پارلامەنت ءماجىلىسىنىڭ دەپۋتاتى زاعيپا بالييەۆا 2 پروسەنتتىك يپوتەكانىڭ العاشقى جارناسىن الىپ تاستاۋدى ۇسىندى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

دەپۋتات اتاپ وتكەندەي، بۇگىندە تۇرعىن ءۇي قۇرىلىس جيناق بانكى "باقىتتى وتباسى" باعدارلاماسىن قولعا الدى. سونىڭ اياسىندا كوپبالالى، تولىق ەمەس جانە مۇگەدەك بالاسى بار وتباسىلارعا 2 پروسەنتتىك باسپانا كرەديتى بەرىلەدى. ءبىراق ول ءۇشىن 10 پروسەنت كولەمىندە العاشقى جارنانى سالۋ قاجەت.

"وسى ۋاقىتقا دەيىن نەبارى 3 000 ءوتىنىش تۇسكەن ەكەن. نەگە؟ سەبەبى 10 پروسەنتتىك العاشقى جارنانى ءبارى بىردەي تاۋىپ بەرە المايدى. بانك العاشقى جارنا ادامنىڭ تولەم قابىلەتتىگى ءۇشىن كەرەك دەيدى. ەرلى-زايىپتىلار جالاقى تۋرالى انىقتامانى كورسەتسە، جەتپەي مە؟ ماسەلەن، استانادا كوپبالالى وتباسى جالدامالى پاتەر ءۇشىن 40-100 مىڭ تەڭگە تولەيدى. ودان دا العاشقى جارناسىز كرەديت الىپ، ول اقشانى سوعان جۇمساعان ءتيىمدى ەمەس پە؟"، - دەدى بالييەۆا بۇگىنگى ۇكىمەت ساعاتىندا.

دەپۋتاتتىڭ سوزىنە قاراعاندا، بۇگىندە العاشقى جارنانى كوپبالالى وتباسى بىلاي تۇرسىن، جاس وتباسىنىڭ ءوزى جيناي المايدى. سوندىقتان حالىققا سەنىممەن قاراپ، 2 پروسەنتتىك يپوتەكانى العاشقى جارناسىز بەرگەن دۇرىس. سوندا وسى باعدارلاماعا سۇرانىس تا ارتادى.

"مەن ءوزىم ەسەپتەپ كوردىم. مىسالى، جەرگىلىكتى جەردە 10 ميلليون تەڭگەنى 20 جىلعا العاشقى جارناسىز بەرەتىن بولساق، وندا اي سايىن 58 332 تەڭگەنى اۋدارۋ كەرەك. ونداي اقشانى كەز كەلگەن وتباسى تولەي الادى. كوپبالالى وتباسى بولسىن، مۇگەدەك بالاسى بار وتباسى بولسىن، بارلىعى وڭاي تولەي الادى. ال نۇر-سۇلتان قالاسىندا كرەديتكە 15 ميلليون تەڭگە بەرىلسە، اي سايىن 87 500 تولەۋ كەرەك. ول دا قيىن ەمەس"، - دەپ اتاپ كورسەتتى بالييەۆا.

وسى ورايدا دەپۋتات "باقىتتى وتباسى" باعدارلاماسىنا قاتىسا الاتىنداردىڭ قاتارىنا جاس وتباسىلاردى دا قوسۋدى ۇسىندى.