پارلامەنت سەناتى مەملەكەتتىك شەكارا ماڭىندا ورنالاسقان اۋىل شارۋاشىلىعى ماقساتىنداعى جەرلەردى شەتەلدىكتەرگە بەرۋگە تىيىم سالاتىن زاڭدى قابىلدادى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

بۇگىن سەناتتا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە اگروونەركاسىپتىك كەشەندى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى ەكىنشى وقىلىمدا قارالدى. زاڭ جوباسى 13 كودەكس پەن 29 زاڭعا وزگەرىستەر مەن تولىقتىرۋلار ەنگىزۋدى كوزدەيدى.

"زاڭ جوباسىندا مەملەكەتتىك شەكارا ماڭىندا ورنالاسقان اۋىل شارۋاشىلىعى ماقساتىنداعى جەرلەردى شەتەلدىكتەرگە، ازاماتتىعى جوق ادامدارعا، شەتەلدىك زاڭدى تۇلعالارعا، سونداي-اق شەتەلدىكتەردىڭ قاتىسۋى بار قازاقستاندىق زاڭدى تۇلعالارعا بەرۋگە تىيىم سالۋ كوزدەلگەن"، - دەلىنگەن سەناتتىڭ اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ قورىتىندىسىندا.

بۇدان بولەك، زاڭ جوباسىنىڭ نەگىزگى تۇزەتۋلەرى جەر رەسۋرستارى سالاسىنداعى مىناداي نورمالاردى كوزدەيدى: ەرەكشە قورعالاتىن تابيعي اۋماقتاردىڭ جەرلەرىن بوسالقى جەرلەرگە اۋىستىرۋ جاعدايلارىن شەكتەۋ؛ اۋىل شارۋاشىلىعى ماقساتىنداعى جەرلەردىڭ ۇتىمدى پايدالانىلۋىنا باقىلاۋ جاساۋ تەتىگىن جەتىلدىرۋ؛ اۋىز سۋ ساپاسىنداعى جەراستى سۋلارىن پايدالانۋعا رۇقسات بەرۋ تالاپتارىن ناقتىلاۋ.

سونداي-اق، جانۋارلار مەن وسىمدىكتەر الەمى سالاسىنداعى براكونەرلىك ماسەلەلەرى بويىنشا اكىمشىلىك جانە قىلمىستىق زاڭنامالاردىڭ نورمالارى قاتاڭداتىلدى.

زاڭ جوباسىندا كوزدەلىپ وتىرعان وزگەرىستەر زاڭنامالىق بازانى جەتىلدىرە وتىرىپ، ەڭبەك ونىمدىلىگىن ەسەلەۋگە، سونداي-اق وڭدەلگەن ءونىم ەكسپورتىن ۇلعايتۋ ارقىلى اگروونەركاسىپ كەشەنى سالاسىنىڭ باسەكەگە قابىلەتتىلىگىن ارتتىرۋعا قولايلى مۇمكىندىكتەر قالىپتاستىرماق.

سەنات دەپۋتاتتارى زاڭ جوباسىن ەكىنشى وقىلىمدا ماقۇلداپ، قابىلدادى.