ەلباسى-قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ بۇعان دەيىن قازاقستاندىقتاردىڭ 30 پايىزىن بۇقارالىق سپورتپەن قامتۋ تۋرالى مەجە قويعان بولاتىن. ماڭىزدى مىندەت ءوز وزەكتىلىگىن جويعان جوق. وسى ورايدا بارلىق ەلدى مەكەندەردە جاڭا سپورت الاڭدارى بوي كوتەرىپ، شەبەرلىكتى شىڭداۋعا باعىتتالعان جارىستاردىڭ قاتارى ارتۋدا. بۇل ارينە، قۇپتارلىق قادام. ويتكەنى، دانا حالقىمىزدىڭ «شىنىقساڭ شىمىر بولاسىڭ» دەگەن ماتەلىندە ايتىلعانداي بۇقارالىق سپورتپەن اينالىسقان ادامنىڭ جانى تازا، ءتانى سۇلۋ بولىپ بولىپ قالىپتاساتىندىعى بەلگىلى.

مەملەكەت باسشىسى قاسىم-جومارت توقايەۆ تا بۇگىندە سپورت سالاسىن دامىتۋعا ۇلكەن كوڭىل بولۋدە. پرەزيدەنت وتانداستارىمىزدى سوزبەن جىگەرلەندىرىپ قانا قويماي، تەننيس ويىنىن جەتىك مەڭگەرگەن تۇلعا رەتىندە كوپكە ۇلگى كورسەتە بىلۋدە. سونىمەن قاتار سپورت سالاسىن ودان ءارى جەتىلدىرۋگە باعىتتالعان تىڭ تاپسىرمالار جۇكتەۋدە.

بۇگىندە ەلباسى مەن مەملەكەت باسشىسى العا قويعان مىندەتتەر جامبىل وبلىسىندا دا ءوز جەمىسىن بەرىپ وتىر. بۇل تۇۇرعىدا اۋليەاتا وڭىرىندەگى ءاربىر اۋداندا دا جارقىن مىسالدار جەتەرلىك. سول قاتاردا قورداي اۋدانى دا الدىڭعى قاتاردان كورىنىپ كەلەدى.

قازىرگى تاڭدا قورداي اۋدانى بويىنشا 308 سپورت نىساندارى بار. ونىڭ ىشىندە 1 ستاديون، 2 سپورت كەشەنى حالىققا قىزمەت كورسەتۋدە. سپورت كەشەندەرىنىڭ بىرەۋى جەكە مەنشىكتە بولعانىمەن كوپشىلىك ءۇشىن قولجەتىمدى. سونىمەن قاتار 53 سپورت زال، 19 فۋتبول الاڭى، 225 سپورت الاڭشالارى، 2 ءجۇزۋ باسسەين جانە 6 اتقىشتار ءتيرى جۇمىس ىستەۋدە. سونىڭ ناتيجەسىندە ايماقتا بۇقارالىق سپورتپەن اينالىساتىنداردىڭ سانى ەداۋىر ارتىپ وتىر. كەيىنگى مالىمەتتەرگە قاراعاندا اۋداندا سپورتپەن شۇعىلدانۋشىلاردىڭ سانى 29،9 پايىزدى نەمەسە 43150 ادامدى قۇرادى.

اعىمداعى جىلى دەمەۋشىلەردىڭ كومەگىمەن 7 اۋىلدىق وكرۋگتەرىندە 10 "ستريتۆاركاۋت" الاڭشالارى اشىلدى. ولار قورداي-3، ماسانچي، ستەپنوە، نوعايباي، قاراسۋ، العا، بەتكاينار، سورتوبە اۋىلدارىندا ورنالاسقان. بەكىتىلگەن مەجەگە سايكەس، جوسپارداعى 13 سپورت الاڭشالاردىڭ 3ء-ۋىن جىل سوڭىنا دەيىن اشۋ جوسپارلانىپ وتىر. بۇل الاڭشالار ءسۇلۋتور، ۇلكەن-سۇلۋتور جانە سارىبۇلاق اۋىلدارىندا پايدالانۋعا بەرىلمەك.

سونداي-اق، حالىق تىعىز ورنالاسقان قورداي، وتار جانە بەتقاينار اۋىلدارىنا سپورت كەشەنىن سالۋ ءۇشىن جوبالىق-سمەتالىق قۇجاتتار ازىرلەۋگە «سپورت وبەكتىلەرىن دامىتۋ» باعدارلاماسى بويىنشا 11،2 ميلليون تەڭگە قاراستىرىلدى. جالپى كەلىسىمدەردە 4 ينديكاتور جوسپارلانىپ، بارلىق ينديكاتور ورىندالۋدا.