پارلامەنت ءماجىلىسىنىڭ دەپۋتاتى زاعيپا بالييەۆا 2 پروسەنتتىك يپوتەكانىڭ العاشقى جارناسىن الىپ تاستاۋدى ۇسىندى، -دەپ حابارلايدى Qamshy.kz اقپارات اگەنتتىگى.

تۇرعىن ءۇي قۇرىلىس جيناق بانكى "باقىتتى وتباسى" باعدارلاماسىن قولعا الدى. باعدارلامادا كوپبالالى، تولىق ەمەس جانە مۇگەدەك بالاسى بار وتباسىلارعا 2 پروسەنتتىك باسپانا الۋعا قاتىستى نەسيە قاراستىرىلعان.  ول ءۇشىن العاشقى جارناسىنىڭ 10 پايىزىن تولەۋ قاجەت. جارنا تولەۋگە كوپشىلىكتىڭ ماتەريالدىق جاعدايى كەلمەيتىندىگىن ەسكەرە وتىرىپ، پارلامەنت ءماجىلىسىنىڭ دەپۋتاتى زاعيپا بالييەۆا 2 پروسەنتتىك يپوتەكانىڭ العاشقى جارناسىن الىپ تاستاۋدى ۇسىندى.

بۇگىنگى ۇكىمەت ساعاتىندا دەپۋتات:  «مەن ءوزىم ەسەپتەپ كوردىم. مىسالى، جەرگىلىكتى جەردە 10 ميلليون تەڭگەنى 20 جىلعا العاشقى جارناسىز بەرەتىن بولساق، وندا اي سايىن 58 332 تەڭگەنى اۋدارۋ كەرەك. ونداي اقشانى كەز كەلگەن وتباسى تولەي الادى. كوپبالالى وتباسى بولسىن، مۇگەدەك بالاسى بار وتباسى بولسىن، بارلىعى وڭاي تولەي الادى. ال نۇر-سۇلتان قالاسىندا كرەديتكە 15 ميلليون تەڭگە بەرىلسە، اي سايىن 87 500 تولەۋ كەرەك. ول دا قيىن ەمەس"، -دەپ ءسوزىن قورتىندىلادى.