ءماجىلىس ءتوراعاسى نۇرلان نىعماتۋلين قازاقستاننىڭ تاريحي-مادەني مۇرالارىنىڭ ءبىرىڭعاي كەشەنىن جاساۋ تۇجىرىمداماسىن ازىرلەۋگە بيۋدجەتتەن 100 ميلليون تەڭگە سۇراعان مادەنيەت جانە سپورت مينيسترلىگىن قاتاڭ سىنعا الدى،–  دەپ Qamshy.kz اقپارات اگەنتتىگى حابارلايدى Sputnik-كە سىلتە جاساپ

ماجىلىستە "2019-2021 جىلدارعا ارنالعان رەسپۋبليكالىق بيۋدجەت تۋرالى" زاڭعا وزگەرىستەر ەنگىزۋ تۋرالى" زاڭ جوباسى قارالدى.

دەپۋتات بەيبىت مامىرايەۆتىڭ ايتۋىنشا، قۇجاتتا قازاقستاننىڭ تاريحي-مادەني مۇراسىنىڭ ءبىرىڭعاي كەشەندەرىن جاساۋ تۇجىرىمداماسىن ازىرلەۋگە ارنالعان شىعىستار 100 ميلليون تەڭگەگە ۇلعايتىلعان. ماجىلىسمەندەر بۇل بيۋدجەت قاراجاتىن ءتيىمسىز جۇمساۋ دەپ سانايدى.

"ءبىزدىڭ ويىمىزشا، قازاقستانىڭ تاريحي-مادەني مۇراسىنىڭ ءبىرىڭعاي كەشەندەرىن جاساۋ قازىرگى تاريحي-مادەني مۇرا وبەكتىلەرىن ءبىرىڭعاي بازاعا جيناقتاۋدى بىلدىرەدى. بۇل جايلى اقپارات ينتەرنەتتە جەتىپ ارتىلادى. ولاردى تەك ساپالى جۇيەلەۋ كەرەك. وسىعان شىن مانىندە 100 ميلليون تەڭگە كەرەك پە؟ جىل سوڭى دا تاقاپ قالدى، ءالى كونكۋرس وتكىزىپ، بۇل جۇمىستى ورىنداۋ كەرەك. مينيسترلىكتىڭ بيۋدجەت شىعىستارىن وڭتايلاندىرۋعا وسىلاي قاراعانى بىزگە تۇسىنىكسىز؟"، – دەدى مامىرايەۆ.

مادەنيەت جانە سپورت ءمينيسترىنىڭ مىندەتىن اتقارۋشى ەلدوس رامازانوۆ كونسەپسيا ءتورت باعىتتان تۇراتىنىن، تاريحي ەسكەرتكىشتەر مەن ولاردىڭ ينفراقۇرىلىمىن دامىتۋدىڭ باس جوسپارى ەكەنىن اتاپ ءوتتى.

الايدا، ءماجىلىس ءتوراعاسى نۇرلان نىعماتۋلين رامازانوۆتىڭ جاۋابىنا قاناعاتتانبادى. سپيكەر بىلدەي ءبىر مينيسترلىكتەن تۇجىرىمدامانى ازىرلەيتىن توپتىڭ شىقپاعانىنا قىنجىلدى.

"مەكەمەگە جۇمىسقا تۇراردا، تۇيىندەمە جازعان كەزدە ماسقارا ەندى. تورت-بەس ديپلومدارىڭىز بار، بىرنەشە جەردەن تاعىلىمدامادان وتكەن. ال جاۋاپ بەرگەن كەزدە "ورتاشامىن" دەيسىزدەر. مەنىڭ بىلۋىمشە، مادەنيەت مينيسترلىگىنىڭ اپپاراتىندا 300-دەي ادام قىزمەت ەتەدى. بۇدان بولەك، مۇراجايلار، مادەني ورتالىقتار بار. ولاردىڭ بارلىعىندا قانشاما مامان جۇمىس ىستەيدى. وسىلاردىڭ ىشىنەن باعدارلاما ەمەس، كونسەپسيا جاسايتىن ءبىر توپ شىقپاسا، وندا وسىنشا قىزمەتكەرلەر نە ءۇشىن كەرەك؟ نە ءۇشىن ولاردى ۇستايمىز؟"، – دەپ اشۋلاندى نىعماتۋلين.

سپيكەردىڭ سوزىنە سەنسەك، مينيسترلىك 100 ميلليون تەڭگەنى كونسەپسيا ازىرلەيتىن توپتى جالداۋ ءۇشىن سۇراعان ەكەن.

"ولار بىزگە جازىپ بەرەدى دەيدى. مىناۋ ماسقارا عوي. سوندا مينيسترلىكتىڭ اپپاراتى نەمەن اينالىسادى؟ بىزدەگى بارلىق مەملەكەتتىك ورگاندا وسىنداي. 100 ميلليونعا جەكەمەنشىك كومپانيانى جالدايسىڭدار. سودان كەيىن ولاردىڭ جازعانىن ۇكىمەت پەن پارلامەنتتە تانىستىرىپ، ءوز ەڭبەكتەرىڭ سياقتى ماقتاناسىڭدار. مەملەكەت نەگە ارتىق اقشا جۇمساۋى كەرەك؟! مەن وسىنى تۇسىنبەيمىن"، – دەدى ءماجىلىس ءتوراعاسى.

ونىڭ ايتۋىنشا، مەملەكەتتىڭ اقشاسىنا نارىقتاعى كومپانيانى جالداپ، جازدىرا سالۋ –  ەڭ وڭاي جول.

"قۇداي بىلەدى، ولاردىڭ نە جازاتىنىن؟!.. ءبىز مەملەكەتتىڭ اقشاسىن وڭدى-سولدى شاشپاي، ءتيىمدى جۇمساۋ كەرەك دەپ سانايمىز. ونى ءار مينيستر، مەملەكەتتىك ورگاننىڭ باسشىسى ءبىلىپ ءجۇرۋى كەرەك. جۇمىس ىستەگەندە وسىنى ەستەن شىعارمايىق"، – دەپ تۇيىندەدى ءسوزىن نىعماتۋلين.