الماتىداعى تەرەكتى ەلدى مەكەنىنىڭ تۇرعىندارى ەسكى عيمارات پەن ويدىم-ويدىم جولداردان ابدەن زارەزاپ بولعانىن ايتىپ شۋ شىعاردى دەپ حابارلايدى Qamshy.kz اقپارات اگەنتتىگى كتك تەلەارناسىنا سىلتەمە جاساپ.
ولار قۇرىلىسى قيراعان نىسان جەكەمەنشىككە وتكەلى وڭشەڭ بۇزاقىلار مەن قاڭعىباستاردىڭ مەكەنىنە اينالدى دەپ وتىر. ال عيمارات يەسى بەلگىلى اكتەر ەكەن. اتالمىش نىساننىڭ كەسىرىنەن مەكتەپكە باراتىن بالالارىنىڭ ارى-بەرى ءوتۋى قيىنداعان.
ال جول ماسەلەسىنىڭ ءجونى ءبىر بولەك. اۋىل جۇرتى بۇل جاعدايدىڭ جىلدا قايتالاناتىنىنا جانە ماسەلەنىڭ تۇبەگەيلى شەشىلمەي كەلە جاتقانىنا قاپالى. جىلۋ جۇيەسى عيماراتىنىڭ جەكە مەنشىككە وتكەنىنە 20 جىل بولعان. ورتالىق كوشەدە ورنالاسقان نىسان بۇگىندە قاڭىراپ قوقىس الاڭىنا اينالىپتى. ءتىپتى مۇندا ەكى جىل بۇرىن ادام ءولىمى بولىپ، ءبىر قىز وز-وزىنە قول سالعان دەيدى جۇرت. ال قىستىڭ كۇنى بۇل جەردى قاڭعىباستار پانالايدى. قورشاۋى جوق قاراۋسىز كەشەن ماڭىنان كۇندە مەكتەپكە قاتىنايتىن بالالارىنا الاڭداعان تۇرعىندار كەيدە ءنومىرسىز كولىكتەردىڭ دە وسىندا كەلىپ تۇراقتايتىنىن ايتادى.
جۇرتتىڭ ايتۋىنشا، قيراعان كەشەن بەلگىلى اكتەرگە تيەسىلى ەكەن. كورشىلەر ونىڭ بىرنەشە رەت نىسانعا كەلىپ تەكسەرىپ كەتكەنىن دە كورىپتى. اۋىل حالقىنىڭ باس اۋرىنا اينالعان ماسەلە بۇل عانا ەمەس. جىل سايىن جولدىڭ جايى دا جىرعا اينالعان. ءتىپتى جەدەل جاردەم كولىكتەرى كوشەگە كىرە الماي كەتكەن كۇندەر دە بولىپتى.
اتقامىنەرلەردى مۇلدەم كورمەيمىز دەگەن تۇرعىندار بۇگىنگە دەيىن تەك قاعاز جۇزىندە عانا جاۋاپ العانىن ايتادى. بۇل ماسەلەگە جاۋاپتىلاردىڭ دا ءوز ايتارى بار. ولار ەسكى نىساننىڭ ماسەلەسىن جاقىندا شەشىپ بەرەتىنىنە ۋادە بەرىپ، بۇل جەردىڭ حالىق ارتىسىنە تيەسىلى ەكەنىن راستادى.
جولعا جاۋاپتى ماماندار ءقازىر سمەتالىق قۇجات جاسالىپ جاتقانىن العا تارتتى. مۇندا سۋ جانە كارىز جۇيەسى جۇرگىزىلمەيىنشە، جول جوندەلمەيدى دەپ وتىر. ول 2020-2021 جىلدارعا جوسپارلانعان.
پىكىر قالدىرۋ