مەملەكەت باسشىسى قاسىم-جومارت توقايەۆ حالىققا ارناعان جولداۋىندا قۇقىق سالاسىنا ايرىقشا كوڭىل بولە كەلە، ءبىرقاتار ماماندىق يەلەرىنىڭ جۇمىسىنا كوڭىل ءبولۋ قاجەتتىگىن باسا ايتقان بولاتىن. سونىڭ ءبىرى – توتەنشە جاعدايلار سالاسىنىڭ سالالىق باعىتتارى. وسىعان وراي جامبىل وبلىسى شۋ اۋدانىندا سالا ماماندارىن قولداۋ ماقساتىندا جاڭا بەكەت اشىلدى، دەپ جازادى Qamshy.kz اقپارات اگەنتتىگى. ناقتىراق ايتساق، شۋ اۋدانى اكىمدىگىنىڭ 2019 جىلعى 15 شىلدەدەگى №340 جارلىعىنا سايكەس ەلدى مەكەندەگى ەڭ شالعاي ايماقتا ورنالاسقان شوقپار اۋىلدىق وكرۋگىندە جاڭا ءورت ءسوندىرۋ بەكەتى قۇرىلدى. سالتاناتتى شاراعا اۋدان اكىمىنىڭ ورىنباسارى نۇرلان جاقسىبايەۆ، اۋداندىق توتەنشە جاعدايلار ءبولىمى باسشىسىنىڭ مىندەتىن اتقارۋشى دانيار جانقۇلييەۆ، شوقپار اۋىلدىق وكرۋگىنىڭ اكىمى راشيد شوڭبايەۆ، شوقپار اۋىلدىق اقساقالدار القاسىنىڭ ءتوراعاسى قۇتتىباي شالبايەۆ، ەڭبەك ارداگەرى تولەۋحان شايمەردەنوۆ جانە تاعى باسقالارى قاتىسىپ، اۋىلدىقتاردى قۋانىشتارىمەن قۇتتىقتاپ، ءورت ءسوندىرۋ بەكەتى قىزمەتكەرلەرىنە تابىس تىلەدى.

اتاپ وتەرلىگى، وكرۋگ اكىمى بەكەتكە بولەك جەكە عيمارات بەرگەن، وندا كەزەكشى قۇرام وتىرادى. ال ونىڭ قاسىندا شۋ جول ديستانساسى ىقپالىمەن تاعى قوسىمشا ورىن ورنالاسقان، ىشىنەن جامبىل وبلىستىق توتەنشە جاعدايلار دەپارتامەنتىنىڭ «ءورت قۇتقارۋ قىزمەتى» مەملەكەتتىك مەكەمەسى تاراپىنان بولىنگەن ءورت ءسوندىرۋ كولىكتەرىن كورۋگە بولادى. بەكەت پەرسونالى جەتى شتاتتى بىرلىكتەن تۇرادى: 4 ءورت ءسوندىرۋشى، 3 كولىك جۇرگىزۋشى. ونى كۇتىپ ۇستاۋعا جەرگىلىكتى بيۋدجەتتەن بيىل 2 ميلليون 188 مىڭ تەڭگە بولىنگەن.

سالتاناتتى شارا بارىسىندا، تولە بي اۋىلىنداعى №19 ءورت ءسوندىرۋ بەكەتىنىڭ قىزمەتكەرلەرى جاڭا بەكەتتىڭ ءورت سوندىرۋشىلەرىمەن بىرگە پراكتيكالىق جاتتىعۋلار جاسادى.

جاڭا بەكەتتىڭ اشىلۋى سوڭعى ۋاقىتتاعى جاعىمدى جاڭالىق بولدى. سونىمەن قاتار، ونىڭ شوقپار اۋىلدىق وكرۋگى ءۇشىن ماڭىزى ەرەكشە. سەبەبى، ءورت شارپۋ جاعدايى مۇندا كوپ كەزدەسەدى. ەندى اتالمىش وكرۋگ ورتپەن ۋاقتىلى كۇرەسە الادى دەپ سەنىمدى ايتۋعا بولادى.

وسىنداي ءورت ءسوندىرۋ بەكەتتەرى الداعى ۋاقىتتا وزگە اۋدانداردان دا اشىلادى دەگەنگە سەنىم مول. سەبەبى شۋ اۋدانىنان بولەك، ىرگەلەس جاتقان مويىنقۇم اۋدانىندا دا ءتىلسىز جاۋ ماسەلەسى تالاي جىلدان بەرى قوس بۇيىردەن قىسىپ، سالا ماماندارىن كۇندىز كۇلكىدەن، تۇندە ۇيقىدان ايىرۋدا. سوندىقتان كورشىلەس اۋدانداردا شۋلىقتاردان ۇلگى السا ەكەن دەيمىز.