7 قازاندا الماتى وبلىسى اقسۋ اۋدانىندا جۇڭگو مەن قازاقستان جۇمىسشىلارى اراسىندا جانجال بولدى. بۇل تۋرالى الماتى وبلىستىق پوليسيا دەپارتامەنتى حابارلادى.
دەپارتامەنت باسپا ءسوز قىزمەتىنىڭ حابارلاۋىنشا، جانجال الدىمەن قىتايدىڭ ءتورت جۇمىسشىسى اراسىندا باستالىپ، كەيىن توبەلەسكە ۇلاسقان. بارلىعى – "Citic Construction" كومپانياسىنىڭ جۇمىسشىسى. توبەلەستەن قازاقستاندا تۇراقتى تۇرۋعا رۇقساتى بار جۇڭگو ازاماتى، ەتنيكالىق قازاق جاراقاتتانعان.
دەپارتامەنتتىڭ مالىمەتىنشە، "كەلەسى كۇنى جەرگىلىكتى تۇرعىندار مەن "Citic Construction" كومپانياسىندا جۇمىس ىستەيتىن قازاقستان ازاماتتارى "ءىستىڭ بايىبىنا بارماي قىتايدان كەلگەن جۇمىسشىلاردى ۇرىپ-سوققان".
توبەلەستەن قىتايدىڭ ءتورت ازاماتى جارالانىپ، اۋرۋحاناعا تۇسكەنى حابارلاندى. پوليسيا "بۇزاقىلىق" بابى بويىنشا تەرگەۋ باستالعانىن، كۇدىكتىلەر ۇستالعانىن ايتتى.
– بۇل فاكتى بويىنشا ق ر قىلمىستىق كودەكسىنىڭ 293-بابى 3-بولىگى (بۇزاقىلىق) ، 107-باپتىڭ 2-بولىگى (دەنساۋلىققا قاساقانا اۋىرلىعى ورتاشا زيان كەلتىرۋ) جانە 106-بابى 2-بولىگى (دەنساۋلىققا قاساقانا اۋىر زيان كەلتىرۋ) بويىنشا سوتقا دەيىنگى تەرگەۋ ءجۇرىپ جاتىر. كۇدىكتىلەر انىقتالىپ، ۇستالدى، – دەدى الماتى وبلىسى پوليسياسىنىڭ باسپا ءسوز قىزمەتى.
بۇدان بولەك، تەكسەرىس كەزىندە "Citic Construction" كومپانياسىندا شەتەلدىڭ 33 جۇمىسشىسى زاڭسىز جۇمىس ىستەپ جۇرگەنى انىقتالعان. پوليسيا ءقازىر ولاردى قازاقستاننان دەپورتاسيالاۋمەن اينالىسىپ جاتقانىن مالىمدەدى.
الەۋمەتتىك جەلىدە 8 قازاننان بەرى وسى ماسەلەگە بايلانىستى ۆيدەو تارالا باستاعان. "Citic Construction" ءجشس-نىڭ جۇمىسشىلارى ب ا ق وكىلدەرىنە ۆيدەو ۇندەۋ جاريالادى. ۆيدەو ۇندەۋدە جۇمىسشىلار شەتەلدىك مەن جەرگىلىكتى تۇرعىندارعا تەڭ ەڭبەك جاعدايى جاسالماعانىن العا تارتقان.
پىكىر قالدىرۋ