بۇگىن ءا. قاستەيەۆ اتىنداعى مەملەكەتتىك ونەر مۋزەيىندە قازاقستاندىق سۋرەتشى، يادرولىق قارۋعا قارسى حالىقارالىق قوزعالىستىڭ بەلسەندىسى كارىپبەك كۇيىكوۆتىڭ جەكە كورمەسى اشىلدى. كورمەگە اۆتوردىڭ 50 كارتيناسى قويىلدى، دەپ جازادى قالالىق اكىمدىكتىڭ باسپا ءسوز قىزمەتى.
ول يادرولىق سىناق قۇرباندارىنىڭ پورترەتتەرىن سالادى. ك. كۇيىكوۆ 1968 جىلى سەمەي يادرولىق پوليگونىنان 100 مەتر قاشىقتىقتا ورنالاسقان ەگىندىبۇلاق سەلوسىندا تۋىلعان. «نيەۆادا-سەمەي» يادرولىق قارۋعا قارسى قوزعالىستىڭ نەگىزىن قالاۋشىلاردىڭ ءبىرى.
العاش رەت الماتىدا ۇيىمداستىرىلعان كورمەگە قالا اكىمى باقىتجان ساعىنتايەۆ كەلدى. ك. كۇيىكوۆ سۋرەتتەرىنىڭ بىرەگەيلىگىنە توقتالعان شاھار باسشىسى، اۆتوردىڭ جۇمىستارى وپتيميزم مەن ومىرگە دەگەن قۇشتارلىققا تولى ەكەندىگىن تىلگە تيەك ەتتى.
«جاستارعا تاباندىلىق پەن باتىلدىقتىڭ ۇلگىسىن كورسەتە الاتىن اۆتوردىڭ شىعارماشىلىعى ادامنىڭ ىشكى جان دۇنيەسىن بەينەلەيدى»، – دەدى ب. ساعىنتايەۆ.
اتوم جوباسىنىڭ قۇرمەتتى ەلشىسى رەتىندە ك. كۇيىكوۆ كونفەرەنسيالار مەن ءتۇرلى شارالاردا بۇۇ جانە قۇراما شتاتتار كونگرەسى وكىلدەرى الدىندا يادرولىق قارۋعا قارسى ءسوز سويلەيدى. كورمە اعىمداعى جىلدىڭ 20 قازانىنا دەيىن جالعاسادى.
پىكىر قالدىرۋ