تەڭگە بولاتىن قارىزى كەشىرىلدى. سونىمەن قاتار، 263 527 ازاماتتاردىڭ بانكتەر مەن ميكروقارجىلىق ۇيىمدارداعى جالپى سوماسى 32 024 ملن تەڭگە بولاتىن بورىشى تولىق وتەلدى.

ەدب مەن مقۇ ەكىنشى باعىت بويىنشا بيىلعى جىلدىڭ 30 شىلدەسىندە اعىمداعى جىلدىڭ 1 شىلدەسىندەگى جاعداي بويىنشا ازاماتتار بورىشتارىنىڭ ءوسىمپۇلدارى مەن ايىپپۇلدارىن الىپ تاستادى.

كورسەتىلگەن قولداۋ سوماسى 33 ملرد تەڭگەدەن ( 1،2 ملن جۋىق ازاماتتار) استى، ونىڭ 70 %-ى نەمەسە 24 ملرد تەڭگە وتەلدى (كەشىرىلدى) كرەديتورلاردىڭ جەكە قارجىلارى ەسەبىنەن، قالعان 30 % نەمەسە 10،1 ملرد تەڭگە اعىمداعى جىلدىڭ 20 تامىزىنا دەيىن ۇلتتىق بانك ەسەبىنەن وتەلەتىن بولادى.

الماتى قالاسى بويىنشا 248400 ازاماتتىڭ جالپى سوماسى 7120،62 ملن تەڭگە بولاتىن نەسيەسىنىڭ ءوسىمپ ۇلى مەن ايىپپ ۇلى الىنىپ تاستالدى.

«ەگەر ازامات جىل اياعىنا دەيىن ءوزىنىڭ بەس ساناتتاعىلار قاتارىنا جاتاتىن قۇجاتىن كورسەتسە، وندا ءتىزىم قايتا جاسالادى. ياعني، 2019 جىلدىڭ 1 شىلدەسىنە دەيىن نەسيە العاندار وشىرىلەدى. ايتا كەتەرلىگى، مەملەكەت قارىزىن وتەگەندەر «قارا تىزىمگە» ىلىنبەيدى. جەكە تۇلعالاردىڭ قارىزدارى ءۇشىنشى جاقتان وتەلەدى. بۇل تەرىس فاكتور بولىپ ەسەپتەلمەيدى. جانە بولاشاقتا ازاماتتىڭ نەسيە الۋىنا ەش كەدەرگى كەلتىرمەيدى»، – دەپ اتاپ ءوتتى گ. شەمەتوۆا.

نەسيەلىك قارزىدار كەزەك بويىنشا كەشىرىلەدى. ەڭ الدىمەن جوعارى جىلدىق ءتيىمدى سىياقى العان قارىزدار وتەلەدى. ەكىنشى كەزەكتە نەگىزگى قارىزى كوپ ەمەس نەسيەلەر كەشىرىلەدى. ءۇشىنشى كەزەكتە قارىز الۋدى ەرتە راسىمدەگەندەردىڭ بورىشى الىنادى.

ناقتىلى اقپاراتتى ەڭبەك جانە حالىقتى الەۋمەتتىك قورعاۋ مينيسترلىگىنىڭ Facebook-تاعى (https://www.facebook.com/103633851027565/) جانە Instagram-داعى (https://www.instagram.com/p/B2O33d9Ag_U/؟igshid=1a5ciudmyf0wk) اككاۋنتتارىنان الۋعا بولادى.

بورىش جۇكتەمەسى ازايتۋعا مۇددەلى ازاماتتار ءوزىنىڭ قاي ساناتقا جاتاتىندىعىن بىلايشا بىلە الادى: ( nws6.enbek.kz/kk/status-check كىرۋ ارقىلى).

- ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي ينتەرنەت-رەسۋرسىنان: http://www.enbek.gov.kz/ru/node/363149 بويىنشا، ول ءۇشىن جسن ەنگىزىپ، ءوتىنىش جىبەرۋ قاجەت؛

- ەلەكتروندى ۇكىمەتتىڭ باستى بەتىندەگى «بورىش جۇكتەمەسىن ازايتۋ جونىندەگى باعدارلاماعا قاتىسىپ، ساناتتى ءبىلۋ» ەلەكتروندى سەرۆيسى ارقىلى، ول ءۇشىن ەلەكتروندى قولتاڭبا قاجەت.

- ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ بازاسىنداعى call-ورتالىقتان 111، 74-32-20، 75-01-79، 75-01-78 تەلەفوندارى ارقىلى كەڭەس الۋعا بولادى.؛

بورىشتىق جۇكتەمەنى ازايتۋ جونىندەگى كەڭەستەردى مىنالار بەرەدى:

-حالىققا قىزمەت كورسەتۋ ورتالىعى؛

- الماتى قالاسىنىڭ الەۋمەتتىك ءال- اۋقات باسقارماسى؛

- «ءاسمق» اق؛

- ەڭبەك، الەۋمەتتىك قورعاۋ جانە كوشى-قون كوميتەتىنىڭ الماتى قالاسى بويىنشا دەپارتامەنتى.