قازاقستان يراكتاعى جەتىمدەر ۇيىندە قالعان 14 بالانى ەلگە قايتارۋدى جوسپارلاپ وتىر دەپ حابارلايدى Qamshy.kz اقپارات اگەنتتىگى استانا تەلەارناسىنا سىلتەمە جاساپ.
بۇل تۋرالى ەلوردادا وتكەن ەۋروپاداعى قاۋىپسىزدىك جانە ىنتىماقتاستىق ۇيىمىنىڭ اۋعانستان جونىندەگى وتىرىسىندا بەلگىلى بولدى.
سىرتقى ىستەر ءمينيسترى مۇحتار تىلەۋبەردى بۇل ماسەلە "جۋسان" وپەراسياسى اياسىندا جۇزەگە اسۋى مۇمكىن ەكەنىن اتاپ ءوتتى. ەلگە قايتارىلۋى كەرەك بالالار بۇرىن سوعىس ايماقتارىندا بولعان. ولاردىڭ انالارى ءومىر بويىنا باس بوستاندىعىنان ايىرىلىپتى. بۇلدىرشىندەردىڭ ۇلكەنى 10-دا، ال ەڭ كىشىسى 2 جاستا.
ستانيسلاۆ ۆاسيلەنكو، ق ر ءسىم ارنايى تاپسىرمالار جونىندەگى ەلشىسى: يراك تاراپى بالالاردى قايتارۋعا كەلىسىم بەرىپ وتىر. ءبىز جاقىن كۇندەرى ولاردى قازاقستانعا الىپ كەلەمىز. ەندى بۇلدىرشىندەردى اتا-اناسىنىڭ قاتەلىگى ءۇشىن دالادا تاستاي المايمىز عوي.
ەسكە سالا كەتەيىك، العاشقى اۋقىمدى «جۋسان» گۋمانيتارلىق وپەراسياسى وسى جىلدىڭ قاڭتارىندا ەلباسى نۇرسۇلتان نازاربايەۆتىڭ باسشىلىعىمەن ءساتتى جۇزەگە اسىرىلعان ەدى. ناتيجەسىندە 357 بالا سوعىس ايماقتارىنان وتانعا ورالدى. ال مامىر ايىندا مەملەكەت باسشىسى قاسىم-جومارت توقايەۆتىڭ تاپسىرماسىمەن سيريادان تاعى 231 قازاقستاندىق ەۆاكۋاسيالاندى. ونىڭ ىشىندە مەكتەپكە دەيىنگى جاستاعى 156 بالا بار، 18ء-ى جەتىم قالعان. ءقازىر ەلگە قايتارىلعان 406 بالا ارنايى وڭالتۋدان ءوتىپ، قوعامعا قايتا قوسىلۋدا.
پىكىر قالدىرۋ