بيىل ەلىمىزدە اتاۋلى الەۋمەتتىك كومەك الۋدىڭ فورماتى وزگەرگەنى بارشاعا ايان. «ە-حالىق» اقپاراتتىق جۇيەسىنىڭ دەرەكتەرىنە سايكەس، ەلىمىزدە 21 مىڭعا جۋىق وتباسى تابىسى تومەن جانە مۇقتاج وتباسىلارعا عانا بەرىلەتىن اتاۋلى الەۋمەتتىك كومەكتى زاڭسىز الۋ ءۇشىن وزدەرىنىڭ ناقتى تابىستارىن جاسىرعان. وسىعان بايلانىستى، قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگى اكىمدىكتەرمەن بىرلەسىپ، «مەملەكەتتىك اتاۋلى الەۋمەتتىك كومەك تۋرالى» قازاقستان رەسپۋبليكاسىنىڭ زاڭىن بۇزا وتىرىپ، رۇقساتسىز تولەنگەن تولەمدەردى قايتارۋ جانە قايتا قاراۋ، زاڭ بۇزۋشىلىقتاردىڭ الدىن الۋ ماقساتىندا ءاربىر انىقتالعان فاكتى بويىنشا جەكە-جەكە جۇمىس جۇرگىزۋدە دەپ جازادى Qamshy.kz اقپارات اگەنتتىگى. 

وسى ورايدا جامبىل وبلىسى مەن وعان قاراستى اۋداندار دا زاڭ شەڭبەرىندەگى جۇمىستار ءجىتى جۇرگىزىلۋدە. ماسەلەن بايزاق اۋدان اكىمدىگى حالىقتى جۇمىسپەن قامتۋ ورتالىعىنىڭ ديرەكتورى ارعىنباي سقاقوۆتىڭ ايتۋىنشا، زاڭسىز الەۋمەتتىك كومەككە قۇجات تاپسىرعان ءبىرقاتار فاكتىلەر انىقتالىپتى.

– بۇگىنگى كۇنگە قازاقستان رەسپۋبليكاسىنىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ «ە-حالىق» اقپاراتتىق جۇيەسىنىڭ دەرەكتەرى ارقىلى اۋدانداعى 1232 وتباسىنىڭ زاڭسىز جولمەن اتاۋلى الەۋمەتتىك كومەك العانى انىقتالعان. ياعني، تابىسىن جاسىرعان نەمەسە از كورسەتكەندەر، وتباسى مۇشەلەرىندەگى زەينەتاقى الاتىنداردى جاسىرىپ، جالعان قۇجاتتار وتكىزگەندەر انىقتالۋدا. وسىعان وراي، تابىستارىن جاسىرعانداردى انىقتاۋ جونىندە اۋدان اكىمىنىڭ شەشىمىمەن ارنايى كوميسسيا قۇرىلىپ، جۇمىس ىستەۋدە. بۇگىندە ورتالىق قىزمەتكەرلەرى اتاۋلى الەۋمەتتىك كومەكتى زاڭسىز الاتىنداردى انىقتاۋ بويىنشا بەلسەندى جۇمىس جۇرگىزۋدە. تەكسەرۋدىڭ العاشقى ناتيجەلەرى دە بار. ءقازىردىڭ وزىندە 175 وتباسى جاڭا فورماتتاعى اتاۋلى الەۋمەتتىك كومەكتى الۋ ءۇشىن قۇجات تاپسىراتىن كەزدە تابىستارىن جاسىرعاندارى انىقتالدى. ولاردى جاڭا دەرەكتەر بازاسى ەسەپتەپ شىعاردى. سونىمەن قاتار، سالا ماماندارى بارلىق ۇيلەرگە بارىپ تەكسەرۋدە. ادامدار جۋىردا اۆتوكولىك، باسقا دا مۇلىكتى ساتقانىن نەمەسە سىيلىقاقى العاندىعىن كورسەتپەيدى.

تەكسەرۋ بارىسىندا كەيبىر وتباسىلاردىڭ كاسىپكەرلىكتەن تۇسەتىن تابىسىن تومەندەتكەنى، جۇمىستارىن جاسىرعانى، كوميسسيالاردىڭ وتباسىلاردىڭ تابىسىن انىقتاعاندا دۇرىس جۇمىس ىستەمەگەنى بەلگىلى بولدى. ساۋىردەن باستاپ اتاۋلى الەۋمەتتىك كومەكتى زاڭسىز العان وتباسىلار اقشالارىن مەملەكەتكە قايتارۋلارى ءتيىس. ءار وتباسى ءۇشىن قايتارىلاتىن قاراجات ءار ءتۇرلى. ورتاشا ەسەپپەن 300-400 مىڭ تەڭگە كولەمىندە. العاشقى ۋاقىتتا ولارعا العان جاردەماقىنى قايتارۋ كەرەكتىگى ەسكەرتىلەدى. ەگەر 30 كۇن، ياعني، ءبىر اي مەرزىم ارالىعىندا العان قاراجاتتارىن ءوز ەرىكتەرىمەن قايتارماعان جاعدايدا، وندا بۇل اقشانى سوت ارقىلى ءوندىرىپ الۋعا تۋرا كەلەدى. قايتا اتاپ وتەيىن، بەلگىلى بولعانداي، بۇل ادامدار كومەككە مۇقتاج بولماعان. ءبىراق، مەملەكەتتىڭ كومەگىنە مۇقتاج جاندار دا بار عوي. سوندىقتان دا تەكسەرۋ ناقتى وسى كومەككە مۇقتاج جانداردى انىقتاۋعا سەپتىگىن تيگىزەدى دەگەن ويدامىز، - دەيدى ورتالىق باسشىسى.

ءيا، اتاۋلى الەۋمەتتىك كومەك قاراپايىم xالىقتىڭ تابىسىنان تۇسكەن سالىق ەكەنى بەلگىلى. سوندىقتان بۇقارا ءتۇرلى قۇيتىرقى ارەكەتتەرگە بارماي، ءبارىن زاڭ شەڭبەرىندە ىستەگەنى ابزال.