«اق بەرەن» ج ش س اۆاريالىق قۇتقارۋ قىزمەتى ماڭعىستاۋ فيليالىنىڭ ديرەكتورى امانگەلدى قۋانالييەۆتىڭ ايتۋىنشا، ماڭعىستاۋ وبلىسىندا مۇناي-گاز سالاسىندا اپاتتار بولا قالعان جاعدايدا كاسىبي ماماندارىمەن تولىققان، تەحنيكاسى وزىق، تاجىريبەلى قۇتقارۋ قىزمەتى كومەككە شۇعىل كىرىسكەنى ابزال. وبلىس اۋماعىندا قىزمەت ەتىپ جاتقان ءىرىلى-ۇساقتى ءوندىرىس وشاقتارىندا جۇمىس ءتارتىبى قاتاڭ ساقتالادى دەلىك. دەسەك تە، ءتىلسىز جاۋ كەزدەيسوق بولعاندا، ونى اۋىزدىقتاۋعا شامامىز كەلە مە؟

ءقازىر تەندەر تالكەگى قۇتقارۋشىلاردى ابدەن تيتىقتاتقان كورىنەدى.  120-دان استام ادام ەڭبەك ەتەتىن، زاماناۋي 40 شىقتى ارنايى ءىرى تەحنيكاسى بار بۇل سەرىكتەستىكپەن تەندەرگە تەڭ دارەجەدە ءاتى-جونى بەلگىسىز، قىزمەتى كۇماندى كومپانيالار تۇسەدى ەكەن. قىزمەت قۇنىن 4-5 ەسە تومەن قويىپ، تەندەردى جەڭەتىن ولاردا ءبارى قاعاز جۇزىندە عانا بار. شىنتۋايتىندا، «ءبىر كابينەت» ىشىندە قىزمەت ەتىپ، نە تۇراقتى بازاسى، نە تەحنيكاسى، ءتىپتى ماردىمدى قۇتقارۋشىلارى جوق بوپ شىعادى.  وعان دالەل- «ەمبىمۇنايگازدان» مۇناي اتقىلاپ، اپات بولعاندا جوعارىدا اتالعانداي كومپانيانىڭ ءبىرى وقيعا ورنىنا مۇلدەم كەلمەي قويعان. ولارعا تيەسىلى بارلىق جۇمىستى «اق بەرەندىكتەر» اتقارىپ، ءقاۋىپتى جويعان.

«جاقىندا «قاراجانباسمۇنايگاز» كومپانياسى تەندەر جاريالاپ، ونى از قاراجاتقا اقتوبەلىك قۇتقارۋ كومپانياسى جەڭىپ شىعادى. وزدەرىنىڭ قاۋىپسىزدىگىن قامتاماسىز ەتۋشىلەردى تەكسەرىپ اقتوبەگە بارعان مۇناي كومپانياسى وكىلدەرى اتى بار، زاتى جوق قۇتقارۋشىلاردى ەشقانداي تالاپقا ساي ەمەس دەپ تانىپ، كەلىسىمشارتتى دەرەۋ توقتاتقان. بۇل - جۇمىستارىنا جاۋاپكەرشىلىكپەن قارايتىن مۇناي كومپانياسىنىڭ ارەكەتى. ءبىراق بارلىعى وسىلاي قۇتقارۋشىلارمەن جەتە تانىسسا جاقسى عوي. ءبىر عانا كەلىسىممەن، «بارماق باستى، كوز قىستى» ارەكەتپەن جاسالاتىن تەندەرلەرگە توقتام كەرەك»،- دەيدى امانگەلدى قۇرماش ۇلى.

بۇگىندە «اق بەرەن» ج ش س ماڭعىستاۋ فيليالىمەن وڭىردەگى 50 شاقتى كومپانيا كەلىسىمشارتقا وتىرعان.  24 ساعات كەزەكشىلىكپەن ەڭبەك ەتەتىن قۇتقارۋشىلاردىڭ اۋىز تولتىرىپ ايتاتىن جەتىستىكتەرى بارشىلىق. ولار «قالامقاس» كەن ورنىندا بىرنەشە كۇنگە ۇلاسقان ءورتتى اۋىزدىقتاپ، ۇلكەن قاتەردى توقتاتتى.

بۇرىن رەسپۋبليكالىق مەملەكەتتىك مەكەمە قۇرامىندا بولىپ، 51 جىلدىق تاريحى بار كاسىپورىن وسى جىلدىڭ ناۋرىزىنان بەرى ءجشس-ى بولىپ وزگەردى. ءوز قىزمەتىن رەسپۋبليكالىق بيۋدەتتەن قاراجات الماي، قىزمەت كورسەتىلەتىن شارۋاشىلىق سۋبەكتىلەرىمەن شارتتاردى ورىنداۋدان تۇسكەن جەكە كىرىستەرى ەسەبىنەن جۇزەگە اسىرىپ كەلەدى.

كاسىپورىن قىزمەتىنىڭ نەگىزگى ماقساتى - ءقاۋىپتى وندىرىستىك نىسانداردا توتەنشە جانە اپاتتىق جاعدايلاردا جۇرگىزىلەتىن تاۋ-كەن قۇتقارۋ، اتقىلاماعا قارسى، گازدان قۇتقارۋ، قاتەردىڭ الدىن الۋ، سونداي-اق، ءورتتى ءسوندىرۋ جانە العاشقى مەديسينالىق كومەك كورسەتۋ جانە باسقا دا اۆاريالىق-قۇتقارۋ جۇمىستارىن اتقارۋ.

كاسىپورىن قويىلعان ماقساتتارىن ىسكە اسىرۋ ءۇشىن قىزمەتتەرىن جوعارى ساپا، اسقان جاۋاپكەرشىلىكپەن جۇزەگە اسىرادى. مەكەمەدە تەحنيكالىق قاۋىپسىزدىك شارالارى قاتاڭ ساقتالادى. ماماندار كۇندەلىكتى جاتتىعىپ، جىلىنا ءبىر رەت اتتەستاسيادان ءوتىپ وتىرادى. رەسپۋبليكالىق دەڭگەيدەگى وقۋ-جاتتىعۋلاردا اق بەرەندىكتەردىڭ شاشاسىنا شاڭ جۇققان ەمەس.

مەكەمەدە قىزمەتكەرلەردى الەۋمەتتىك تۇرعىدان قولداۋ دا قاراستىرىلعان. ولار جىلىنا ءبىر رەت تەگىن مەديسينالىق تەكسەرىستەن وتەدى. ساۋىقتىرۋ ورىندارى، ەڭبەك دەمالىسى، بالا تۋۋ، ساباققا بارۋ نەمەسە وتباسىنداعى قايعىلى جاعداي كەزىندە قارجىلاي كومەك بەرىلەدى. مۇنىڭ ءوزى قۇتقارۋشىلاردىڭ ءوز قىزمەتىنە سالعىرت قاراماۋىنا سەرپىن بەرىپ كەلەدى.