قازاقستان رەسپۋبليكاسى اۋىل شارۋاشىلىعى مينيسترلىگى «قازسۋشار» كاسىپورنىنىڭ بايزاق اۋدانىنداعى «بايزاق» وندىرىستىك بولىمشەسى وڭىردەگى اۋىل شارۋاشىلىعى ماقساتىنداعى 32 553 گەكتار ەگىس القابىنا سۋ جەتكىزۋدى ۇيىمداستىرادى. بۇگىندە سۋارمالى جەرلەردى قايتا قالپىنا كەلتىرۋ باعدارلاماسى اياسىندا اۋدانداعى 14 098 گەكتار اۋماقتاعى بولاتىن 72 نىساندا قايتا جاڭعىرتۋ جۇمىستارى جۇرگىزىلمەك، دەپ جازادى Qamshy.kz اقپارات اگەنتتىگى. 

جالپى «بايزاق» وندىرىستىك بولىمشەسىنىڭ تەڭگەرىمىندە «تەمىربەك» جانە «تالاس» سۋ تورابى بار. ولاردىڭ ەنشىسىنە 648،707 شاقىرىمدى قۇرايتىن 105 دانا كانال جانە 8 كوللەكتورلىق درەناج جۇيەسى تيەسىلى. وندىرىستىك بولىمشەدە 45 مامان قىزمەت اتقارادى. سۋ شارۋاشىلىعى ماماندارىنىڭ بىلىكتىلىگىن ارتتىرۋ دا ءجىتى نازاردا.

–بۇدان وزگە وتكەن جىلى 14،412 گەكتار جەرگە كەلىسىم-شارت جاسالىپ، 78،158 ميلليون تەكشە مەتر سۋ بەرىلسە جىل باسىنان بەرى 18،456 گەكتار جەرگە كەلىسىم-شارت جاسالىپ، 112،626 ميلليون تەكشە مەتر سۋ بەرىلدى، – دەيدى «قازسۋشار» وبلىستىق فيليالىنىڭ باسشىسى قازىبەك بەدەبايەۆ .

جامبىل فيليالىنىڭ باسشىلىعىنىڭ تاپسىرماسىمەن جالپى قۇنى 63،9 ميلليون تەڭگەگە ۇزىندىعى 85 شاقىرىم بولاتىن 10 كانالعا مەحانيكالىق تازالاۋ جۇمىستارى جۇرگىزىلدى. ءدال وسى تازالىق جۇمىستارىنان سوڭ اتالعان كانالدار ارقىلى وتكەن جىلى 1304 گەكتار جەر سۋارىلدى. جىل باسىنان بەرى بۇل سۋ جۇيەلەرى ارقىلى 2707 گەكتار جەر سۋارىلعان. نەگىزىنەن اۋدان اۋماعىنداعى سۋ نىساندارىنىڭ باسىم بولىگى تەحنيكالىق الەۋەتى سىن كوتەرمەيدى. ءتىپتى 40-50 جىلداي جوندەي جۇمىستارى جۇرگىزىلمەگەن ءارى تازالانباعان كانال جۇيەلەرى دە بار.

بۇگىندە وبلىس اۋماعىندا سۋارمالى ەگىستىك القاپتارىن ۇلعايتۋ جۇمىستار قولعا الىنۋدا. سونىڭ ناتيجەسىندە الداعى 2 جىلدا كەزىندە ءتۇرلى سەبەپتەرمەن جايىلىمدىق جەرلەردىڭ ساناتىنا جاتقىزىلىپ كەتكەن 175،5 مىڭ گەكتار قايتادان ەگىس القاپتارىنا اينالماق. بۇل ماقساتتا وبلىس اكىمىنىڭ تىكەلەي باستاماسىمەن قۇرىلعان مەحانيكالاندىرىلعان جاساقتىڭ دا مۇمكىندىگى مولىنان پايدالانۋدا. كۇنى بۇگىنگە دەيىن «تالاس اسا» مەكەمەسى جانىنان قۇرىلعان مەحانيكالىق وترياد كومەگىمەن وبلىس اۋماعىنداعى جالپى ۇزىندىعى 41،6 شاقىرىمدى قۇرايتىن 7 كانال مەن 3 سۋ قويماسىنا مەحانيكالىق تازالاۋ جۇمىستارى جۇرگىزىلدى. ءوز كەزەگىندە، بۇل سۋ جۇيەلەرى وڭىردەگى سۋارمالى جەر كولەمىن 1404 گەكتارعا دەيىن ۇلعايتۋعا مۇمكىندىك بەردى.