الماتى قالاسىندا «Nur Otan» پارتياسىنىڭ قولداۋىمەن «وتان وتباسىنان باستالادى» اتتى اقىندار ايتىسى ءوتتى. بۇل ايتىستىڭ باستى ەرەكشەلىگى ءبىر وتباسىنان شىققان اقىنداردىڭ ءوزارا ب ا ق سىناسۋى بولدى. سوعان وراي ونەرسۇيەر قاۋىم اجە مەن نەمەرە، اكە مەن بالا، اعا مەن ءىنى سياقتى وتباسىلىق ايتىستارعا كۋا بولدى.

ايتىستىڭ اشىلۋ سالتاناتىندا «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك بۇل ونەردىڭ قازاق ءۇشىن قاشاندا ورنى بولەك ەكەنىن ايتىپ، الداعى ۋاقىتتا پارتيا تاراپىنان ايتىسقا جۇيەلى قولداۋ كورسەتىلەتىنىنە توقتالدى.

– ايتىس – ەجەلدەن كەلە جاتقان اسىل مۇرامىز. بۇل ونەردىڭ الەم ءۇشىن دە ورنى بولەك. سوندىقتان يۋنەسكو ايتىستى ادامزاتتىڭ مادەني مۇرالارىنىڭ تىزىمىنە قوسىپ وتىر. الداعى ۋاقىتتا «Nur Otan» پارتياسى ءسوز سايىسىنا جۇيەلى تۇردە قولداۋ كورسەتەدى. بۇل – تاۋەلسىزدىكتىڭ العاشقى كۇنىنەن باستاپ ايتىستى قولداپ كەلە جاتقان ەلباسى، پارتيا ءتوراعاسىنىڭ تىكەلەي تاپسىرماسى، – دەدى باۋىرجان بايبەك.

سونداي-اق ول ءتول ونەرىمىزدىڭ حالىقتى الاڭداتقان ماسەلەلەردىڭ وڭ شەشىلۋىنە ىقپال ەتەتىن قوزعاۋشى كۇش ەكەنىن دە اتاپ ءوتتى.

– ايتىستا قوعامداعى وزەكتى ماسەلەلەر اشىق ايتىلىپ، ورتاعا ءتۇرلى وڭ ۇسىنىستاردىڭ تاستالاتىنى بەلگىلى. ماسەلەن تاياۋدا عانا قاراعاندىدا وتكەن حالىقارالىق اقىندار ايتىسىندا كوپتەگەن ۇتىمدى ويلار ايتىلدى. ولاردىڭ ءبارىن جەرگىلىكتى باسشىلىق ەسكەرىپ، سول بويىنشا ناقتى جۇمىستاردى قولعا الادى دەپ سەنەمىز. ءماسليحاتتارداعى ءبىزدىڭ فراكسيانىڭ مۇشەلەرى دە وسىنداي ايتىستارعا ارنايى كەلىپ، اقىندار كوتەرگەن ماسەلەلەردى جازىپ الىپ، ولاردىڭ ءارى قاراي ورىندالۋىن قاداعالاۋعا الادى، – دەدى باۋىرجان بايبەك.

ءسوز بارىسىندا ايتىستىڭ تاقىرىبىنا دا نازار اۋدارعان ول وتباسى مەن ءسالت-داستۇر پارتيانىڭ باستى قۇندىلىقتارىنىڭ ءبىرى ەكەنىن جەتكىزدى.

– بۇل ايتىستىڭ تاقىرىبىن «وتان وتباسىنان باستالادى» دەپ الۋىمىزدىڭ سەبەبى ەڭ باستى قۇندىلىعىمىز وتباسى ينستيتۋتىن ودان ءارى نىعايتىپ، سول ارقىلى ەلدىگىمىزدى كۇشەيتۋ. ويتكەنى پارتيامىزدىڭ دوكتريناسىندا ادام، ونىڭ بوستاندىعى، زاڭنىڭ ۇستەمدىگى، ادىلەتتىلىك سياقتى قۇندىلىقتارمەن بىرگە وتباسى جانە داستۇرگە دە ەرەكشە ءمان بەرىلگەن. سوندىقتان ءتول ونەرىمىزگە جۇيەلى قولداۋ كورسەتىپ، ءىرى الامان ايتىستاردى تۇراقتى وتكىزىپ تۇرامىز. سونىڭ ارقاسىندا ايتىس ونەرى جاڭا دەڭگەيگە كوتەرىلەدى دەپ سەنەمىز، – دەدى «Nur Otan» پارتياسى ءتوراعاسىنىڭ ءبىرىنشى ورىنباسارى.

وتباسىلىق ءسوز سايىسىندا ەلىمىزدىڭ ءبىرقاتار وڭىرىنەن كەلگەن 7 اقىندار جۇبى ونەر كورسەتتى. اتاپ ايتقاندا، ايتىسكەر انا ەگەۋحان ءمۇقامادي قىزى (داۋلەتكەرەي كاپ ۇلىنىڭ اناسى) نەمەرەسى، جاس تالانت ارداكەرەي كاپپەن، اقىن قايىرتاي اقىلبەكوۆ ۇلى رۇستەم قايىرتايۇلىمەن، بەكارىس شويبەكوۆ ءىنىسى (اعاسىنىڭ ۇلى) داۋرەن اقساقالوۆپەن، يران-عايىپ كۇزەمبايەۆ اعاسى تالعات كۇزەمبايەۆپەن، امانگەلدى پانابەردييەۆ اعاسى سەرىكبول پانابەردييەۆپەن، بەكجان ەرجىگىت اعاسى ەرجان امىروۆپەن جانە ديدار قامييەۆ ىنىلەرى ۇلانعاسىر، ايدار قامييەۆتەرمەن ايتىستى.

اقىندار وتباسىلىق قۇندىلىقتار تۇتاس ەلىمىزدىڭ دامۋىنا تىكەلەي اسەر ەتەتىن باستى تەتىكتەردىڭ ءبىرى ەكەنىن ايتىپ، ەرتەڭىمىزدىڭ جارقىن بولۋى ءۇشىن وسى ماسەلەگە ەرەكشە كوڭىل ءبولۋ كەرەكتىگىنە توقتالدى. اسىرەسە، بالا تاربيەسىنە، جاستاردى ادال ەڭبەككە، وتانشىلدىققا باۋلۋعا، قوعامدى ماسىلدىقتان ارىلتۋعا قاتىستى ۇتىمدى سوزدەر ايتىلدى. ماسەلەن قامييەۆتەر ايتىسىندا جاستارعا جىر-داستانداردى جاتتاتقىزۋدىڭ ماڭىزى زور ەكەنى ءسوز بولسا، اجە مەن نەمەرە ايتىسى اتالعان كاپ اۋلەتىنىڭ ءسوز سايىسىندا تاۋەلسىزدىكتىڭ قادىر-قاسيەتى كەڭىنەن دارىپتەلدى. ال اكەلى-بالالى قايىرتاي اقىلبەكوۆ مەن رۇستەم قايىرتاي ۇلى اۋىل مەن قالا حالقىن الاڭداتقان ماسەلەلەردى تۇگەل قامتىپ، جىرعا قوستى. ودان بولەك، اقىندار ادەمى ءازىل مەن قاعىتپا قالجىنعا دا ورىن تاۋىپ، زالعا جينالعان اعايىننىڭ ىستىق ىقىلاسىنا بولەندى.

ناتيجەسىندە ايگىلى تەاتر جانە كينو اكتەرى، قازاقستاننىڭ ەڭبەك ەرى ءاسانالى ءاشىموۆ باستاعان قازىلار القاسىنىڭ شەشىمىمەن قايىرتاي اقىلبەكوۆ مەن رۇستەم قايىرتاي ۇلىنىڭ جۇبى باس جۇلدە 3 ميلليون تەڭگەنى ەنشىلەدى. ەكىنشى ورىن (2 ميلليون تەڭگە) اجە مەن نەمەرە بولىپ ساحناعا شىققان كاپ اۋلەتىنە بۇيىرسا، ۇزدىك ۇشتىكتى (1 ميلليون تەڭگە) اعايىندى قامييەۆتەر تۇيىندەدى. ايتىسقا قاتىسقان باسقا دا اقىندارعا قارجىلاي سىي-سياپات كورسەتىلدى.

وسى رەتتە ەسكەرە كەتەر جايت، كۇننىڭ دۇيسەنبى بولعانىنا قاراماستان ايتىستىڭ اق سارايى اتانىپ كەتكەن «رەسپۋبليكا سارايىندا» ينە شانشار ورىن بولعان جوق. بۇل حالىقتىڭ ايتىسقا دەگەن ەرەكشە ماحابباتى مەن ىقىلاسىنىڭ جارقىن كورىنىسى ەكەنى ءسوزسىز.

ايتا كەتەيىك، بۇعان دەيىن ەلىمىزدە «Nur Otan» پارتياسىنىڭ قولداۋىمەن جىلدىڭ سوڭىنا دەيىن بەس بىردەي الامان ايتىس وتەتىنى جاريالانعان بولاتىن. الماتىداعى ايتىس سونىڭ ءۇشىنشىسى. وسىعان دەيىن اتىراۋ جانە قاراعاندى قالالارىندا ۇيىمداستىرىلدى. ەندى نۇر-سۇلتان جانە ورال قالالارىندا وتپەك.