قازاقستان بوكس فەدەراسياسىنىڭ پرەزيدەنتى بولىپ كاسىپكەر كەڭەس راقىشيەۆ سايلاندى. مۇنداي شەشىم بۇگىن، 9 قازاندا وتكەن فەدەراسيانىڭ جىلدىق كونفەرەنسياسىندا قابىلدانعان. كونفەرەنسياعا قاتىسقان فەدەراسيا وكىلدەرنىڭ بارلىعى راقىشيەۆتىڭ كانديداتۋراسىن قولداپ داۋىس بەرگەن.
2009 جىلدان بەرى بوكس فەدەراسياسىن قازاقستاندى 30 جىلعا جۋىق ءۇزدىسىز بيلەگەن نۇرسۇلتان نازاربايەۆتىڭ كۇيەۋ بالاسى، كاسىپكەر تيمۋر قۇلىبايەۆ باسقاردى. قازاقستان بوكس فەدەراسياسى رەسمي سايتىنىڭ جازۋىنشا، قۇلىبايەۆ "مۇددەلەر قاقتىعىسىن بولدىرماۋ ءۇشىن" ءوز قىزمەتىنەن كەتۋ تۋرالى شەشىم قابىلداعان. سونداي-اق، قۇلىبايەۆ سۋ سپورتى تۇرلەرى فەدەراسياسىنىڭ پرەزيدەنتى قىزمەتىنەن دە كەتكەن.
قۇلىبايەۆتىڭ ورىنىنا كەلگەن راقىشيەۆ 1979 جىلى الماتىدا تۋعان. ول - قازاقستاننىڭ ساۋدا-ونەركاسىپ پالاتاسىن باسقارعان بەلگىلى مەملەكەت جانە قوعام قايراتكەرى حاميت راقىشيەۆتىڭ ۇلى، قازاقستاننىڭ جوعارى بيلىگىندە لاۋازىمدى قىزمەتتەر اتقارعان يمانعالي تاسماعانبەتوۆتىڭ كۇيەۋ بالاسى. راقىشيەۆ بىرنەشە جىل Forbes جۋرنالىنىڭ رەيتينگى بويىنشا ەلدەگى ەڭ باي كاسىپكەرلەردىڭ قاتارىندا بولدى. ول 2018 جىلدىڭ جەلتوقسانىندا بوكس فەدەراسياسىنىڭ ۆيسە-پرەزيدەنتى بولىپ تاعايىندالعان.
پىكىر قالدىرۋ